قازاق حالقىنا ءبىر كۇن عانا ەمەس، ماڭگىلىك العىس ايتىپ وتەمىز - فاريد ايۋپوۆ
تۇركىستان. KAZINFORM - «قازاقستاندىق تاتار جانە باشقۇرتتار كونگرەسى» رەسپۋبليكالىق قوعامدىق بىرلەستىگى تۇركىستان وبلىسى بويىنشا فيليالىنىڭ ءتوراعاسى فاريت ايۋپوۆ «العىس ايتۋ» كۇنى مەرەكەسى ءبىر كۇنمەن شەكتەلمەۋى كەرەكتىگىن ايتتى.
«مەنىڭ ويىمشا، بۇل - تاماشا مەرەكە. سوناۋ اۋمالى-توكپەلى زاماندا ءتۇرلى ۇلت وكىلدەرى قازاقستانعا جەر اۋدارىلدى. سول كەزدە وزگە دەپ وگەيسىنبەي، وزەكتەن تەپپەي، باۋىرمالدىق كورسەتكەن قازاق حالقىنىڭ كەڭپەيىلدىلىگىن بابالارىمىز جىر ەتىپ ايتاتىن. سوندىقتان قازاق حالقىنا ءبىر كۇن عانا ەمەس، ماڭگىلىك العىس ايتىپ وتەمىز. سەبەبى، جاقسىلىقتى باعالاي بىلۋگە، وعان جاقسىلىقپەن جاۋاپ قايتارۋعا ءتيىسپىز. مۇنىڭ ءوزى ءوزارا سىيلاستىق پەن قۇرمەتكە جەتەلەيدى» - دەيدى فاريت ايۋپوۆ.
سونداي-اق، فاريد عالىم ۇلى وزدەرى قينالىپ وتىرسا دا، تاعدىردىڭ تالكەگىمەن جەر اۋىپ كەلگەن مىڭداعان ادامدى امان الىپ قالعان قازاقتاردىڭ سول ءبىر رۋحاني ەرلىگى ەشقاشان دا ۇمىتىلمايتىندىعىن جەتكىزدى. مەرەكەمەن كوپشىلىكتى قۇتتىقتاپ، قازاق حالقىنا العىس ايتتى.
«بۇگىنگى كۇنى قازاقستان حالقى تاتۋ-ءتاتتى، بىرلىكتە، ىنتىماقتا تىرشىلىك ەتۋدە. جەر اۋدارىلعان ادامداردىڭ وزدەرى دە، بۇگىنگى ۇرپاقتارى دا قازاقستاندى وتانىمىز دەپ سانادى. وسىندا ءوسىپ-ءونىپ، ەل دامۋىنا وزىندىك ۇلەستەرىن قوسىپ كەلەدى. ەلدىڭ تۇراقتىلىعى مەن بىرلىگىن نىعايتۋعا ۇلەس - وزدەرىنە قۇتتى قونىس بولا بىلگەن ەلگە دەگەن قۇرمەت دەپ بىلەمىن. العىس ايتۋ كۇنى ادامداردى جاقىنداستىرىپ، سىيلاستىقتى ارتتىرادى. بۇل - تالاسسىز شىندىق. سوندىقتان بۇگىنگى مەرەكەدە قازاق حالقىنا العىس ايتا وتىرىپ، بارشا قازاقستاندىقتى وسى مەرەيلى مەرەكەمەن قۇتتىقتايمىن» - دەدى ول.
