«قازاق كونسەرتتە» ۇلتتىق ونەر ۇلىقتالدى: امەريكالىق مۋزىكانت قازاقتىڭ كۇيىن ورىندادى
استانا. KAZINFORM - جاڭا مادەني جوبا قازاق حالقىنىڭ عاسىرلار بويى قالىپتاسقان انشىلىك جانە كۇيشىلىك مەكتەپتەرىن كەڭىنەن تانىستىرۋدى كوزدەيدى، دەپ حابارلايدى kznews.kz.
ۇيىمداستىرۋشىلار كونسەرتتىك ماۋسىم اياقتالعانعا دەيىن ەلىمىزدىڭ ءار ءوڭىرىنىڭ مۋزىكالىق مۇراسىنا ارنالعان سەگىز كونسەرت وتكىزۋدى جوسپارلاپ وتىر.
العاشقى كونسەرت قازاقتىڭ ءداستۇرلى مۋزىكا ونەرىندە ەرەكشە ورنى بار ارقا مەكتەبىنە ارنالدى. كەش بارىسىندا سال-سەرىلەر ءداستۇرى مەن شەرتپە كۇي ونەرىنىڭ ۇزدىك تۋىندىلارى ورىندالدى.
ساحنا تورىنە كوتەرىلگەن بەلگىلى ءداستۇرلى انشىلەر مەن كۇيشىلەر ءبىرجان سال، اقان سەرى، جاياۋ مۇسا، تاتتىمبەت جانە ىقىلاس سەكىلدى قازاق مۋزىكاسىنىڭ كورنەكتى وكىلدەرىنىڭ شىعارمالارىن كورەرمەن نازارىنا ۇسىندى.
ارقا انشىلىك مەكتەبى كەڭ تىنىستى اۋەنىمەن، تەرەڭ مازمۇنىمەن جانە ورىنداۋشىلىق شەبەرلىگىمەن ەرەكشەلەنەدى. ال شەرتپە كۇي ءداستۇرى قازاق حالقىنىڭ دۇنيەتانىمىن، فيلوسوفيالىق ويى مەن جان دۇنيەسىن دومبىرا ءۇنى ارقىلى جەتكىزەتىن ۇلتتىق ونەردىڭ ماڭىزدى سالاسى سانالادى.
امەريكالىق دومبىراشى كورەرمەندى ءتانتى ەتتى
كونسەرتتىڭ ەرەكشە ساتتەرىنىڭ ءبىرى ا ق ش-تان كەلگەن مۋزىكانت Geoff Gersh-تىڭ ساحناعا شىعۋى بولدى. امەريكالىق ونەرپاز قازاقتىڭ ءداستۇرلى اسپابى دومبىرامەن قىزداربەك تورەباي ۇلىنىڭ ايگىلى «سىلقىم قىز» كۇيىن ورىندادى.
شەتەلدىك مۋزىكانتتىڭ قازاق كۇيىنە قىزىعۋشىلىق تانىتىپ، ونى ساحنادا ورىنداۋى ۇلتتىق ونەردىڭ گەوگرافيالىق شەكارادان اسىپ، حالىقارالىق دەڭگەيدە تانىلىپ كەلە جاتقانىن كورسەتەدى.
ۇيىمداستىرۋشىلاردىڭ ايتۋىنشا، كونسەرتتەر تسيكلى تەك مۋزىكالىق شىعارمالاردى ورىنداۋمەن شەكتەلمەيدى. جوبانىڭ باستى ماقساتى - قازاقتىڭ وڭىرلىك ونەر مەكتەپتەرىنىڭ ەرەكشەلىگىن تانىتۋ، ءداستۇرلى مۋزىكانى ناسيحاتتاۋ جانە ۇرپاقتار اراسىنداعى رۋحاني ساباقتاستىقتى ساقتاۋ.
الداعى كونسەرتتەردە ەلىمىزدىڭ وزگە وڭىرلەرىنە ءتان انشىلىك جانە كۇيشىلىك داستۇرلەر كوپشىلىك نازارىنا ۇسىنىلادى.
وسىلايشا، «قازاق كونسەرت» ساحناسىندا باستالعان جاڭا جوبا ۇلتتىق مۋزىكالىق مۇرانى ساقتاپ قانا قويماي، ونى جاڭا اۋديتورياعا تانىستىرۋعا مۇمكىندىك بەرمەك.
