قازاق-تۇرىكمەن كولىك-ترانزيت بايلانىسى: س ءى م باستى جوبالاردى اتادى

استانا. Kazinform - ەكى ەلدىڭ كولىكتىك-ترانزيتتىك بايلانىسىن بەلسەندى تۇردە تەرەڭدەتۋگە ەرەكشە ءمان بەرەمىز.

بۇل تۋرالى تۇرىكمەنستان مينيسترلەر كابينەتى ءتوراعاسىنىڭ ورىنباسارى - سىرتقى ىستەر ءمينيسترى راشيد مەرەدوۆپەن وتكەن كەلىسسوزدەن كەيىن پرەمەر-ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ ايتتى.

— تۇرىكمەن كاپيتالىنىڭ قاتىسۋىمەن قازاقستاندا 100 گە جۋىق كومپانيا قىزمەت ەتەدى. قارىم-قاتىناستارىمىزدىڭ تاعى ءبىر مىقتى دىڭگەگى — ترانزيتتىك-كولىكتىڭ بايلانىسىن بەلسەندى تۇردە تەرەڭدەتۋگە ەرەكشە ءمان بەرەمىز. بۇل سالادا ستراتەگيالىق سەرىكتەستىكتىڭ ورناعانىن ريزاشىلىقپەن اتاپ وتۋگە بولادى. ەكى ەل ارقىلى ازيا- ەۋروپا، ازيا-تاياۋ شىعىس ىشكى نارىقتارىن قوساتىن مارشرۋتتاردى دامىتۋ مەملەكەتتەرىمىزدىڭ حالىقارالىق قاۋىمداستىقتاعى ءرولىن نىعايتا تۇسەتىنى ءسوزسىز، - دەدى مۇرات نۇرتىلەۋ.

سونداي-اق ول الداعى ۋاقىتتا ءمان بەرىلەتىن باستى جوبالاردى اتاپ ءوتتى.

— وسى تۇستا قازاقستان، تۇرىكمەنستان، يران تەمىرجولدارىنىڭ ارتىقشىلىقتارىن ءتيىمدى پايدالانۋ ستراتەگيالىق ءمانى زور قادامداردىڭ ءبىرى بولماق. بۇگىنگى تاڭدا الەۋەتى ءوسىپ كەلە جاتقان قىتاي- قازاقستان - تۇرىكمەنستان- يران تەمىرجول ماگيسترالىن دامىتۋ دا ءوزارا ءتيىمدى جانە حالىقارالىق ساۋداعا جاڭا دەم بەرەتىن اسا ماڭىزدى ورتاق جوبا. سولتۇستىك-وڭتۇستىك ءدالىزى اياسىندا قازاقستان-تۇرىكمەنستان جانە رەسەي تەمىرجول ۇيىمداردىڭ ءۇشجاقتى ءوزارا ءىس- قيمىلىن كەڭەيتۋ مۇددەلەرىمىز توعىسىپ وتىرعان تاعى ءبىر ترانسكونتينەنتالدىق باستاما. وسى اسپەكتىلەردىڭ بارلىعىن كولىك-ترانزيت جانە لوگيستيكا جونىندەگى جۇمىس توبىنىڭ بيىل وتەتىن كەزەكتى وتىرىسىندا جان- جاقتى قاراستىرماقپىز. شەكارا ماڭىنداعى اۆتوموبيل جولدارىن ءتۇيىستىرۋ جانە وتكىزۋ پۋنكتتەرىن جاڭعىرتۋ بويىنشا بىرلەسكەن كۇش-جىگەردى ۇيلەستىرۋگە ءسوز بايلاستىق. ەلدەرىمىز كوپتەگەن جىل بويى تۇرىكمەن گازىن قىتاي نارىعىنا تاسىمالداۋعا سەنىمدى ارىپتەس رەتىندە بىرگە جۇمىس ىستەپ كەلە جاتىر. گاز سالاسىندا قول جەتكىزگەن ناتيجەلەرمەن توقتالىپ قالماي، الداعى جىلدارى اۋقىمدى جاڭا جوبالاردى جۇزەگە اسىرۋعا ءبىز دايىندىعىمىزدى تاعى دا قۋاتتاپ وتىرمىز، - دەپ ءتۇيدى ءسوزىن س ءى م باسشىسى.

قازاقستان تۇرىكمەنستانعا ەكسپورت كولەمىن 120 ميلليون دوللارعا دەيىن ۇلعايتۋعا دايىن.

سونداي-اق قازاقستان مەن تۇرىكمەنستان كوپجاقتى ستراتەگيالىق سەرىكتەستىكتى تەرەڭدەتۋ تۋرالى دەكلاراتسيا قابىلداعان ەدى.

قازاقستان مەن تۇرىكمەنستان اراسىندا تاۋار اينالىمى 1 ميلليارد دوللارعا دەيىن ارتپاق.