قازاق فيلم «التىن ادام» انيماتورلارىنىڭ جالاقىسىن تولەپ بەرەدى
الماتى. KAZINFORM - ۇلتتىق كينونى قولداۋ مەملەكەتتىك ورتالىعى ش. ايمانوۆ اتىنداعى «قازاق فيلم» ۇلتتىق كينوستۋدياسى انيماتورلارىنىڭ «التىن ادام» انيماتسيالىق فيلمىنە قاتىستى نارازىلىعىنا رەسمي جاۋاپ بەردى.
ورتالىقتىڭ مالىمەتىنشە، اتالعان انيماتسيالىق جوبا قازاق ءۇشىن قادىرلى «التىن ادامنىڭ» رۋحاني ماڭىزىن اشىپ كورسەتۋدى ماقسات ەتكەن.
جوبا 2020 -جىلى ۇسىنىلىپ، باستالعان. جالپى قۇنى - 378 ميلليون تەڭگە. كەلىسىمشارت بويىنشا كينوجوبا 2021 -جىلى اياقتالۋى ءتيىس بولاتىن.
ءبىراق ورىنداۋشى مىندەتتەمەلەردىڭ ۇدەسىنەن شىقپاي، جۇمىستى تولىق اياقتامادى جانە فيلمدى بەلگىلەنگەن ۋاقىتتا وتكىزبەگەن.
وسىلايشا جوبانى جۇزەگە اسىرۋ مەرزىمى جوسپارلانعان 2020-2021 ەمەس، 2020-2023 -جىلدار ارالىعىندا سوزىلدى. مەرزىمى ۇزارعاننان كەيىن جوبا 2023 -جىلى ناقتى ءارى تولىققاندى اياقتالۋى ءتيىس بولاتىن.
«الايدا، 2023 -جىلدىڭ سوڭىندا دا ورىنداۋشى ساراپتاما كەڭەسى ەنگىزگەن 126 ەسكەرتۋدى ەلەمەگەنى انىقتالدى. وسىعان بايلانىستى «ۇلتتىق كينونى قولداۋ مەملەكەتتىك ورتالىعى» قالىپتاسقان جاعدايدى نازارعا الا وتىرىپ، جوبانىڭ ءۇش جىلعا دەيىن سوزبالاڭعا سالىنۋى تۋراسىندا ءبىر توقتامعا كەلۋى ءتيىس بولدى. ورىنداۋشىعا اتقارىلعان جۇمىس ءۇشىن جالپى قۇنى 294 ميلليون تەڭگە تولەندى. الايدا قولدانىستاعى زاڭناماعا سايكەس، اياقتالماعان جوبالارعا مەملەكەت قارجى بولۋگە قاۋقارسىز ەكەنىن ايتا كەتكەن ءجون. وسىعان بايلانىستى قالعان 84 ميلليون تەڭگە رەسپۋبليكالىق بيۋدجەتكە قايتارىلدى. سونداي-اق، 2023 -جىلدىڭ سوڭىندا انيماتسيالىق جوبا تاپسىرىلماعاندىقتان «ۇلتتىق كينونى قولداۋ مەملەكەتتىك ورتالىعى» سوتقا شاعىم تۇسىرۋگە ءماجبۇر بولدى» دەيدى ورتالىقتان.
ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى ق. جۇماعالي الەۋمەتتىك جەلىدەگى پوستىندا بۇل ماسەلەگە پىكىر بىلدىرگەن بولاتىن.
«قازاق فيلم» تىزگىنىندەگى ازامات ساتىبالدىمەن ءبىر اي بۇرىن اتقارۋشىلىق ءىس جۇرگىزۋ شەڭبەرىندە مەدياتيۆتىك كەلىسىم جاساۋعا ۋاعدالاستىق» دەدى ول جازباسىندا.
ەندىگى كەزەكتە «قازاق فيلمنىڭ» جوباعا جاۋاپتى ۇجىمى فيلمدى ءوزارا كەلىسىم ارقىلى اياقتاپ، «التىن ادام» انيماتسيالىق فيلمىن پروكاتقا شىعارادى.
ودان تۇسكەن تازا تابىستىڭ %20 ى كينو ورتالىعىنا اۋدارىلسا، قالعان %80 ى «قازاق فيلمنىڭ» ۇلەسىندە قالادى.
وسىلايشا «قازاق فيلم» ۇلتتىق كينوستۋدياسى اتالعان جوبانىڭ ءتۇسىرىلىم توبى الدىنداعى بەرەشەگىن وتەيدى.
«ايتا كەتۋ قاجەت، مەملەكەتتىك قارجىلاندىرۋدى ۇسىناتىن ءبىرىڭعاي وپەراتور رەتىندەگى ۇ ك ق م و قىزمەتى ۇلتتىق كينەماتوگرافيانى قارجىلاي قولداۋعا جانە ۇ ك ق م و جارعىسىنا سايكەس، ونىمدەردىڭ ساپالى شىعۋى مەن بولىنگەن قارجىنىڭ ماقساتتى جۇمسالۋىن قاداعالاۋعا قۇرىلعان. وسىعان بايلانىستى بارلىق ساۋالدار قۇقىقتىق نەگىزدە جانە قازاقستان زاڭناماسىنا ساي شەشىمىن تابادى» دەيدى مەكەمەدەن.
ەسكە سالا كەتەيىك، «التىن ادام» تۋىندىسىنىڭ انيماتورلارى جەتى ايدان بەرى جالاقى الماعانىن ايتىپ، قازاق فيلم عيماراتىنىڭ الدىندا نارازىلىققا شىققان بولاتىن.
