قازاق- قىتاي دوستىعى ماڭگى جالعاسا بەرەدى - مايرا مۇحامەد قىزى

بەيجىڭ. KAZINFORM - قازاقستان قىتايمەن ەجەلدەن بەرى كورشى كەلە جاتقان دوستىعى مىعىم، بەرەكەسى بەكەم ەل. ەكى ەلدىڭ دوستىعى بۇدان ارى دا جالعاسا بەرەدى.

بۇل تۋرالى KAZINFORM تىلشىسىنە قىتايداعى قازاقستان تۋريزمى جىلىنىڭ رەسمي اشىلۋ سالتاناتىنا ونەر كورسەتۋگە كەلگەن ق ر ەڭبەك سىڭىرگەن ءارتىسى مايرا مۇحامەد قىزى ايتتى.

«مىنە، بۇگىن الىپ شاھارىمىز الماتىدان قىتاي استاناسى بەيجىڭگە كەلدىك. ماقساتىمىز - قىتايداعى قازاقستاننىڭ تۋريزم جىلىنىڭ رەسمي اشىلۋ سالتاناتىندا ونەر كورسەتۋ. مەنىمەن بىرگە وزدەرىڭىز كورگەندەي، قازاقستاننىڭ حالىق ءارتىسى روزا رىمبايەۆا، وپەرا ءانشىسى زارينا التىنبايەۆا، « ۇلىتاۋ» ەتنو-روك توبى، اباي اتىنداعى قازۇوبت حور ۇجىمى، «سەرپەر» جانە «سازگەن سازى» انسامبلدەرىنىڭ شىعارماشىلىق ۇجىمدارى، «استانا بالەت» بالەت ترۋپپاسى سونىمەن بىرگە باسقا دا انشىلەر، كۇيشىلەر بەيجىڭدەگى China National Opera House ساحناسىندا ونەر كورسەتەمىز»، - دەدى ءانشى.

سونداي-اق، مايرا مۇحامەد قىزى بۇل يگى ءىس-شارا ەكى ەلدىڭ باسشىلارىنىڭ سەنىمدى دوستىعىنىڭ سيمۆولى ەكەنىن دە اتاپ ءوتتى.

«قازاقستان قىتايمەن ەجەلدەن بەرى كورشى كەلە جاتقان دوستىعى مىعىم، بەرەكەسى بەكەم ەل. ەكى ەلدىڭ دوستىعى بۇدان ارى دا جالعاسا بەرەدى. مىنە، بۇل شارا ەكى ەل باسشىلارىنىڭ سەنىمدى دوستىعىنىڭ سيمۆولى. تاتۋ كورشى ەل ەكەنىمىزدىڭ ايعاعى. قازاقستاننىڭ قىتايداعى تۋريزم جىلى بولىپ جاريالانۋى وسىعان دالەل بولىپ تۇر. وسىنداي اۋقىمدى ءىس-شارالار ارقىلى ءبىز قىتاي ەلىنە ءوزىمىزدىڭ مادەنيەتىمىزدى، سالت-ءداستۇرىمىزدى كورسەتەمىز. ءبىزدىڭ دە باعا جەتپەس قۇندىلىقتارىمىزدى، باي مادەنيەتىمىزدى وزگە ەلدەر كورسىن، ءبىلسىن»، - دەدى مايرا مۇحامەد قىزى.

ايتا كەتەيىك، الداعى 28-29-ناۋرىز كۇندەرى قىتاي استاناسى بەيجىڭدە قىتايداعى قازاقستان تۋريزمى جىلىنىڭ رەسمي اشىلۋ سالتاناتى وتەدى. وسىعان وراي قازاقستاننان بەيجىڭگە 600 گە جۋىق ارنايى دەلەگاتسيا ۇشىپ كەلدى.

اۆتور
كۇنسۇلتان وتارباي