قازاق ءتىلى مودەلىن جاساۋعا 3 ميلليارد تەڭگە بولىنبەك
استانا. KAZINFORM - عىلىم جانە جوعارى ءبىلىم مينيسترلىگى دەربەس ءتىل مودەلىن ازىرلەۋ باعىتىندا قانداي جۇمىس جۇرگىزىلىپ جاتقانىن ايتتى.
«قازاقستان رەسپۋبليكاسىنىڭ عىلىم جانە جوعارى ءبىلىم مينيسترلىگى «نازاربايەۆ ۋنيۆەرسيتەتى» اقىلدى جۇيەلەر جانە جاساندى ينتەللەكت ينستيتۋتىن تولىققاندى زەرتتەۋ ينستيتۋتىنا ترانسفورماتسيالاۋ جونىندەگى تاپسىرما اياسىندا كەلەسىنى حابارلايدى. مينيسترلىك جاساندى ينتەللەكتىنى دامىتۋعا ارنالعان باعدارلامالىق-نىسانالى قارجىلاندىرۋدى عىلىمي-زەرتتەۋ ينستيتۋتتارىنىڭ، جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ، سونداي-اق جاساندى ينتەللەكت سالاسىنداعى اۆتونومدى ۇيىمداردىڭ قاتىسۋىمەن («ش. شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى» ك ە ا ق، «ا. بايتۇرسىنوۆ اتىنداعى ءتىل ءبىلىمى ينستيتۋتى»، «ءال-فارابي اتىنداعى نازاربايەۆ ۋنيۆەرسيتەتى» ك ە ا ق، «ينستيتۋت اقپاراتتىق جانە ەسەپتەۋ تەحنولوگيالارى» و م ك ش ج ق) كونسورتسيۋمدار بازاسىندا جۇزەگە اسىرۋدى كوزدەپ وتىر»، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.
ۆەدومستۆو مالىمەتىنشە، بيىل ساۋىردە جوعارى عىلىمي-تەحنيكالىق كوميسسيادا بيۋجەتتىك باعدارلامالار اكىمشىلەرىنىڭ باعدارلامالىق-نىسانالى قارجىلاندىرىلۋى بويىنشا 2024-2026-جىلدارعا ارنالعان عىلىمي-تەحنيكالىق تاپسىرمالارىنا قاتىستى ماسەلەلەرى قارالدى.
«باعدارلامالىق-نىسانالى قارجىلاندىرۋ اياسىندا «قازاقستان رەسپۋبليكاسىندا قازاق ءتىلىن مەملەكەتتىك ءتىل جانە مادەنيەتارالىق قارىم-قاتىناس ءتىلى رەتىندە قولداۋعا جاردەمدەسەتىن قازىرگى زامانعى ۇلكەن تىلدىك مودەلدى (LLM) قۇرۋ، تەحنولوگيانى دامىتۋ، دەرەكتەردىڭ قاۋىپسىزدىگىن قامتاماسىز ەتۋ، ءبىلىم بەرۋدى دامىتۋ جانە عىلىمي زەرتتەۋلەردى جەتىلدىرۋ» باعدارلاماسى بويىنشا كونسورتسيۋمدار بازاسىندا كونكۋرس جاريالانادى دەپ كۇتىلەدى. وسى كونكۋرسقا نازاربايەۆ ۋنيۆەرسيتەتى دە قاتىسا الادى. اتالعان باعدارلامانى ىسكە اسىرۋ ءۇشىن 3 جىلعا 3 ميلليارد 92 ميلليون تەڭگە (2024-جىلعا - 1 ميلليارد 92 ميلليون، 2025-جىلعا - 800 ميلليون، 2026-جىلعا - 1 ميلليارد 200 ميلليون تەڭگە) كولەمىندە قاراجات ءبولۋ جوسپارلانىپ وتىر. بولىنگەن قاراجات ج ي- گە جۇمسالادى دەپ كوزدەلگەن»، - دەدى مينيسترلىكتەن.
ايتا كەتەيىك، پرەزيدەنت قاسىم-جومارت توقايەۆ عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا قازاق ءتىلى مودەلىن جاساۋ جۇمىسى قولعا الىنعانىن ايتقان بولاتىن.
