قازاق كۇرەسىن جابىق عيماراتتاعى ازيا ويىندارىنىڭ باعدارلاماسىنا ەنگىزۋ ۇسىنىلدى

استانا. KAZINFORM - قازاقستان قازاق كۇرەسىن جابىق عيماراتتاعى ازيا ويىندارىنىڭ باعدارلاماسىنا ەنگىزۋ تۋرالى ءوتىنىم بەردى.

ا
Фото: Туризм және спорт министрлігі

بۇل تۋرالى ق ر تۋريزم جانە سپورت ءمينيسترى ەربول مىرزابوسىنوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا مالىمدەدى.

ءمينيستردىڭ ايتۋىنشا، قازىرگى ۋاقىتتا قازاقستاندا سپورتتىڭ 11 ۇلتتىق ءتۇرى بار. قازاق كۇرەسى مەن توعىزقۇمالاقتىڭ حالىقارالىق دەڭگەيدەگى تانىمالدىعى دا ارتىپ كەلەدى. اتالعان سپورت تۇرلەرى بويىنشا فەدەراتسيالار الەمنىڭ 50 دەن استام ەلىندە قۇرىلعان.

- جاقىن ۋاقىتتا ەلىمىزگە ازيا وليمپيادالىق كەڭەسىنىڭ باس حاتشىسى كەلەدى. ءبىز قازاق كۇرەسىن جابىق عيماراتتاعى ازيا ويىندارىنىڭ باعدارلاماسىنا ەنگىزۋ تۋرالى ءوتىنىم بەردىك، - دەدى ەربول مىرزابوسىنوۆ.

سونىمەن قاتار مينيستر توعىزقۇمالاقتىڭ دا ەل ىشىندە جانە شەتەلدە بەلسەندى دامىپ كەلە جاتقانىن اتاپ ءوتتى. بۇل سپورت تۇرىنەن الەم جانە ازيا چەمپيوناتتارى تۇراقتى تۇردە ۇيىمداستىرىلادى.

ۆەدومستۆو باسشىسىنىڭ سوزىنشە، الداعى ۋاقىتتا توعىزقۇمالاقتى دا حالىقارالىق كەشەندى سپورت جارىستارىنىڭ باعدارلاماسىنا ەنگىزۋ باعىتىندا جۇمىس جۇرگىزىلەدى.

بۇعان دەيىن قازاقستاندا ۇلتتىق قۇرامالاردى دايارلاۋعا 20 ميلليارد تەڭگەدەن استام قارجى بولىنگەنىن جازعانبىز.