قازاق شارۋالارىنىڭ قۇرىلتايى ءوتىپ جاتىر
استانا. KAZINFORM - استانادا «ازىق- تۇلىك قاۋىپسىزدىگى» اتتى قازاق شارۋالارىنىڭ قۇرىلتايى ءوتىپ جاتىر.
وسىمەن ءۇشىنشى رەت ۇيىمداستىرىلعان قۇرىلتايدا اۋىل شارۋاشىلىعى سالاسىنداعى ماسەلەلەر جان-جاقتى تالقىلانىپ جاتىر.
قۇرىلتايعا ەلىمىزدىڭ تۇكپىر-تۇكپىرىنەن، شالعاي اۋىلداردان 300 گە جۋىق شارۋا قاتىسىپ جاتىر. «شوپان اتا» ۇلتتىق اگرو-قوزعالىسىنىڭ ءتوراعاسى الماسبەك سادىربايەۆ ءوز بايانداماسىندا قوزعالىستىڭ جۇيەلى جۇمىسى كوپتەگەن شارۋانىڭ پروبلەماسىن شەشۋگە مۇمكىندىك بەرگەنىن ايتتى.
«كوبى «شوپان اتا» نە تىندىرىپ جاتىر، ايتەۋىر شۋلاتاسىڭدار دا جۇرسىڭدەر دەپ سۇراپ جاتادى. وسى ۋاقىتقا دەيىن قوزعالىس ماڭعىستاۋداعى قۋاڭشىلىقتان باستاپ 40 قا جۋىق ماسەلەنى شەشۋگە اتسالىستى. بيلىكتىڭ نازارىن اۋدارتا ءبىلدى. بۇعان دەيىن تۇركىستان وبلىسىنىڭ اۋىل شارۋاشىلىعى سالاسىنا جىلىنا 2 ميلليارد تەڭگە قارجى بولىنەتىن. قازىر 8 ميلليارد تەڭگە قاراجات قاراستىرىلعان. سەبەبى، ءبىز ماسەلەنى كورسەتتىك، تالداپ بەردىك، شەشۋ جولىن كورسەتتىك. ءالى دە اتقارىلار شارۋا شاش- تەكتەن. ونى مەملەكەتتىك ورگاندارمەن بىرلەسە شەشۋ ماڭىزدى»، - دەدى ا. سادىربايەۆ.
قۇرىلتاي بارىسىندا «شاڭىراق» ۇلتتىق اگرو- قوزعالىسى» رەسپۋبليكالىق قوعامدىق بىرلەستىگىنىڭ تانىستىرىلىمى بولدى. بىرلەستىك قازاقستاننىڭ جىلقى وسىرۋشىلەر وداعى قاۋىمداستىعىمەن، قازاقستان سۋ سالاسىنىڭ ۇلتتىق قاۋىمداستىعىمەن، فەرمەرلىك جىلىجايلار قاۋىمداستىعىمەن، تۇركىستان وبلىسىنىڭ شارۋاشىلىق ءونىمىن وندىرۋشىلەر قاۋىمداستىعىمەن، «جەتىسۋ» قوي شارۋالارىنىڭ ايماقتىق قاۋىمداستىعىمەن، ق ر اۋىل شارۋاشىلىعى وندىرىستىك كووپەراتيۆتەرىنىڭ قاۋىمداستىعىمەن، فەرمەر. ك ز قوعامدىق بىرلەستىگىمەن مەموراندۋمعا قول قويدى.
مەموراندۋم ماقساتى - اگروسالاداعى قوعامدىق ۇيىمداردى بىرىكتىرۋ. ازىرگە بىرلەستىك قۇرامىنا 20 دان استام ۇيىمدار كىرىپ وتىر. بىرلەستىك ازىق-تۇلىك قاۋىپسىزدىگى بويىنشا لوببيزمگە جول بەرمەي، ەل مۇددەسىن العا قويۋدى ماقسات ەتۋدە.
اۆتور
ورالحان قوجانوۆ
