قازاق عالىمدارى ەنەرگيانى ماڭگى ساقتايتىن اككۋمۋلياتوردىڭ پروتوتيپىن جاساپ جاتىر
استانا. KAZINFORM - ساتبايەۆ ۋنيۆەرسيتەتى فيزيكا-تەحنيكالىق ينستيتۋتىنىڭ جاس عالىمدارى - عىلىمي قىزمەتكەر ارمان ءومىرزاقوۆ پەن PhD دوكتورى ءالجان بايمەنوۆ ۆانادي اككۋمۋلياتورىندا قولدانىلاتىن ۆانادي ەلەكتروليتىن تازارتىپ ءوندىرۋدىڭ وتاندىق تەحنولوگياسىن جاساپ ءجۇر.
ياعني ليتي-يوندى اككۋمۋلياتورلارىندا ءورت جانە جارىلىس قاۋپى وتە جوعارى بولعاندىقتان ۆانادي اككۋمۋلياتورلارى ليتي- يوندى اككۋمۋلياتورلارعا بالاما بولا الادى.
ال ۆانادي اككۋمۋلياتورلارى قاۋىپسىز عانا بولىپ قويماي، سونداي-اق ولار ەكولوگيالىق تازالىعىمەن دە ەرەكشەلەنەدى.
سەبەبى ولار ۇزاق ۋاقىت قىزمەت ەتىپ، قايتا وڭدەۋگە جانە قايتا پايدالانۋعا بولاتىن ەلەكتروليتتەردى ۋتيلدەۋدى قاجەت ەتپەيدى. الىنعان ناتيجەلەرگە سايكەس، الداعى ۋاقىتتا ۆانادي اككۋمۋلياتورلارىنىڭ ءوندىرىسىن قولعا الۋ جوسپارلانعان.
ويتكەنى كۇن مەن جەل ەنەرگياسىن بىرلەسىپ پايدالانۋ جاڭارتىلاتىن ەنەرگيا كوزدەرىنىڭ ەكونوميكالىق تيىمدىلىگىن ونداعان ەسە ارتتىرادى جانە جوعارى دەڭگەيلى ەكولوگيالىق قاۋىپسىزدىكتى قامتاماسىز ەتەدى.
الەمدىك تاجىريبەدە توتىعۋ- توتىقسىزداندىراتىن باتارەيالار ءۇشىن ۆانادي ەلەكتروليتتەرىن ءوندىرۋ قارقىندى دامۋدا، ويتكەنى ۆانادي اككۋمۋلياتورى - ماڭگىلىك ەنەرگيا قويماسى رەتىندە جۇمىس ىستەيدى، ال ونىڭ جۇمىس تەمپەراتۋراسىنىڭ دياپازونى 10-40 گرادۋسقا دەيىن بولادى.
ۆانادي اككۋمۋلياتورلارى ەنەرگيا ساقتاۋ قويمالارى رەتىندە ۇنەمى ەكولوگيالىق تازا، جىلدام جانە تۇراقتى ەنەرگيامەن قامتاماسىز ەتىپ وتىرادى.
اككۋمۋلياتورلاردىڭ جاڭا بۋىنى جوعارى سەنىمدىلىكپەن، ساقتاۋ تۇراقتىلىعىمەن جانە وتە جىلدام ۋاقىت رەاكسياسىمەن سيپاتتالاتىن بولادى، ءارى ولاردى كۇندەلىكتى ەنەرگەتيكالىق جۇيەلەردە قولدانۋعا بولادى.
كەز كەلگەن ەلەكتر قۋاتىنىڭ ءۇزىلۋى كەزىندە ولار رەزەرۆتىك قۋات كوزى رەتىندە سەزىمتال جۇيەلەردىڭ جۇمىس ىستەۋىنە مۇمكىندىك بەرەدى، سونىمەن قاتار سەنىمدى جانە مىقتى ەلەكتر جەلىسى جوق جەرلەردى ەلەكتر كوزىمەن قامتاماسىز ەتۋگە كەپىلدىك بەرە الاتىن قابىلەتكە يە.