«قازاق- قىتاي» ىقپالداستىعى بۇرىن-سوڭدى بولماعان بەلەستەرگە شىقتى - مۇرات نۇرتىلەۋ
استانا. KAZINFORM - قىتاي وركەنيەتى مەن قازاق ەلى اراسىنداعى تىعىز قارىم- قاتىناستىڭ تامىرى تەرەڭ ءارى ۇمتىلىستارى جارقىن بولاشاققا باعىتتالعان.
ەكى ەل قارىم-قاتىناسى تۋرالى قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ ايتتى.
«قىتاي حالىق رەسپۋبليكاسىنىڭ سىرتقى ىستەر ءمينيسترى قۇرمەتتى ۋاڭ ي مىرزاعا جانە ونىڭ ەرتكەن دەلەگاتسياسىنا استاناعا قوش كەلدىڭىزدەر دەي كەلە، مەنىڭ شاقىرۋىمدى قابىل العانى ءۇشىن ارىپتەسىمە العىسىمدى بىلدىرەمىن. «الىستاعى اعايىننان، جاقىنداعى كورشىڭ ارتىق» دەمەكشى، سىزدەي مارتەبەلى ءارى قادىرلى قوناعىمىزعا تورىمىزدەن ءاردايىم ورىن بار. بۇگىندە قىتاي -ساياسي، الەۋمەتتىك- ەكونوميكالىق، مادەني- گۋمانيتارلىق جانە تەحنولوگيالىق جەتىستىكتەرىن الەم مويىنداعان بەدەلدى مەملەكەت»- دەدى مۇرات نۇرتىلەۋ ەلوردادا قىتايدىڭ سىرتقى ىستەر ءمينيسترى ۋاڭ ي-مەن كەزدەسۋدەن سوڭ ب ا ق وكىلدەرىنە مالىمدەمە جاساي وتىرىپ.
ونىڭ ايتۋىنشا، قىتايدىڭ حالىقارالىق ارەناداعى ءرولى مەن ايرىقشا ىقپالى بارشاعا ايان.
«ورتالىق ازيا ەلدەرىمەن تەڭدىك، اشىقتىق، ءوزارا سىيلاستىق پەن سەنىم جانە كونسترۋكتيۆتىك قاعيداتتارىنا ساي قارىم-قاتىناس ورناتىپ، ولاردىڭ ەگەمەندىگى مەن تاۋەلسىزدىگىنە، تەرريتوريالىق تۇتاستىعىنا قولداۋ كورسەتۋى بەيجىڭنىڭ ايماقتىق تۇراقتىلىق پەن قاۋىپسىزدىككە قوسقان زور ۇلەسى دەپ بىلەمىز. بەس مىڭ جىلدىق تاريحى بار قىتاي وركەنيەتى مەن قازاق ەلى اراسىنداعى تىعىز قارىم-قاتىناستاردىڭ تامىرى تەرەڭ ءارى ۇمتىلىستارى جارقىن بولاشاققا باعىتتالعان. پرەزيدەنت قاسىم-جومارت توقايەۆ پەن ءتوراعا شي جيڭپيڭ مىرزانىڭ سارالى ساياساتىنىڭ ارقاسىندا «قازاق- قىتاي» ىقپالداستىعى بۇرىن-سوڭدى بولماعان بەلەستەرگە شىقتى. ءبىز تاتۋ كورشىلەرمىز، ءداستۇرلى دوستار جانە ماڭگى جان-جاقتى ستراتەگيالىق سەرىكتەسپىز»، - دەيدى ول.
ايتا كەتەيىك، بۇگىن قىتاي حالىق رەسپۋبليكاسىنىڭ سىرتقى ىستەر ءمينيسترى ۋاڭ ي قازاقستانعا رەسمي ساپارمەن كەلدى.
