قازاق ءتىلى بيزنەستىڭ، عىلىم مەن تەحنيكانىڭ تىلىنە اينالا باستادى - پرەزيدەنت
استانا. KAZINFORM - قازاق ءتىلى بيزنەستىڭ، عىلىم مەن تەحنيكانىڭ تىلىنە اينالا باستادى، دەدى بۇگىن مەملەكەت باسشىسى قاسىم-جومارت توقايەۆ ۇلتتىق قۇرىلتايدىڭ ءۇشىنشى وتىرىسىندا سويلەگەن سوزىندە.
«ءتىلىمىزدىڭ قولدانۋ اياسىن كەڭەيتە ءتۇسۋ مەملەكەتتىك ساياساتتىڭ باستى باعىتى بولىپ قالا بەرەدى. بۇل -ءبىز ءۇشىن مىزعىماس ۇستانىم. ەلىمىزدە قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ، عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى - اعارتۋشىلىق»، - دەدى مەملەكەت باسشىسى.
سونداي- اق پرەزيدەنت سوزىندە قازىر ءىرى كىتاپ دۇكەندەرىندە قازاق تىلىندەگى تۋىندىلاردىڭ ۇلەسى ارتا تۇسكەنىن اتاپ ءوتتى.
«سوڭعى كەزدە باسپاگەرلەردىڭ جاڭا بۋىنى الەمدىك بەستسەللەرگە اينالعان شىعارمالاردى اۋدارىپ ءجۇر. كوپتەگەن كىتاپتاردى شىعارىپ جاتىر. اۋدارىلعان كىتاپتاردىڭ ىشىندە كوركەم ادەبيەت قانا ەمەس، ىسكەرلىك باعىتتاعى تۋىندىلار دا كوپ. مەملەكەتتىك ساياساتتىڭ ءمانى - وسىندا. ەشكىمدى ماجبۇرلەمەي، كۇندەلىكتى ومىردەگى قاجەتتىلىكتى ارتتىرۋ ارقىلى ءتىلىمىزدىڭ تۇعىرىن نىعايتا بەرەمىز. مەملەكەتتىك تىلگە قاتىستى قۇر سوزدەن ەشتەڭە شىقپايدى. ەڭ باستىسى، ناقتى ءىس بولۋى كەرەك»، - دەدى قاسىم-جومارت توقايەۆ.
وسى تۇستا، پرەزيدەنت حالىقارالىق «قازاق ءتىلى قوعامىنا» ەرەكشە توقتالدى.
«قازىر ۇلتتىق قۇرىلتايدىڭ مۇشەسى راۋان كەنجەحان ۇلى باستاعان جاڭا بۋىن وكىلدەرى ۇيىم تىزگىنىن قولعا الدى. مەن قوعامنىڭ «Qazaq tili» ەنداۋمەنت قورىن قۇرۋ تۋرالى ۇسىنىسىن قولدادىم. وسى جاقسى باستامانى قولىندا قارجىسى بار ازاماتتار جالعاستىرىپ اكەتتى. تىلىمىزگە قامقورلىق تانىتقان جاندارعا ەرەكشە ريزاشىلىعىمدى بىلدىرەمىن. قالتالى، جاناشىر ازاماتتار قوردى ۇلعايتۋعا ۇلەس قوسادى دەپ سەنەمىن. مەن ەكونوميكانى دامىتۋ ءۇشىن «كرەاتيۆتى يندۋستريانىڭ» ءمان- ماڭىزى زور ەكەنىن ۇنەمى ايتىپ ءجۇرمىن. بۇل مەملەكەتتىك ءتىلدىڭ بولاشاعى ءۇشىن دە وتە ماڭىزدى. قازاق ءتىلىن دامىتامىز دەسەك، قازىرگى زامانعى ءادىس-تاسىلدەردى بارىنشا ءتيىمدى پايدالانعان دۇرىس»، - دەپ قورىتتى مەملەكەت باسشىسى.
اۆتور
ايدار وسپاناليەۆ
