قازاق ءتىلى العاش رەت حالىقارالىق وليمپيادادا جۇمىس ءتىلى رەتىندە بەكىتىلدى
استانا. قازاقپارات – ازياتتىق-تىنىق مۇحيتى لينگۆيستيكالىق وليمپياداسىندا (APLO-2026) قازاق ءتىلى العاش رەت حالىقارالىق پاندىك وليمپيادانىڭ جۇمىس ءتىلى رەتىندە قولدانىلدى. بۇل - مەملەكەتتىك ءتىلىمىزدىڭ جاھاندىق عىلىمي-ءبىلىم بەرۋ كەڭىستىگىنە ىقپالداسۋىنىڭ ماڭىزدى قادامى، دەپ حابارلايدى turkystan.kz.
وليمپيادا بارىسىندا تاپسىرمالار مەن ولاردىڭ رەسمي شەشىمدەرى ۇيىمداستىرۋشىلاردىڭ پلاتفورماسىندا قازاق تىلىندە جاريالاندى. وسىلايشا، قازاق ءتىلىنىڭ حالىقارالىق اكادەميالىق كوممۋنيكاتسيا قۇرالى رەتىندەگى الەۋەتى ءىس جۇزىندە دالەلدەندى.
APLO-2026 وليمپياداسى ازياتتىق-تىنىق مۇحيتى ەلدەرى قازاقستان، قىتاي ، جاپونيا، مالايزيا، كورەيا رەسپۋبليكاسى، سينگاپۋر جانە تايلاندتان كەلگەن 300 گە جۋىق دارىندى وقۋشىنى بىرىكتىردى. اتالعان زياتكەرلىك جارىس - دارىندى جاستاردى انىقتاۋعا جانە ولاردى حالىقارالىق لينگۆيستيكالىق وليمپياداعا دايارلاۋعا باعىتتالعان بەدەلدى الاڭ.
قازاقستان قۇراماسى بۇل وليمپياداعا ءۇشىنشى رەت قاتىسىپ وتىر. بيىل ەل نامىسىن 8 وقۋشى قورعادى. ناتيجەسىندە قازاقستاندىق وقۋشىلار 1 التىن، 1 كۇمىس جانە 2 قولا مەدال جەڭىپ الىپ، جوعارى دايىندىق دەڭگەيىن كورسەتتى. سونىمەن قاتار، 4 قاتىسۋشى قۇرمەت گراموتاسىمەن ماراپاتتالدى.
جەكە ەسەپتە ازيا ەلدەرىنەن ىرىكتەلگەن ۇزدىك قاتىسۋشىلار اراسىندا شىڭعىس قاراسايەۆ 9-ورىندى يەلەندى. ال كوماندالىق ەسەپتە قازاقستان قۇراماسى 8-ورىنعا تۇراقتادى. التىن مەدالدى ورال قالاسىنداعى جاراتىلىستانۋ- ماتەماتيكا باعىتىنداعى زياتكەرلىك مەكتەبىنىڭ 12-سىنىپ وقۋشىسى شىڭعىس قاراسايەۆ جەڭىپ الدى.
كۇمىس جۇلدەنى استانا قالاسىنىڭ نۇرا اۋدانىنداعى جاراتىلىستانۋ- ماتەماتيكا باعىتىنداعى زياتكەرلىك مەكتەبىنىڭ 12-سىنىپ وقۋشىسى امىربەك ازاتبەكوۆ يەلەندى. اقتاۋ قالاسىنداعى مامانداندىرىلعان IT- ليتسەيىنىڭ 11-سىنىپ وقۋشىسى رامازان بۋتانتايەۆ پەن قوستاناي وبلىسى ءجىتىقارا اۋدانىنداعى اباي اتىنداعى مەكتەپ- ليتسەيدىڭ 11-سىنىپ وقۋشىسى كيريلل تۇرعىمبايەۆ قولا مەدال يەگەرى اتاندى.
