قازاق پەن موڭعول كيىز ءۇي مادەنيەتىنىڭ مۇراگەرى سانالادى
استانا. KAZINFORM - قازاق پەن موڭعول كوشپەندىلەر وركەنيەتى مەن كيىز ءۇي مادەنيەتىنىڭ مۇراگەرى سانالادى.
بۇل تۋرالى اقوردادا موڭعوليا پرەزيدەنتى ۋحنااگين حۋرەلسۇحپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقايەۆ ايتتى.
- مەن بۇل ساپارعا ايرىقشا ءمان بەرىپ وتىرمىن. سەبەبى، موڭعوليا ايماقتاعى ماڭىزدى سەرىكتەسىمىز، تاتۋ كورشىمىز. ءبىزدىڭ تاريحىمىز بەن تامىرىمىز ورتاق. ەكى ەل دە كوشپەندىلەر وركەنيەتى مەن كيىز ءۇي مادەنيەتىنىڭ مۇراگەرى سانالادى. قوس حالىقتىڭ بولمىسى مەن رۋحاني دۇنيەسى، ءومىر سالتى مەن ادەت-عۇرپى ۇندەس. سوندىقتان ءبىز ءبىر-بىرىمىزگە ءاردايىم تىلەكتەس بولىپ، جەتىستىكتەرىمىزگە شىنايى قۋانامىز، - دەدى پرەزيدەنت.
مەملەكەت باسشىسى سوڭعى جىلدارى قازاقستان مەن موڭعوليانىڭ قارىم-قاتىناسى تىڭ قارقىنمەن دامىپ كەلە جاتقانىنا نازار اۋدارتتى.
- وسىدان 1,5 جىل بۇرىن موڭعولياعا مەملەكەتتىك ساپارمەن بارعانىمدى بىلەسىزدەر. قادىرلى پرەزيدەنت ۋحنااگين ءحۋرەلسۇح مىرزانىڭ جانە بارشا موڭعول حالقىنىڭ ىقىلاس-ءىلتيپاتىن ءاردايىم ريزاشىلىقپەن ەسكە الامىن. سول ساپار بارىسىندا ستراتەگيالىق ارىپتەستىك تۋرالى دەكلاراتسياعا قول قويدىق. بۇل - مىڭ جىلدىق باۋىرلاستىعىمىزدى ءبىرجولا بەكىتە تۇسكەن تاريحي قۇجات. قازىرگى تاڭدا ەكى ەلدىڭ پارلامەنتتەرى مەن قۇزىرلى مينيسترلىكتەرى تىعىز بايلانىس ورناتقان. ۇكىمەتارالىق كوميسسيا جانە ىسكەرلىك كەڭەس تابىستى جۇمىس ىستەپ كەلەدى. پرەزيدەنت ءحۋرەلسۇحتىڭ بۇگىنگى ساپارى وسى ىنتىماقتاستىقتى نىعايتا تۇسەرى انىق، - دەدى قاسىم-جومارت توقايەۆ.
بۇعان دەيىن قاسىم-جومارت توقايەۆ اقوردادا موڭعوليا پرەزيدەنتىن قارسى العانىن جازعان ەدىك.
