قازاق ۇلتتىق حورەوگرافيا اكادەمياسىنىڭ ستۋدەنتتەرى حالىقارالىق بايقاۋدا جەڭىسكە جەتتى

استانا. KAZINFORM - ۆەنگريانىڭ بۋداپەشت قالاسىندا ەكىنشى حالىقارالىق Budapest ballet Grand Prix بايقاۋى ءوتتى.

بايقاۋدا قازاق ۇلتتىق حورەوگرافيا اكادەمياسىنىڭ ستۋدەنتتەرى جەڭىس تۇعىرىنان كورىندى، دەپ حابارلايدى ق ر مادەنيەت جانە اقپارات مينيسترلىگىنىڭ باسپا ءسوز قىزمەتى.

باسپا ءسوز قىزمەتىنىڭ مالىمەتتەرىنە قاراعاندا، Budapest Ballet Grand Prix-كە الەمنىڭ 31 ەلىنەن جاس ءبيشى قاتىستى.

بۇل بايقاۋ قاتىسۋشىلارعا الەمدىك ساحنادا ءوز شەبەرلىكتەرىن كورسەتۋگە مۇمكىندىك بەردى. كونكۋرستا تورعىن لەبەن ءبىرىنشى ورىنعا، داريا ميتروفانوۆا ەكىنشى ورىنعا يە بولدى، ال ادەمى ءجانابىل بايقاۋدىڭ ديپلومانتى اتاندى.

بايقاۋ بارىسىندا قاتىسۋشىلار «پاحيتا»، «تاليسمان»، «ۇيقىداعى ارۋ»، «كورسار»، «دون كيحوت» كلاسسيكالىق بالەتتەرىنەن جارقىن ۆارياتسيالار كورسەتتى.

باعدارلاما كاسىپتىك ءبىلىم بەرۋ مەكتەپ-كوللەدجىنىڭ باسشىسى، اكادەميا پەداگوگى سۆەتلانا كوكشينوۆانىڭ باسشىلىعىمەن دايىندالدى.

وسىعان دەيىن ۇكىمەتتىڭ 2024-2029-جىلدارعا ارنالعان ەكومادەنيەتتى دامىتۋ تۇجىرىمداماسىن بەكىتكەنى تۋرالى جازدىق.