قازاق جازۋشىسىنىڭ كىتاپتارى مۇحيت اسىپ، ا ق ش-تىڭ 31 شتاتىنان ءبىر-اق شىقتى
شىمكەنت. KAZINFORM - شىمكەنتتىك جاس اقىن، جازۋشى ءارى اۋدارماشى سۇندەت سەيىتوۆتىڭ تۋىندىلارى حالىقارالىق دەڭگەيدە تانىلىپ، ا ق ش جانە اۋستراليانىڭ ەڭ بەدەلدى اكادەميالىق جانە قوعامدىق كىتاپحانا قورلارىنىڭ كاتالوگىنا رەسمي تۇردە قابىلداندى.
قازاقستاندىق اۆتوردىڭ كىتاپتارى بۇگىندە مۇحيتتىڭ ارعى بەتىندەگى زەرتتەۋشىلەر مەن وقىرمانداردىڭ يگىلىگىنە اينالىپ وتىر.
ەشقانداي دەمەۋشىسىز باعىندىرىلعان امەريكا نارىعى سۇندەت سەيىتوۆتىڭ مالىمدەۋىنشە، بۇل جەتىستىككە جەتۋ ءۇشىن ول بىرنەشە جىل بويى حالىقارالىق باسپا ءىسى مەن كىتاپ تاراتۋ پلاتفورمالارىن ءوز بەتىنشە زەرتتەگەن. ول ەشقانداي مەملەكەتتىك نەمەسە جەكە باعدارلامالاردىڭ قارجىلىق قولداۋىنا سۇيەنبەي، جۇزدەگەن حات جازىپ، كوپتەگەن باس تارتۋدى باستان وتكەرگەن.
ناتيجەسىندە، اۆتوردىڭ اعىلشىن تىلىنە اۋدارىلعان «Unforgotten» («ۇمىتپاس») ولەڭدەر جيناعى، «Drone Show» («درون شوۋ») رومانى جانە باسقا دا ەڭبەكتەرى (جالپى سانى 3 كىتاپ): ا ق ش-تىڭ 31 شتاتىنداعى جانە ۆاشينگتون (Washington, D. C.) فەدەرالدىق وكرۋگىندەگى 198 ءىرى كىتاپحانا جۇيەسىنىڭ كاتالوگىنا ەندى. بۇل جەلىلەر جالپى ەسەپپەن العاندا امەريكا بويىنشا، 2 مىڭنان استام كىتاپحانا فيليالىن قامتيدى.
الەمدىك دەڭگەيدەگى قوس الىپ
كاليفورنيا جانە اۋستراليا ۇلتتىق ۋنيۆەرسيتەتتەرى جازۋشى شىعارماشىلىعىنداعى ەڭ ماڭىزدى بەلەستەردىڭ ءبىرى - ونىڭ «Unforgotten» («ۇمىتپاس») اتتى ولەڭدەر جيناعىنىڭ الەمدەگى ەڭ بەدەلدى ەكى بىردەي جوعارى وقۋ ورنىنىڭ رەسمي كىتاپحانا قورىنا قابىلدانۋى بولدى.
ولار: University of California (كاليفورنيا ۋنيۆەرسيتەتى، ا ق ش) - 40 ميلليوندىق كىتاپ قورى بار امەريكانىڭ ەڭ باي ءارى كونە اكادەميالىق كىتاپحانالارىنىڭ ءبىرى. The Australian National University (اۋستراليا ۇلتتىق ۋنيۆەرسيتەتى، ANU) - الەمدىك QS رەيتينگىندە ۇزدىك 30 ۋنيۆەرسيتەتتىڭ قاتارىنا كىرەتىن جاھاندىق عىلىم ورداسى.
جيناققا اۆتوردىڭ ەستەلىك، وتان، ماحاببات، سەنىم جانە قيىندىقتارعا قارسى تۇرۋ (امان قالۋ) تاقىرىپتارىن ارقاۋ ەتكەن فيلوسوفيالىق جىرلارى ەنگەن.
كىتاپتار اۋستراليا كونتينەنتىنە دە جەتتى
اكادەميالىق ورتادان بولەك، سۇندەت سەيىتوۆتىڭ شىعارماسى اۋسترالياداعى City of Belmont - Ruth Faulkner Public Library قوعامدىق كىتاپحاناسىنىڭ قورىنا رەسمي تۇردە قابىلداندى.
كىتاپحانا جۇيەسىندە اۆتور ەسىمى Seitov, Sundet دەپ تىركەلىپ، جەرگىلىكتى وقىرماندارعا «Borrow» (كىتاپحانادان ۇيگە الىپ وقۋ) جۇيەسى ارقىلى تولىقتاي قولجەتىمدى ەتىلدى.
- قازاقستاندا جازىلعان روماننىڭ مۇنداي دەڭگەيدەگى كاتالوگتاردا رەسمي بەكىتىلۋى - بۇل جەكە مەنىڭ عانا ەمەس، زاماناۋي قازاق ادەبيەتىنىڭ دە الەمدىك كەڭىستىكتەگى كىشكەنتاي ءبىر جەڭىسى دەپ بىلەمىن. الدا ءالى بەس كونتينەنت بار، تاياۋدا ەۋروپاعا دا جەتەمىز، - دەيدى اۆتور.
ايتا كەتەيىك، سۇندەت سەيىتوۆ - 1998 -جىلى تۋعان قازاقستاندىق اقىن، جازۋشى، اۋدارماشى. قازاقستان جازۋشىلار وداعىنىڭ جانە ا ق ش-تىڭ بەدەلدى ا ق ش اۆتورلار گيلدياسىنىڭ «The Authors Guild» مۇشەسى. سونىمەن قاتار، ول قازاقستان جانە ورتالىق ازيا ەلدەرىنەن ا ق ش اۆتورلار گيلدياسىنا مۇشە بولعان جالعىز قازاقستاندىق قالامگەر. ءتۇرلى رەسپۋبليكالىق جانە حالىقارالىق ادەبي بايقاۋلاردىڭ لاۋرەاتى. سونداي- اق، ول ورتا عاسىرلىق شاعاتاي تىلىندەگى مۇرالاردى قازاق تىلىنە اۋدارۋمەن دە اينالىسادى. قازىرگى تاڭدا وتباسىمەن شىمكەنت قالاسىندا تۇرادى.
ال، اۆتورلار گيلدياسى - 1912 -جىلى قۇرىلعان. شتاب-پاتەرى نيۋ-يورك قالاسىندا ورنالاسقان. گيلدياعا الەمگە ايگىلى نوبەل، بۋكەر، پۋليتسەر سىيلىعىنىڭ لاۋرەاتتارى مۇشە.
اتاپ ايتساق، نوبەل سىيلىعىنىڭ لاۋرەاتى توني مورريسون، ەرنەست حەمينگۋەي، پەرل باك، سول بەللوۋ، ستيۆەن كينگ جانە تانىمال قالامگەرلەر وسى ۇيىمنىڭ قاتارىندا.
اۆتور
اينۇر تۋماكبايەۆا
