قازاق حالقىنىڭ قيىن ساتتەگى كومەگىن ءاردايىم ەستە ساقتايمىز - ازەربايجان ءتىلشىسى

استانا. KAZINFORM - اقتاۋ ماڭىنداعى ۇشاق اپاتىنان ەكى ۇشقىش مەرت بولدى. وكىنىشكە قاراي، ەكەۋى دە ازەربايجان ازاماتى. قالعان ءۇش ەكيپاج مۇشەسى امان قالدى.

ەگجەي-تەگجەيىن Jibek Joly ارناسىنىڭ ەفيرىندە ازەربايجان قوعامدىق تەلەارناسىنىڭ جۋرناليسى ءارى جۇرگىزۋشىسى مۋراد گۋسەينوۆ ايتىپ بەردى.

- الدىمەن قازاقستاندىق تاراپقا العىس ايتام. ۇشاق اپاتىنان كەيىن جاقىن جەردەگى ادامدار ءبىرىنشى بولىپ كومەككە كەلدى. زارداپ شەككەن جانداردى قۇتقارعان بارلىق قىزمەت پەن دارىگەرلەرگە ۇلكەن راقمەت. ءسىزدىڭ ماتەريالىڭىزدا ادامداردىڭ قيىن جاعدايعا كومەككە اسىعىپ، قان تاپسىرىپ جاتقانىن ءبىلدىم. بۇل ازەربايجان مەن قازاقستان اراسىنداعى بايلانىستىڭ قانشالىقتى مىعىم ەكەندىگىن بىلدىرەدى. بۇل ەكى حالىقتىڭ بەرىك جانە شىنايى دوستىعىنىڭ دالەلى، - دەدى مۋراد گۋسەينوۆ ەفير كەزىندە.

سونداي-اق، ازەربايجان ءتىلشىسى ەكى ەل كوشباسشىسىنىڭ تىعىز بايلانىستا ەكەنىن اتاپ ءوتتى.

- ءبىزدىڭ كوشباسشىلارىمىز ازەربايجان پرەزيدەنتى يلحام اليەۆ پەن قازاقستان پرەزيدەنتى قاسىم-جومارت توقايەۆ اراسىنداعى تۇراقتى ديالوگ پەن تىعىز قارىم-قاتىناستى ەرەكشە اتاپ ءوتۋ قاجەت. ولاردىڭ ءوزارا ءىس-قيمىلى توتەنشە جاعدايدا عانا ەمەس، ەكى ەل اراسىنداعى سەرىكتەستىك قاتىناستىڭ كەڭ اۋقىمىن قامتيدى، - دەيدى ول.

ازەربايجاندىق ارىپتەسىمىز، قورىتىندىلاي كەلە، قايعىعا ورتاقتاسىپ قان تاپسىرعان جانە قازاقستانداعى ازەربايجان ەلشىلىگى الدىندا گۇل شوعىن قويعان قازاقستاندىقتارعا العىسىن ايتتى.

- ازەربايجان حالقى باۋىرلاستىق قولداۋدى ەشقاشان ۇمىتپايدى جانە قيىن ساتتە كورسەتىلگەن قازاق حالقىنىڭ كومەگىن ءاردايىم ەستە ساقتايدى، - دەيدى باۋىرلاس ارىپتەس.

ايتا كەتەيىك، الدىن الا اقپارات بويىنشا اقتاۋ ماڭىنداعى ۇشاق اپاتىنان ءتىرى قالعان قازاقستاندىقتار جوق.

اۆتور

داۋلەت ىزتىلەۋ