قازاق ءتىلى ءپانىن وقىتۋ ادىستەمەسى وزگەردى

- قازاق ءتىلى پانىنە بولىنگەن ساعات سانى قولدانىستاعى ۇلگىلىك وقۋ جوسپارلارىنا سايكەس جۇرگىزىلەدى. سوندىقتان قازىرگى كەزەڭدە نەگىزگى نازار ءپان ساعاتىن مەحانيكالىق تۇردە كوبەيتۋگە ەمەس، وقۋ باعدارلاماسىنىڭ مازمۇنىن، وقىتۋ ادىستەمەسىن جانە ءار ساباقتىڭ ناتيجەلىلىگىن ارتتىرۋعا باعىتتالعان، - دەپ مالىمدەدى ق ر و ا م.

مينيسترلىكتىڭ حابارلاۋىنشا، 2016 -جىلعا دەيىن قولدانىلعان ءبىلىم بەرۋ ستاندارتتارىندا گرامماتيكالىق بىلىمگە باسىمدىق بەرىلدى. ال قازىرگى باعدارلامالاردا گرامماتيكانى مەڭگەرتۋمەن قاتار وقۋشىلاردىڭ كوممۋنيكاتيۆتىك داعدىلارىن، سويلەۋ مادەنيەتىن، وقۋ جانە جازۋ ساۋاتتىلىعىن دامىتۋعا ەرەكشە ءمان بەرىلەدى. ورفوگرافيا، مورفولوگيا جانە فونەتيكا باعىتتارى دا وقۋ مازمۇنىندا ءتيىستى دەڭگەيدە قامتىلعان.

- قازىرگى ۋاقىتتا 1- 4-سىنىپتارداعى تىلدىك پاندەردىڭ مازمۇنى قايتا قارالىپ، بالانىڭ ءوز ويىن ەركىن جانە جۇيەلى جەتكىزۋىنە، ءماتىندى ءتۇسىنىپ وقۋىنا، تالداۋىنا جانە ساۋاتتى جازۋىنا باعىتتالعان تاپسىرمالار كۇشەيتىلدى. باستاۋىش سىنىپتاردا ەندى بالانىڭ تەك وقۋ جىلدامدىعىنا ەمەس، وقىعان ءماتىنىنىڭ مازمۇنىن تۇسىنۋىنە جانە ونى ءوز سوزىمەن جەتكىزە بىلۋىنە باسىمدىق بەرىلەدى، - دەلىنگەن رەسمي جاۋاپتا.

تولىعىراق ايتقاندا، جازۋ ساۋاتتىلىعىن ارتتىرۋ ماقساتىندا ديكتانت، مازمۇنداما جانە شىعارما ارالىق باقىلاۋ جۇيەسىنە ناقتى تالاپتارىمەن بىرگە ەنگىزىلدى. ولاردىڭ كولەمى، تاقىرىپتارى مەن باعالاۋ ولشەمدەرى ءبىلىم الۋشىلاردىڭ جاس ەرەكشەلىگىنە جانە وقۋ ماقساتتارىنا سايكەس ايقىندالادى.

سونىمەن قاتار مينيسترلىك بەرگەن اقپاراتقا جۇگىنسەك، وقۋ باعدارلامالارىن جەتىلدىرۋ جۇمىستارى كەزەڭ- كەزەڭىمەن جالعاسادى. قازىر 5- 9-سىنىپتارعا ارنالعان باعدارلامالار قايتا قارالىپ جاتىر. بۇل جۇمىس بارىسىندا كوممۋنيكاتيۆتىك ءتاسىلدى، وقۋ ساۋاتتىلىعىن، جازىلىم مەن سىني ويلاۋ داعدىلارىن دامىتۋ باعىتى ساقتالادى.

ودان بولەك، ءبىلىم الۋشىلارعا ۇسىنىلاتىن قوسىمشا كوركەم ادەبيەتتەر مەن شىعارمالار ءتىزىمى قايتا قارالىپ، جاڭادان جاسالادى. مۇنداعى نەگىزگى ماقسات - بالالاردىڭ كىتاپ وقۋعا قىزىعۋشىلىعىن ارتتىرۋ، سوزدىك قورىن بايىتۋ، ادەبي ءتىل نورمالارىن مەڭگەرتۋ جانە سويلەۋ مادەنيەتىن قالىپتاستىرۋ.

- وقۋ باعدارلامالارىن جەتىلدىرۋگە ى. التىنسارين اتىنداعى ۇلتتىق ءبىلىم اكادەمياسىنىڭ عالىمدارى مەن ساراپشىلارى، سونداي-اق قازاق ءتىلى مەن ادەبيەتى پاندەرىنىڭ پراكتيك پەداگوگتەرى قاتىسادى. ولاردىڭ قاتىسۋىمەن وقۋ باعدارلامالارىنىڭ مازمۇنى مەن ونى ىسكە اسىرۋ تەتىكتەرى بويىنشا كەشەندى جۇمىس جۇرگىزىلدى، - دەلىنگەن حابارلامادا.