قازاق عالىمدارىنا وزبەكستان ارحيۆىنە ەسىك اشىلدى

مادەنيەت جانە اقپارات مينيسترلىگىنە قاراستى ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى قۋات بوراش پەن «ۋزارحيۆ» اگەنتتىگىنىڭ ديرەكتورى ۇلىقبەك يۋسۋپوۆ ارحيۆارالىق بايلانىستى نىعايتۋعا باعىتتالعان ءوزارا كەلىسىم قۇجاتىنا قول قويدى، دەپ حابارلايدى Kazinform.

بۇل قۇجات قازاقستان مەن وزبەكستان اراسىنداعى ارحيۆ دەرەكتەرىن الماسۋ جۇمىسىن وڭايلاتادى. كەلىسىم اياسىنداعى بىرلەسكەن ءىس-قيمىل جوسپارى عالىمدار مەن زەرتتەۋشىلەرگە جاڭا مۇمكىندىكتەر ۇسىنادى دەگەن ءۇمىت بار.

«پرەزيدەنت بيىل استانادا وتكەن تۇركى مەملەكەتتەرى ۇيىمىنىڭ X سامميتىندە «تاريحتان سىر شەرتەتىن ورتاق مۇراعاتتى زەرتتەپ، ۇرپاققا اقيقاتتى جەتكىزۋ - ءبىزدىڭ پارىزىمىز. قۇزىرلى ورگاندارىمىزعا بەيمالىم دەرەكتەردى بىرلەسىپ زەردەلەۋدى تاپسىرۋدى ۇسىنامىز. بۇل، شىن مانىندە، ماڭىزدى جۇمىس بولماق، سەبەبى ورتاق تاريحىمىزدا ءالى دە تولىق زەرتتەلمەگەن اقتاڭداقتار بار»، - دەگەن تاپسىرماسى بار. بيىل قازاقستاندىق دەلەگاتسيا وزبەكستانعا ساپار جاساپ وزبەكستان ارحيۆىنىڭ باسشىلىعىمەن بىرلەسكەن ءىس-شارالار بويىنشا كەلىسىم جۇرگىزگەن بولاتىنبىز. ناتيجەسىندە بۇگىن اتالعان كەلىسىمدى قۇجات جۇزىندە بەكىتتىك»، - دەدى ارحيۆ، قۇجاتتاما جانە كىتاپ ءىسى كوميتەتىنىڭ ءتوراعاسى.

سونداي-اق، ءوزارا ءىس-قيمىل جوسپارىندا قازاقستان مەن وزبەكستان اراسىندا ارحيۆتىك قۇجاتتاردى تولىقتىرۋ، كىتاپتار شىعارۋ، زەرتتەۋ جۇمىستارىن جۇرگىزۋ قاراستىرىلعان.

بىلتىر «ارحيۆ-2025» كەشەندى جوسپارى اياسىندا مەملەكەتتىك ارحيۆ قىزمەتكەرلەرى 14 ەلدە عىلىمي-زەرتتەۋ جۇمىستارىن جۇرگىزىپ، ەلگە قازاقستان تاريحىمەن بايلانىسى بار 7000 نان استام قۇجات جەتكىزگەن. قازىر اتالعان قۇجاتتاردى عىلىمي اينالىمعا ەنگىزۋ جۇمىستارى ءجۇرىپ جاتىر.