قازاق ءتىلىن جەتىك ءبىل: تەستىلەۋ ەرەجەسى ازىرلەندى

استانا. KAZINFORM - ءتىل ساياساتى كوميتەتى «قازاق ءتىلىن مەڭگەرۋ دەڭگەيىن باعالاۋدىڭ قازتەست جۇيەسى قاعيدالارىن بەكىتۋ تۋرالى» بۇيرىعىن ازىرلەدى.

قانداي دا ءبىر مەملەكەتتىك مەكەمەدە، كەز كەلگەن ۇيىمدا مەملەكەتتىك ءتىلدىڭ كەڭىنەن قولدانىلۋى، ناسيحاتتالۋى تىكەلەي سول مەكەمەنى باسقارىپ وتىرعان باسشىنىڭ قويعان تالابىنا بايلانىستى ەكەنى انىق.

سونىمەن، تەستىلەۋ ەرەجەسىندە قانداي ەرەجەلەر قامتىلعان؟

قازتەست جۇيەسى نەگىزىندەگى تەستىلەۋدى ق ر عىلىم جانە جوعارى ءبىلىم مينيسترلىگىنىڭ «ۇلتتىق تەستىلەۋ ورتالىعى» مەملەكەتتىك كاسىپورنى جۇزەگە اسىراتىنىن اتاپ وتكەن ءجون.

قازتەست تەستىلەۋدىڭ ەكى تۇرىنەن تۇرادى: دياگنوستيكالىق جانە سەرتيفيكاتتاۋ. تەستىلەۋ قاعاز نەمەسە ەلەكتروندى فورماتتا جۇرگىزىلەدى.

دياگنوستيكالىق تەستىلەۋ ۋاقىتى - 1 ساعات 10 مينۋت (70 مينۋت). سەرتيفيكاتتاۋ تەستىلەۋ ۋاقىتى - 2 ساعات 7 مينۋت (127 مينۋت).

استانا قالاسىندا جەكە تۇلعالار ءۇشىن تەستىلەۋدىڭ وتەتىن ورنىن ۇلتتىق تەستىلەۋ ورتالىعى انىقتايدى. زاڭدى تۇلعالار تەستىلەۋ زالدارى بولعان جاعدايدا شاقىرۋشى تاراپتىڭ عيماراتىندا سىناقتان وتەدى. ال وبلىس ورتالىقتارىندا جانە رەسپۋبليكالىق ماڭىزى بار قالالاردا تاپسىرىس بەرۋشىنىڭ مەكەمەسىندە جۇرگىزىلەدى.

تەستىلەۋگە وتىنىمدەر تومەندەگى تەتىكتەر ارقىلى قابىلدانادى:

- kazakhtest.kz سايتى (جەكە تۇلعالار ءۇشىن)؛

- ورتالىقتىڭ كەڭسەسى (زاڭدى تۇلعالار ءۇشىن).

تەستىلەۋ زالىنا جەكە تۇلعالار ءوتىنىش جانە جەكە باسىن كۋالاندىراتىن قۇجات نەگىزىندە جىبەرىلەدى. سونىمەن قاتار، تولەم جاسالعان جاعدايدا جەكە تۇلعالار ونلاين تولەم جاساۋ كەزىندە قىزمەتكە تولەنگەنىن راستايتىن قۇجاتتى (ءتۇپنۇسقانى) ۇسىنادى. تاپسىرىس ءنومىرىن كورسەتە وتىرىپ، تۇبىرتەك كوشىرمەسىن ۇسىنادى.

جالپى، تەستىلەۋدىڭ ەرەجەسىن سىلتەمەگە ءوتىپ، تانىسا الاسىز.

ەلىمىزدە ءتىل ساياساتىن ىسكە اسىرۋدىڭ 2020-2025 -جىلدارعا ارنالعان مەملەكەتتىك باعدارلاماسىنا سايكەس، قازتەست جۇيەسى مەملەكەتتىك ءتىلدى مەڭگەرگەن ەرەسەك تۇرعىنداردىڭ ۇلەسىن ارتتىرۋدىڭ نەگىزگى كورسەتكىشىن ىسكە اسىرۋ تەتىگى رەتىندە قاراستىرىلىپ، مەملەكەتتىك قىزمەتشىلەر مەن مەملەكەتتىك قىزمەت كورسەتەتىن ۇيىم قىزمەتكەرلەرىنە، ۇلتتىق كومپانيالار مەن حولدينگتەردىڭ قىزمەتكەرلەرىنە، «ب» كورپۋسىنىڭ مەملەكەتتىك اكىمشىلىك لاۋازىمىنا ورنالاسۋ ءۇشىن ۇمىتكەرلەرگە قازتەست جۇيەسى بويىنشا تەستىلەۋ وتكىزۋ مىندەتى قويىلىپ وتىر.

وسىعان وراي، مەملەكەتتىك باعدارلامانىڭ مىندەتتەرىن ورىنداۋ ماقساتىندا ورتالىق جانە جەرگىلىكتى ورگاننىڭ، مەملەكەتتىك قىزمەت كورسەتەتىن مەكەمەلەردىڭ قىزمەتكەرلەرى مەن ۇلتتىق كومپانيالار مەن حولدينگتەردىڭ قىزمەتكەرلەرى جىل سايىن قازتەست تەستىلەۋىنەن وتەتىنىن اتاپ وتكەن ءجون.

اۆتور

ورالحان قوجانوۆ