قازاق ءتىلى ستاندارتىن جاساۋ كەرەك - نازگۇل قوجابەك
استانا. KAZINFORM - «كالكاسىز قازاق ءتىلى» جوباسىنىڭ اۆتورى، اۋدارماشى، فيلولوگ نازگۇل قوجابەك Kazinform اگەنتتىگىنىڭ BIZDIر ORTA پودكاسىندا قازاق ءتىلىنىڭ ستاندارتىن ازىرلەۋدى ۇسىندى.
- قازاق ءتىلىنىڭ قازىرگى جاعدايىندا بىزگە بار جاعىنان كەشەندى جۇمىس كەرەك. مەكتەپتەردەگى قازاق ءتىلى ساباعىن جولعا قويۋ، باسقا تىلدە وقىتاتىن مەكتەپتەردەگى قازاق ءتىلىنىڭ جۇمىسىن رەتتەۋ، مۇعالىمدەردى دايارلاۋ، وقىتۋ قاجەت. جالپى ءتىل سالاسىنداعى مامانداردى ءبولىپ وقىتۋ كەرەك، ياعني ءمۇعالىم دەسە، ماماندى سول باعىتتا دايارلاۋ، اۋدارماشى بولامىن دەسە، اۋدارماشىلىقتىڭ مەتوديكاسىن، ءىس-قاعازدارىن جۇرگىزەتىن مامان با سول باعىتتا ماشىقتانۋ قاجەت. بىزدە فيلولوگيانى بىتىرگەن مامان ءبارىن ىستەي الادى دەگەن جاڭساق وي بار. ول مەكتەپكە بارىپ ساباق تا بەرە الادى، اكىمدىككە بارىپ ءىس-قاعازدارىن دا اۋدارا الادى، باسپاعا بارىپ كوركەم ادەبيەتتى دە اۋدارا الادى، مەدياعا بارىپ ماقالادا جازا الاتىن بولادى، - دەدى نازگۇل قوجابەك سۇحباتتاسۋ ساتىندە.
وسى ورايدا ءتىل جاناشىرى قازاق ءتىلىنىڭ ستاندارتى كەرەكتىگىن تىلگە تيەك ەتتى.
- وتە ۇلكەن جۇمىس - ستاندارت. ستاندارتتى قالىپتاستىرساق، ءوز بىلەم عوي دەگەننىڭ جولىن كەسىلەدى. مىسالى، ەل ىشىندە قاتىنايتىن قازاقستاندىق اۋە كومپانيالاردا ۇشار الدىندا ايتاتىن نۇسقاۋلىقتا «بەلدەمشە» ءسوزىن ءارتۇرلى قولدانادى، بولەك، ءبىر-بىرىنە ۇقسامايدى. ال اعىلشىن تىلىندە، ورىس تىلىندە ونىڭ ءبارى ستاندارتپەن بەكىتىلگەن. قازاق تىلىندە ءبىر جەردە «بەلدەمشە»، ەكىنشى جەردە «بەلدىك»، تاعى بىرەۋى «بەلبەۋ» دەپ قولدانادى، - دەيدى مامان.
ايتا كەتسەك، «قازاق ءتىلىنىڭ ۇلتتىق سوزدىك قورى» اقپاراتتىق جۇيەسىن قالىپتاستىرۋ قاعيداسى ازىرلەندى.
سونداي-اق، بيىل كۇزدە قازاق ءتىلىن تەگىن ۇيرەتەتىن جاساندى زەيىن قوسىمشاسى قولدانىسقا بەرىلەدى.
ەسكە سالساق، بيىل بۋرابايدا وتكەن ۇلتتىق قۇرىلتايدا مەملەكەت باسشىسى قازاق تىلىندە تۇسىرىلگەن مۋلتفيلمدەر كوپ بولۋى قاجەتتىگىن ايتتى.
