قازاق عالىمى قاتەرلى ىسىكتى ەمدەۋدىڭ جاڭا ءتاسىلىن ازىرلەپ جاتىر
استانا. KAZINFORM - نازاربايەۆ ۋنيۆەرسيتەتىنىڭ PhD دوكتورانتى سانازار قادىر ىشەك جانە توق ىشەك قاتەرلى ىسىگىن ەمدەۋگە ارنالعان جاڭا ءتاسىلدى زەرتتەپ جاتىر. وعان ساي، ءدارى نانوبولشەكتەر ارقىلى قاتەرلى ىسىك پايدا بولعان ايماققا تىكەلەي جەتكىزىلەدى.
زەرتتەۋدىڭ ماقساتى - پرەپاراتتىڭ اسەرىن ىسىككە باعىتتاپ، ساۋ جاسۋشالارعا تۇسەتىن زياندى ازايتۋ، دەدى ول Jibek Joly ارناسىنا بەرگەن سۇحباتىندا.
قازىر ونكولوگيالىق اۋرۋلاردى ەمدەۋدە حيميوتەراپيا كەڭىنەن قولدانىلادى. الايدا ونىڭ ەرەكشەلىگى - ءدارى قاتەرلى جاسۋشالارمەن قاتار ساۋ جاسۋشالارعا دا اسەر ەتۋى مۇمكىن. وسى ماسەلەنى ەسكەرە وتىرىپ، عالىمدار پرەپاراتتى ىسىك ورنالاسقان ايماققا بارىنشا ءدال جەتكىزەتىن تاسىلدەردى زەرتتەپ كەلەدى.
سانازار قادىر ۇسىنعان جۇيەدە ءدارى ارنايى قۇرامعا ەنگىزىلىپ، اعزاعا تۇسكەننەن كەيىن گەلگە اينالۋى كەرەك. زەرتتەۋشىنىڭ ايتۋىنشا، پرەپارات قالىپتى تەمپەراتۋرادا سۇيىق كۇيدە بولادى. ال دەنە تەمپەراتۋراسىنىڭ اسەرىنەن گەلگە اينالىپ، ىشەكتە بەلگىلى ءبىر ۋاقىت ساقتالادى. وسى ارالىقتا ءدارى قاتەرلى ىسىككە اسەر ەتۋى ءتيىس.
- قازىر زەرتتەۋىمىز زەرتحانالىق كەزەڭىندە. ىشەك جانە توق ىشەكتەن الىنعان قاتەرلى ىسىك جاسۋشالارىنا ءوزىمىزدىڭ جۇيەمىزدى قولدانىپ، ونىڭ اسەرىن زەرتتەپ جاتىرمىز. كەلەسى كەزەڭدە جۇيەنى جانۋارلارعا، ياعني تىشقاندارعا سىناۋدى جوسپارلاپ وتىرمىز. ودان كەيىنگى زەرتتەۋدىڭ ناتيجەسىنە قاراي كلينيكالىق كەزەڭگە ءوتۋ كوزدەلەدى، - دەدى سانازار قادىر.
ونىڭ ايتۋىنشا، جاڭا ءتاسىلدى حيميوتەراپيانى الماستىراتىن دايىن ەم رەتىندە قاراستىرۋعا ءالى ەرتە. دەگەنمەن زەرتتەۋ ءساتتى جالعاسسا، پرەپاراتتى ىسىككە باعىتتاپ جەتكىزۋ ارقىلى ونكولوگيالىق اۋرۋلاردى ەمدەۋدىڭ جاڭا مۇمكىندىكتەرى اشىلۋى ىقتيمال.
جاس عالىم بولاشاقتا زەرتتەۋ اياسىن كەڭەيتۋدى دە جوسپارلاپ وتىر. ول انالىق بەز وبىرى مەن اس قورىتۋ جۇيەسىندە پايدا بولاتىن قاتەرلى ىسىكتەرگە قارسى پرەپارات ازىرلەمەك.
نازاربايەۆ ۋنيۆەرسيتەتىنىڭ زەرتحانا قىزمەتكەرى مىرزاگەلدى سەيىتكەرىم مۇنداي عىلىمي ىزدەنىستەردى قولداۋدىڭ ماڭىزىن اتاپ ءوتتى.
- سانازار وتە كۇردەلى زەرتتەۋمەن اينالىسىپ جاتىر. قاتەرلى ىسىكپەن كۇرەس الەم مەديتسيناسى ءۇشىن ءالى دە وزەكتى. سوندىقتان وسىنداي جاس عالىمدارعا قولداۋ كورسەتىپ، عىلىمدى بىرگە دامىتۋىمىز كەرەك دەپ ويلايمىن، - دەدى ول.
قاتەرلى ىسىككە قارسى جاڭا ەم ازىرلەۋ ۇزاق زەرتتەۋدى جانە بىرنەشە سىناق كەزەڭىنەن ءوتۋدى تالاپ ەتەدى. سانازار قادىردىڭ جوباسىنىڭ كەلەسى كەزەڭدەگى ناتيجەسى جاڭا ءتاسىلدىڭ تيىمدىلىگى مەن قاۋىپسىزدىگىن باعالاۋعا مۇمكىندىك بەرەدى.
بۇعان دەيىن استاناداعى ۇلتتىق عىلىمي ونكولوگيا ورتالىعىندا ورتالىق ازيادا العاش رەت پروتوندىق تەراپياعا ارنالعان جابدىق ورناتىلعانى تۋرالى جازعان ەدىك.
