قازاق عالىمدارى سپۋتنيك ارقىلى ەگىس دالاسىنداعى سۋدى ەسەپتەيتىن جوبا جاسادى
استانا. KAZINFORM - سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ سۋدى تىك ەسەپتەۋ جۇيەسىن ۇسىنعان قازاقستاندىق عالىم ديانا دۋشنيازوۆامەن كەزدەستى. ەسەپتەگىشتەر مەن داتچيكتەر قولدانىلاتىن كولدەنەڭ ەسەپتەن باستى ايىرماشىلىعى - ازىرلەمە جەرسەرىكتىك دەرەكتەرگە سۇيەنەدى.
جوبا اۆتورلارى اتالعان ازىرلەمەمەن سوڭعى 7 جىل بويى اينالىسىپ كەلەدى.
جاڭا تەحنولوگيا NASA جانە باسقا دا وزىق تالداۋ ورتالىقتارىندا قولدانىلاتىن كومپيۋتەرلىك الگوريتمدەردى پايدالانادى، بۇل ادامي فاكتوردى ازايتادى.
الگوريتم تەك جەرسەرىكتىك سۋرەتتەرگە عانا ەمەس، سونىمەن قاتار دالالىق زەرتتەۋلەر اياسىندا جينالعان مالىمەتتەرگە دە نەگىزدەلگەن.
مىسالى، وسىرىلەتىن داقىل تۇرلەرى نازارعا الىنادى.
ازىرلەمە اۆتورلارىنىڭ ايتۋىنشا، جۇيە وسىعان دەيىن ەسەپ جۇرگىزىلمەگەن ەگىس القاپتارىندا سۋدىڭ كولەمىن انىقتاۋعا مۇمكىندىك بەرەدى.
بۇل بەلگىلى ءبىر ۋچاسكەگە قاجەت سۋدىڭ ناقتى كولەمىن انىقتاۋعا جانە ارتىق شىعىندى ازايتۋ ءۇشىن قاجەت.
مىسال رەتىندە جۇيەگە جينالعان تۇركىستان جانە جامبىل وبلىستارىنا قاتىستى دەرەكتەر ۇسىنىلدى.
تانىستىرىلىمنان كەيىن نۇرجان نۇرجىگىتوۆ پەن سۋ رەسۋرستارى جانە يرريگاتسيا مينيسترلىگىنىڭ دەپارتامەنت باسشىلارى ديانا دۋشنيازوۆاعا جۇيەنىڭ تەحنيكالىق سيپاتتامالارىنا، ونى ەنگىزۋ جولى مەن باعاسىنا، سونداي-اق دەرەكتەردى جيناۋ جانە تالداۋ ادىستەرىنە قاتىستى سۇراقتارىن قويدى.
«سۋارۋ كانالدارىنىڭ تيىمدىلىگىن باعالاۋ ءۇشىن مۇنداي تەحنولوگيالار وتە ماڭىزدى. بۇل ءوز كەزەگىندە سۋارۋ جۇيەلەرىن رەكونسترۋكتسيالاۋ ماسەلەسى قانشالىقتى وزەكتى ەكەنىن انىقتاۋعا مۇمكىندىك بەرەدى. سونداي-اق، سۋارمالى القاپتارعا ناقتى جەتكىزىلگەن سۋدىڭ كولەمىن كەلىسىمشارتتا كورسەتىلگەن دەرەكتەرمەن سالىستىرۋ ارقىلى سۋدىڭ «قارا نارىعىمەن» كۇرەسۋگە دە كومەكتەسۋى مۇمكىن. ءبىز بۇل باعىتتا بەلسەندى جۇمىس جۇرگىزىپ جاتىرمىز. جاڭا تەحنولوگيالارعا كوشۋمەن قاتار زاڭناماعا ءتيىستى وزگەرىستەر ەنگىزۋ ارقىلى دا كەشەندى جۇمىس اتقارۋ قاجەت»، - دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
اۆتور
جانات قاپالبايەۆا
