ايدا بالايەۆا: «قازاق فيلم» توڭىرەگىندەگى نەگىزسىز قاۋەسەت توقتاتىلۋى كەرەك

استانا. KAZINFORM - مادەنيەت جانە اقپارات ءمينيسترى ايدا بالايەۆا «قازاق فيلم» كينوستۋدياسىنا قاتىستى پىكىر ءبىلدىردى.

- كەيىنگى ۋاقىتتا «قازاق فيلم» كينوستۋدياسى قوعامدا قىزۋ تالقىعا ءتۇسىپ، ءتۇرلى قاۋەسەتتەر مەن جورامالدار ايتىلىپ جاتىر. جۇرتشىلىقتىڭ «قازاق فيلمنىڭ» تاعدىرىنا وسىنشا الاڭداۋشىلىق ءبىلدىرىپ وتىرعانى قۋانتادى. سوندىقتان قوعامداعى وسى الاڭداۋشىلىققا سەبەپ بولىپ وتىرعان ماسەلەلەرگە قاتىستى تۇسىنىكتەمە بەرۋدى ءجون دەپ سانايمىن، - دەپ جازدى مينيستر الەۋمەتتىك جەلىدەگى پاراقشاسىنا.

ايدا بالايەۆا «قازاق فيلم» جەرىنىڭ ساتىلۋى جونىندەگى قاۋەسەت ءبىرجولا توقتاتىلۋى ءتيىس ەكەنىن اتاپ ءوتتى.

- ەڭ الدىمەن ايتارىم، كينو سالاسىنا قاتىسى بار تۇلعالاردىڭ كينوستۋديا توڭىرەگىندەگى پروتسەستەرگە قاتىستى ءوز پىكىرىن بىلدىرۋگە قۇقىعى بار. الايدا اقپارات تاراتقاندا تەك فاكتىلەرگە سۇيەنۋگە كەڭەس بەرەمىن. «زاڭ مەن ءتارتىپ» قاعيداتى بارشاعا ورتاق، ال ونى ەلەمەۋ ءتيىستى زاڭ اياسىندا جاۋاپكەرشىلىككە اكەلىپ سوعادى. ءبىرىنشى. «قازاق فيلم» جەرىنىڭ ساتىلۋى جونىندەگى اقپاراتقا قاتىستى. بۇل ماسەلە توڭىرەگىندەگى نەگىزسىز قاۋەسەت ءبىرجولا توقتاتىلۋى ءتيىس. «قازاق فيلمگە» تيەسىلى جەرلەر كينوستۋديا يەلىگىندە قالا بەرەدى. جەر ساتىلعان جوق جانە تەك كينەماتوگرافيا مۇددەسى ءۇشىن پايدالانىلىپ وتىر، - دەدى ول.

مينيستر كينوستۋديانى استاناعا كوشىرۋ بۇل دا الىپ-قاشپا اڭگىمە ەكەنىن اتاپ ءوتتى.

- ەكىنشى. كينوستۋديانى جوندەۋگە قوماقتى قارجى سالۋعا دايىن ينۆەستورلاردىڭ بار ەكەنى جايلى. بۇل اقپارات قوعامدا كەڭ تاراپ ءجۇر، الايدا مۇنداي مالىمدەمەلەردى قۇجاتتارمەن نەمەسە ناقتى كەپىلدىكتەرمەن راستاي المايتىن ادامدار جاساپ وتىر. مەملەكەت، ياعني مادەنيەت جانە اقپارات مينيسترلىگى ناقتى ينۆەستورلارمەن جۇمىس ىستەۋگە دايىن. دەگەنمەن ازىرگە ەشقانداي ناقتى ۇسىنىس، بىردە-ءبىر كەپىلدىك حاتى جوق. بارلىعى تەك اڭگىمە دەڭگەيىندە.

ءۇشىنشى. كينوستۋديانى استاناعا كوشىرۋ تۋرالى. بۇل دا ەشقانداي نەگىزى جوق قاۋەسەت. قازىرگى ۋاقىتتا ەلورداعا «قازاق انيماتسيا» شىعارماشىلىق بىرلەستىگىن كوشىرۋ مۇمكىندىگى قاراستىرىلىپ جاتىر. مۇندا ماڭىزدى جايت - «قازاق انيماتسيا» وندىرىستىك بازا ەمەس، انيماتسيالىق كونتەنت جاساۋعا تاپسىرىستاردى بولەتىن قۇرىلىم. سوندىقتان ونىڭ استاناعا كوشۋى سالانىڭ جۇمىسىنا ەش كەدەرگى كەلتىرمەيدى، - دەدى بالايەۆا.

ايدا بالايەۆا بەس جىلدا ەلىمىزدە ساپالى انيماتسيالىق فيلمدەر تۇسىرىلمەگەنىن ايتتى.

- وكىنىشكە قاراي، كەيىنگى بەس جىلدا ەلىمىزدە ساپالى انيماتسيالىق فيلمدەر تۇسىرىلگەن جوق. وسىعان بايلانىستى انيماتسيالىق يندۋستريانى كرەاتيۆتى يندۋستريالار قورىنىڭ اياسىندا دامىتۋ ورىندى بولماق. قور قۇرىلىمىندا انيماتسيانى دامىتۋعا باعىتتالعان كرەاتيۆتى حاب جاساقتالۋدا، - دەدى ايدا بالايەۆا.

ول «قازاق فيلم» - جاي عانا كينوستۋديا ەمەس، بۇل - قازاق مادەنيەتىنىڭ سيمۆولى ەكەنىن اتاپ ءوتتى.

- قۇرمەتتى دوستار، بۇگىندە قازاقستاندىق كينويندۋستريادا ماڭىزدى ءارى وڭ وزگەرىستەر ورىن الۋدا. «قازاق فيلم» - جاي عانا كينوستۋديا ەمەس، بۇل - قازاق مادەنيەتىنىڭ سيمۆولى. سوندىقتان ونى دامىتۋ - باسىم باعىتتىڭ ءبىرى. پرەزيدەنت قول قويعان جاڭا زاڭعا سايكەس ەلىمىزدە فيلمدەردى قارجىلاندىرۋدىڭ جالپى كولەمىنىڭ كەمىندە %30 ى جىل سايىن تىكەلەي «قازاق فيلمگە» باعىتتالاتىن بولادى. بۇل كينوستۋديا جۇمىسىنىڭ تيىمدىلىگى مەن قارجىلىق تۇراقتىلىعىن ارتتىرادى، - دەدى ول.

سونداي-اق مەملەكەتتىك قولداۋعا يە بولاتىن كينوجوبالاردى ىرىكتەۋدىڭ جاڭا ەرەجەلەرى بەكىتىلدى. بيىل جاڭا ەرەجەلەر بويىنشا كونكۋرس ەكىنشى رەت وتكىزىلىپ وتىر.

- كينوستۋديانى حالىقارالىق ىنتىماقتاستىقسىز دامىتۋ مۇمكىن ەمەس. «قازاق فيلم» شەتەلدىك ارىپتەستەرىمەن بىرلەسىپ ءبىرقاتار ماڭىزدى فيلمدەر ءتۇسىرۋدى جوسپارلاپ وتىر. بۇل - قازاقستاندىق كينونى الەمدىك نارىقتا تانىتۋ جانە وتاندىق كينەماتوگرافيستەردىڭ پوزيتسياسىن نىعايتۋ ءۇشىن ماڭىزدى قادام.

سونىمەن قاتار، دەمەۋشىلەردى تارتۋدىڭ ارقاسىندا كينوستۋديادا سوڭعى 15 جىلدا جۇرگىزىلمەگەن جوندەۋ جۇمىستارى باستالدى. بۇل - ينفراقۇرىلىمدى جاڭعىرتۋدىڭ العاشقى كەزەڭى. وسى ورايدا كينوستۋديا مەن قازاقستاندىق كينووندىرىستىڭ دامۋىنا ۇلەس قوسىپ جۇرگەن جاندارعا العىس بىلدىرەمىن! ارينە، اڭگىمە ازىرگە كۇردەلى جوندەۋ تۋرالى ەمەس، ءبىراق بۇل - «قازاق فيلمدە» جۇمىس ىستەۋ ءۇشىن قالىپتى جاعداي جاساۋعا باعىتتالعان ناقتى قادامدار، - دەدى ول.

مينيستر «قازاق فيلمنىڭ» تۇراقتى ءارى ءتيىمدى دامۋىن قامتاماسىز ەتۋ ءۇشىن جان-جاقتى قولداۋ كورسەتىلەتىنىن ايتتى.

- اتاپ ايتقىم كەلەتىنى، «قازاق فيلم» تەك كينوتۋىندىلار عانا ەمەس، ەڭ الدىمەن - شارۋاشىلىق جۇرگىزۋشى كومپانيا جانە باسەكەگە قابىلەتتى نارىق قاتىسۋشىسى. ول جوعارى كاسىبي كينوونەردىڭ دامۋىنا لايىقتى جاعداي جاسايدى. سوندىقتان مينيسترلىك بۇل كاسىپورىندى رەجيسسەر نەمەسە اكتەر ەمەس، كينوستۋديا قىزمەتىن تابىستى ءارى ءتيىمدى جۇرگىزۋگە قابىلەتتى كاسىبي مەنەدجەر باسقارۋى ءتيىس دەگەن قاعيدانى بەرىك ۇستانادى. «قازاق فيلمنىڭ» تۇراقتى ءارى ءتيىمدى دامۋىن قامتاماسىز ەتۋ ءۇشىن مينيسترلىك جان-جاقتى قولداۋ كورسەتۋدى جالعاستىرا بەرەدى، - دەدى ول.

ايتا كەتەلىك ايدا بالايەۆا «قازاق فيلم» ۇلتتىق كينونى قولداۋ ورتالىعىنىڭ قاراجاتىنا قول جايمايدى دەگەن ەدى.

اۆتور

نازىم بولەسوۆا