قازاق ەرتەگىلەرى سەرب تىلىنە اۋدارىلدى
ەلىمىزدىڭ ۇلتتىق مادەني مۇراسىن ناسيحاتتاۋ ءۇشىن قازاقستاننىڭ سەربياداعى ەلشىلىگى قازاق ەرتەگىلەرىن سەرب تىلىنە اۋداردى، دەپ حابارلادى سىرتقى ىستەر مينيسترلىگىنىڭ باسپا ءسوز قىزمەتى.
ەندى سەرب بالالارى قارلىعاش تۋرالى اڭىزدار، جانۋارلار داۋى، قاڭباق شال تۋرالى قيال-عاجايىپ اڭگىمەلەر جانە الدار كوسەنىڭ قۋلىعى جانە تاعى باسقا قازاق ەرتەگىلەرىن ءوز انا تىلىندە وقي الادى. كىتاپتىڭ تۇساۋكەسەرى بەلگراد قالاسىنداعى بالالار كىتاپحاناسىندا ءوتتى.
قازاقستاننىڭ سەربياداعى ەلشىسى ءمادي اتامقۇلوۆ بالالاردى كىتاپپەن تانىستىرىپ، قازاقستان تۋرالى قىزىقتى فاكتىلەردى ايتىپ، كىشكەنتاي وقىرماندارعا باعالى سىيلىقتاردى تابىس ەتتى.
سونداي-اق جاڭا كىتاپتان بىرنەشە قازاق حالىق ەرتەگىلەرى وقىلدى.
الداعى ۋاقىتتا سەرب تىلىنە اۋدارىلعان قازاق ەرتەگىلەرى جيناعىنىڭ 100 داناسى سەربياداعى كىتاپحانالار مەن مەكتەپتەرگە ۇسىنىلادى.
