قازاق دۋبلياجى مەكتەبىن اشۋعا ۇسىنىس بار - راۋان كەنجەحان ۇلى
استانا. KAZINFORM - حالىقارالىق «قازاق ءتىلى» قوعامى» قوعامدىق بىرلەستىگىنىڭ پرەزيدەنتى راۋان كەنجەحان ۇلى اگەنتتىك تىلشىسىمەن قازاق دۋبلياجىنىڭ بۇگىنى جاي-كۇيى تۋرالى تىلدەسكەن ەدى.
- راۋان كەنجەحان ۇلى دۋبلياج جاساۋدىڭ باستى تالاپتارى قانداي؟
- ستۋديالاردان قازاق دۋبلياجى مەكتەبىن قۇرايىق دەگەن ۇسىنىس بار، قازىر تالقىلانىپ جاتىر. سالانىڭ قىر-سىرىن بىلەتىن مامانداردى دايارلاۋ وزەكتى ماسەلە. دۋبلياج جاساۋ وڭاي سياقتى، ءبىراق ءتۇپنۇسقا تىلدە ايتىلعان ءسوزدى اۋدارۋداعى دالمە-دالدىك، دىبىستىڭ ەستىلۋى مەن ايتىلۋى، ەرىننىڭ جىبىرلاۋى جوعارى بىلىكتىلىكتى تالاپ ەتەدى»، - دەدى راۋان كەنجەحان ۇلى اگەنتتىك تىلشىسىنە سۇحبات بەرە تۇرىپ.
- بۇگىنگى قازاق دۋبلياجىنىڭ بەت الىسى قالاي؟
- مەنىڭ ويىمشا، قازاقستاندا تەلەۆيزيالىق دۋبلياج كوپ، الدەقايدا ىلگەرى كەتكەن، ويتكەنى كورەيانىڭ، تۇركيانىڭ تەلەسەريالدارىنىڭ اۋدارماسى ءجۇرىپ جاتىر. ابدەن ماشىقتانعان، ۇيرەنگەن توپتار پايدا بولدى. وسىنداي جۇمىستار كوبەيگەن سايىن ونىڭ ساپاسى دا ارتا تۇسەدى. بۇل شىعارماشىلىق سالا سوندىقتان ونىڭ شەگى جوق، جەتىلدىرە بەرۋگە بولادى.
- قازاق تىلىندە دۋبلياجدالعان الەمدىك كينو پرەمەرالاردىڭ كورەرمەندەرى از ەمەس پە؟ ونى قالاي كوبەيتۋگە بولادى؟
- كينوتەاترلار زالدىڭ كورەرمەنگە تولعانىنا ءمان بەرەدى. سەانسقا بيلەت ساتىلماسا، ادام كەلمەسە ول فيلم قولايلى ۋاقىتقا قويىلمايدى، سوندىقتان الدىمەن سىناقتان وتەدى. بۇل جەردە كينوتەاترعا وكپە ايتپاي، قولىن قايىرماعان ءجون. ويتكەنى، بۇل كاسىپ، ونىڭ ەسەبى بار. بۇل ماسەلەنى شەشۋدىڭ امالى - قازاق تىلىندە دۋبلياجدالعان فيلمدى كورۋدى وزىمىزدەن باستاپ، بەلسەندىلىك تانىتۋ كەرەك. مىسالى «وي جۇمباق» مۋلتفيلمى قازاق تىلىندە شىققاندا كۇمان بولدى، ءبىراق ەكىنشى اپتادا كورەرمەندەر لەگى ەكى ەسە ارتتى. سەبەبى كينوتەاترلار قازاق تىلىندەگى فيلمدەرگە سۇرانىس بارىن، بيلەتتەر ساتىلىپ جاتقانىن كوردى، سايكەسىنشە سەانستى كوبەيتتى، ءتىپتى، بيلەت تاپپاي قالعان جاعداي بولدى.
- قازاق دۋبلياجى ماماندارىنىڭ كاسىبي دەڭگەيى قانداي؟ ساپا سىن كوتەرە مە؟
- الەمدىك پرەمەرالاردى اۋدارۋعا كوپتەگەن مامان تارتىلادى. ونىڭ ىشىندە ءتىل جانە مەديا ماماندارى، كاسىبيلىك جاعىنان كۇمان بولماۋى كەرەك، ويتكەنى الەمدىك ستۋديالاردىڭ تالابى وتە جوعارى، كەزدەيسوقتىق جوق. ونىڭ ىشىندە تاجىريبەگە، تەحنيكالىق جابدىققا جانە ساپاعا ەرەكشە ءمان بەرەدى. رولدەردى دۋبلياجداۋعا كەلسەك، الدىمەن كاستينگ جۇرەدى، ول جەردە ۇزدىكتىڭ ۇزدىگى تاڭدالادى. بىزدە قازاق تىلىندە دۋبلياج جاسايتىن داۋىس يەلەرى، ياعني ماماندار جەتكىلىكتى.
- اڭگىمەڭىزگە راقمەت!
اۆتور
داۋلەت ىزتىلەۋ
