قازاق ءتىلى مەن ادەبيەتى ءپانى مۇعالىمى ايىنا 2 ميلليون تەڭگە تابۋدىڭ سىرىن ايتتى
استانا. قازاقپارات - قازاق ءتىلى مەن ادەبيەتىنەن ساباق بەرەتىن قاراپايىم مۇعالىم الەۋمەتتىك جەلى ارقىلى تابىس تابۋدىڭ سىرىن ءبولىستى.
اققۋ اداسبەكوۆا ەسىمدى قازاق ءتىلى مەن ادەبيەتىنەن ساباق بەرەتىن قاراپايىم مۇعالىم «شەبەر ۇستاز» باعدارلاماسىندا قالاي 2 ميلليون تابىس تاپقانىن ايتىپ بەردى.
«ايلىق تابىسىم 1 ميلليون مەن 2 ميلليوننىڭ اراسىندا دەپ ايتايىن. قاتتى كۇش سالساڭ، ودان دا كوپ اقشا تابۋعا بولادى. ماعان ونلايننىڭ كوپ اسەرى ءتيدى، كوپ مۇمكىندىك بەردى. رۋحاني جانە ماتەريالدىق جاعدايىمدى كوتەرۋگە كومەكتەستى. نەگىزى اقشا تابامىن دەپ كەلمەۋ كەرەك ەكەن. جاسىراتىنى جوق، باسىندا ءبارىمىز سول اقشانىڭ سوڭىنان كەلدىك قوي. ءبىراق ءبارىن ۋىسىمىزدا ۇستاپ تۇرا المايتىنىمىزدى ءتۇسىندىم. ءبىلىمىڭدى جەتىلدىرىپ، باسقا مۇعالىمدەرگە پايدالى بولامىن دەگەن سايىن اقشا وزىنەن-ءوزى كەلە بەرەدى»، - دەدى اققۋ اداسبەكوۆا.
مۇعالىم قازىر ونلاين دا، وفلاين دا تابىس تاۋىپ وتىرعانىن ايتتى.
ايتا كەتەيىك، اققۋ اداسبەكوۆانىڭ Instagram-پاراقشاسىندا 31 مىڭ وقىرمانى بار. ول اۋىلدا قازاق ءتىلى مەن ادەبيەتىنەن ساباق بەرەدى. 12 جىلدىق ەڭبەك تاجىريبەسى بار. 7 جىل ديرەكتوردىڭ وقۋ ءىسى جونىندەگى ورىنباسارى بولىپ جۇمىس ىستەگەن. ونلاين جۇمىس ىستەپ جۇرگەنىنە ەكى جىل بولعان.
