قازاق-قىتاي ينۆەستيتسيالىق قورى قۇرىلماق

بۇل تۋرالى اقوردا حابارلادى.

قاسىم-جومارت توقايەۆ مۇنداي جوبالاردى جۇزەگە اسىرۋ ءۇشىن سوعان ساي قارجىلىق قۇرىلىم قاجەت ەكەنىن ەسكە سالدى. پرەزيدەنت فورۋم قاتىسۋشىلارىنا بىرنەشە جىلدان بەرى تابىستى جۇمىس ىستەپ كەلە جاتقان «استانا» حالىقارالىق قارجى ورتالىعى تۋرالى باياندادى.

- ا ح ق و مەن الەمنىڭ جەتەكشى قارجى ورتالىقتارىنىڭ ءبىرى سانالاتىن گونكونگ اراسىنداعى تىعىز ىقپالداستىق مول مۇمكىندىكتەرگە جول اشاتىنى ءسوزسىز. قىركۇيەك ايىنىڭ باسىندا «سامۇرىق-قازىنا» قورى ورتالىق ازيا جانە ش ى ۇ ەلدەرى ەميتەنتتەرىنىڭ اراسىندا ءبىرىنشى بولىپ قىتايدىڭ بانكارالىق نارىعىنا كىردى. جالپى سوماسى ءۇش ميلليارد يۋاننان (450 ميلليون دوللار) اساتىن پاندا-وبليگاتسيالار شىعاردى. جالپى، قازاقستان ينۆەستيتسيالىق كەزەڭدى بارىنشا قىسقا، اشىق ءارى تەحنولوگيالىق تۇرعىدان وزىق ەتىپ ۇيىمداستىرۋعا نيەتتى. Kazakh Invest ۇلتتىق كومپانياسى جانىنان قازاق-قىتاي ينۆەستيتسيالىق قورىن قۇرۋ تۋرالى كەلىسىمگە قول قويۋ - وسى باعىتتاعى ماڭىزدى قادامنىڭ ءبىرى، - دەدى مەملەكەت باسشىسى.

قاسىم-جومارت توقايەۆتىڭ پىكىرىنشە، قازاق-قىتاي ينۆەستيتسيالىق فورۋمى ەكى ەلدىڭ ىسكەر توپتارى اراسىنداعى تىكەلەي بايلانىستاردى كۇشەيتەتىن تۇراقتى الاڭعا اينالۋعا ءتيىس.

- سوندىقتان وسى فورۋمدى «قازاقستان-قىتاي» الماتى ينۆەستيتسيالىق ديالوگى دەگەن اتاۋمەن جىل سايىن قىركۇيەك ايىندا وتكىزۋدى ۇسىنامىن. جالپى، بۇگىن ءبىرقاتار ناقتى كەلىسىمدەرگە قول جەتكىزدىك. بۇل كەلىسىمدەر قازاقستان مەن قىتايدىڭ جانە تۇتاس ەۋرازيا قۇرلىعىنىڭ ورنىقتى دامۋىنا تىڭ سەرپىن بەرەدى دەپ سەنەمىن،- دەدى پرەزيدەنت.

وسى فورۋمدا قاسىم-جومارت توقايەۆ قازاقستان قىتايمەن ماڭگى دوستىق بايلانىستارىن نىعايتۋعا باسا ءمان بەرىپ وتىرعانىنا نازار اۋداردى.

- ەلىمىز ءۇشىن بۇل - سىرتقى ساياساتتاعى ەڭ ماڭىزدى ماقساتتاردىڭ ءبىرى. ورتاق تاريحىمىزعا ۇڭىلسەك، قىتاي حالقى ءبىزدىڭ حالقىمىزعا ەشقاشان ەشقانداي زيان كەلتىرگەن جوق. قوس حالىق ءوزارا سىيلاستىق پەن قولداۋ اياسىندا كوپ جىل بويى بىرگە ءومىر سۇرگەن. ال قازىرگى تۇراقسىز، بۇلدىر زاماندا قازاقستان مەن قىتاي سەنىمدى سەرىكتەستەر رەتىندە قويان-قولتىق بىرگە ارەكەت ەتىپ، سان الۋان سىن-قاتەرلەرگە تويتارىس بەرۋى كەرەك. قىتاي تىلىندە مىناداي ماعىنالى ماقال بار: 人心齐，泰山移، ياعني: «ءبىز ءبارىمىز ءبىرتۇتاس بولساق، بيىك تايشان تاۋىن دا ورنىنان قوزعاي الامىز». قازاقستان مەن قىتاي - ەكى دوس، كورشىلەس ەل بولىپ، ءاربىر ءىستى ويداعىداي جۇزەگە اسىرادى دەپ سەنەمىن،- دەپ تۇيىندەدى مەملەكەت باسشىسى.

ايتا كەتەيىك، پرەزيدەنت قازاقستان قىتاي مەن ەۋروپانى جالعايتىن باستى لوگيستيكالىق حابقا اينالاتىنىن ايتتى.