قازاق بوكسشىلارى كەمى ءبىر التىنمەن ورالادى - قانات يسلام

استانا. KAZINFORM - بەلگىلى كاسىپقوي بوكسشى قانات يسلام قازاق بوكسشىلارى پاريجدە وتەتىن XXXIII جازعى وليمپيادا ويىندارىنان كەمى ءبىر التىن الاتىنىنا سەنىمدى. بۇل تۋرالى ول Kazinform تىلشىسىنە بەرگەن سۇحباتىندا اتاپ ءوتتى. سونىمەن قاتار بارلىق قۇرماعا ساتتىلىك تىلەدى.

«وليمپيادا ويىندارىن تاعاتسىزدانا كۇتىپ ءجۇرمىز. وسىعان دەيىنگى وليمپيادا ويىندارىندا قازاق بوكسشىلارى جۇلدەسىز ورالماعان. كەمى ءبىر التىنمەن كەلەتىن. الايدا، توكيودا التىنسىز قالدىق. جىگىتتەرىمىز بيىل سول ولقىلىقتىڭ ورىنىن تولتىرادى دەپ سەنەمىن. قازاق بوكسشىلارى كەمى ءبىر التىن الادى. ءبىزدىڭ جىگىتتەردىڭ بارلىعى ءوز سالماقتارىندا توپ جارىپ، وسىعان دەيىنگى الەمدىك دودالاردا ەل نامىسىن ابىرويمەن قورعاپ جۇرگەن ساڭلاقتار. ەشكىمدى بولە جارمايىن. بارلىعى جۇلدەگە لايىقتى جىگىتتەر»، - دەدى قانات يسلام.

سونداي-اق، تەك بوكسشىلارعا عانا ەمەس، جالپى وليمپياداعا اتتانعان بارلىق قۇراماعا ءسات ساپار تىلەدى.

«سپورتشىلارىمىزدىڭ الدى وليمپياداعا اتتانىپ بارادى. مەن تەك بوكسشىلارىمىزعا عانا ەمەس، بارلىق ۇلتتىق قۇراما مۇشەلەرىنە ءسات-ساپار تىلەيمىن. جۇلدەلەرىڭىز كوپ بولسىن، قازاقتىڭ كوكبايراعىن پاريج تورىندە جەلبىرەتە بەرىڭىزدەر دەگىم كەلەدى»، - دەدى بوكسشى.

ايتا كەتەيىك، قازاقستان قۇراماسى وليمپيادا ويىندارىنا سپورتتىڭ 25 تۇرىنەن 92 جولداما جەڭىپ الدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىنا بەلگىلەنگەن.

ويىنعا الەمنىڭ 205 ەلىنەن 10500 سپورتشى قاتىسادى.

وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور كۇنسۇلتان وتارباي