قازاق حالقىنا سالت-ءداستۇرى مەن ءتىلىن مەڭگەرۋ ارقىلى دا العىس ايتۋعا بولادى - ق ح ا كەڭەسىنىڭ مۇشەسى
استانا. KAZINFORM - استاناداعى بەيبىتشىلىك جانە كەلىسىم سارايىنا العىس ايتۋ كۇنى مەن قازاقستان حالقى اسسامبلەياسىنىڭ 30 جىلدىعىنىڭ رەسمي اشىلۋىنا جينالعان ءتۇرلى ەتنوستىڭ وكىلدەرى ايتۋلى كۇننىڭ ءمانى مەن ماڭىزى تۋرالى پايىمىن ورتاعا سالدى. سول جىلى لەبىزدەردى ىقشامداپ، وقىرمان نازارىنا ۇسىنامىز.
حاسان شاريپوۆ، ق ح ا وزبەك ەتنومادەني بىرلەستىگىنىڭ ءتوراعاسىنىڭ ورىنباسارى:
- 30 جىل ىشىندە ءبىز جاستارعا ۇلگى بولاتىنداي ءبىراز دۇنيەگە كۋا بولىپ كەلەمىز. بىرلىك پەن تاتۋلىق بولعاندا عانا ەكونوميكامىزدىڭ داميتىنىن ۋاقىت كورسەتىپ وتىر. ءبارىمىز ءبىر وتباسى بولىپ قازاقستاندا تۇرىپ جاتىرمىز. بۇگىن تاڭەرتەڭ تۇرا سالىپ اۋەلى وتباسىما العىس ايتتىم. ال وسى شارانى پايدالانىپ، قازاقستان حالقىنا، اعا بۋىنعا العىس ايتقىم كەلەدى. العىسىمىز شەكسىز.
يرينا ميكاەليان، ارميان ەتنومادەني بىرلەستىكتەرى قاۋىمداستىعىنىڭ ءتورايىمى:
- كوكتەمنىڭ العىشقى كۇنىن ءبىر- بىرىمىزگە العىس ايتۋدان باستايمىز. بۇل العىس ايتۋدىڭ تامىرى تەرەڭدە جاتىر. ساياسي قۋعىن-سۇرگىن كەزىندە كوپتەگەن ەتنوستار قازاقستانعا قونىس اۋدارىلدى. سول كەزدە قازاق حالقى ءۇيسىز قالعاندارعا پانا بولدى، اش قالعاندارعا اۋزىنداعى اسىن ءبولىپ بەردى. قازاق حالقىنىڭ وسى مەيىرىمىنە العىس ايتاتىن ءبىر كۇننىڭ بەلگىلەنۋى وسى تۇرعىدان قيسىندى. قازىر قازاقستاندا 18 مىڭ ارميان ەتنوسىنىڭ وكىلى تۇرىپ جاتىر. ازاماتتىعى جوق بولسا دا تۇراقتى مەكەن ەتىپ جاتقان قانداستارىمىز بار. قۋعىن-سۇرگىن اياقتالعاننان كەيىن قىزمەت بابىمەن، ساياحاتتاپ كەلىپ تە وسى ەلدە قالىپ قويعان ارمياندار بار. مۇنىڭ ءبارى قازاقستان بەيبىت، تاتۋلىق ورناعان وتان ەكەنىن كورسەتەدى.
ەۆگەني بولگەرت، سەنات دەپۋتاتى:
- بۇل كۇننىڭ اۋەلى تاريحي ءمانى بار. ياعني وزگە ەتنوس وكىلدەرى قازاق حالقىنا قيىن جىلداردا كومەك قولىن سوزعانى ءۇشىن تاعى ءبىر رەت العىس ايتۋعا مۇمكىندىك الامىز. قازاقستانداعى نەمىس ەتنومادەني بىرلەستىگىنىڭ باسشىسى رەتىندە قازاق حالقىنا دەگەن ريزاشىلىق پەيىلىمىز ۇرپاقتان-ۇرپاققا بەرىلىپ كەلە جاتقانىن ايتار ەدىم. نەمىستەردى دەپورتاتسيالاعان قيىن جىلداردا قازاق حالقىنىڭ قامقورلىعىن ءبىزدىڭ اعا بۋىن جان-تانىمەن سەزىندى. بۇل كۇننىڭ ەكىنشى ءمانى جانىمىزداعى جاقىندارىمىزعا، وسى ەلدىڭ دامۋىنا ءوز ىسىمەن ۇلەس قوسىپ جۇرگەن ءاربىر ادال ازاماتقا العىس ايتۋدا دەپ ويلايمىن. بيىل جۇمىسشى ماماندىقتار جىلى بولىپ جاريالاندى. سوندىقتان مەن وسى كۇنى ءوندىرىس پەن شارۋاشىلىقتا اۋىر ەڭبەكپەن ەلدىڭ دامۋىنا ۇلەس قوسىپ جۇرگەن جۇمىسشى وتانداستارىمىزعا العىس ايتامىن.
اكبارجون يسمايلوۆ، قحا كەڭەسىنىڭ مۇشەسى، قازاقستانداعى رەسپۋبليكالىق تاجىك ەتنومادەني بىرلەستىگىنىڭ ءتوراعاسى:
- كەزىندە قازاق جەرىنە 130-دان استام ەتنوس وكىلدەرى قونىس اۋدارعاندا جەرگىلىكتى تۇرعىندار قولىندا بارىن ءبولىسىپ، ەرەكشە مەيىرىم تانىتتى. سول مەيىرىمنىڭ ارقاسىندا امان قالعان بۋىننىڭ ۇرپاعى ءبىزبىز. جالپى قازاق حالقىنا كۇندە العىس ايتساق تا ازدىق ەتەدى. العىستى سوزبەن عانا ەمەس ىسپەن، قازاقتىڭ سالت-ءداستۇرىن، مەملەكەتتىك ءتىلىن مەڭگەرۋ ارقىلى ءبىلدىرۋ كەرەك دەپ ەسەپتەيمىن. ءوز باسىم شەتەلدە ءبىلىم الىپ جۇرگەن كەزدە قانداي دا ءبىر ءىس-شارا، كورمە وتسە قازاقتىڭ شاپانىن كيىپ، قازاق حالقىنىڭ باي مادەنيەتىن ناسيحاتتاپ ءجۇردىم. سول باعىتتاعى جۇمىستى قازىر قازاقستاندا جالعاستىرىپ ءجۇرمىن دەپ ويلايمىن. بۇگىن ەڭ ءبىرىنشى اكە-شەشەمە العىس ايتتىم. ال قازىر بۇكىل قازاق حالقىنا تاجىك ەتنومادەني بىرلەستىگىنىڭ اتىنان العىس ايتامىن.
ايتا كەتۋ كەرەك، قازاقستان حالقى اسسامبلەياسىنىڭ قۇرىلعانىنا 30 -جىل تولىپ وتىر.
اۆتور
ەسىمجان ناقتىباي
