قازاق بالاسى تۋرالى فيلم التايدا كۇن سايىن كورسەتىلىپ جاتىر - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ءور التايداعى حالىقارالىق قار شاڭعى الاڭى اشىلۋ الدىندا تۇر - Ukilialtay
قازان ايىنان بەرى تولاسسىز جاۋعان قارمەن شىڭگىل اۋدانىنداعى «شىڭگىل لاڭشان» حالىقارالىق شاڭعى بازاسىندا جاۋعان قاردىڭ قالىڭدىعى 25-30 سانتيمەترگە جەتىپ، شاڭعى تەبۋ ماۋسىمى باستالعالى تۇر. بۇل تۋرالى وسى اپتادا قىتايدىڭ «Ukilialtay» سايتى حابارلادى.
قىتايلىق ب ا ق-تىڭ جازۋىنشا، شىڭگىل اۋدانى سولتۇستىك ەندىكتىڭ 45-47 گرادۋسى ارالىعىنداعى الەمنىڭ التىن شاڭعى بەلدەۋىندە، «قىتايدىڭ قارلى استاناسى» دەپ اتالعان التاي ايماعىنىڭ سولتۇستىك شىعىسىندا، ءور التايدا ورنالاسقان.
شىڭگىل لاڭشان حالىقارالىق تاۋ شاڭعىسى كۋرورتى 4ا دەڭگەيىمەن تۋريستىك جاقتان تارتىمدىلىعى جوعارى.
«اتالعان دەمالىس ورنى شىڭگىل قالاسىنان نەبارى 12 شاقىرىم جەردە ورنالاسقان جانە تۋريستەرگە قىزمەت كورسەتۋدىڭ تولىق مۇمكىندىكتەرى بار. بۇل قار شاڭعى الاڭى بيىل 9 شاڭعى جولىن سالىپ (6 جوعارى دارەجەلى جول، 2 ورتا دارەجەلى جول، ءبىر باستاۋىش دارەجەلى جول)، شاڭعى جولىنىڭ ەڭ ۇلكەن كولبەۋلىك پارقى بۇكىل ەل بويىنشا 9-ورىنعا جەتتى. قولدانىلاتىن قار جامىلعىسى رەسپۋبليكادا 3-ورىندا. سول ارقىلى ول حالىقارالىق تاۋ شاڭعىسى كۋرورتى رەتىندە باعالانادى»، - دەپ جازادى قىتايلىق ب ا ق.
سامارقاندا تۇركى مەملەكەتتەرىنىڭ اقساقالدارى باس قوستى - «ءوز ا»
سامارقاندا تۇركى مەملەكەتتەرى ۇيىمى اقساقالدار كەڭەسىنىڭ ون ءتورتىنشى وتىرىسى باستالدى. جيىنعا وزبەكستان، ازەربايجان، تۇركيا، تۇركىمەنستان، قازاقستان، قىرعىزستان اقساقالدارىمەن بىرگە ۆەنگريا مەن سولتۇستىك كيپر تۇرىك رەسپۋبليكاسىنىڭ وكىلدەرى قاتىسىپ جاتىر، دەپ حابارلادى «ءوز ا» اقپاراتتىق اگەنتتىگى.
اتالعان ب ا ق-تىڭ مالىمەتىنشە، جيىنعا تۇركى مەملەكەتتەرى ۇيىمى اقساقالدار كەڭەسىنىڭ ءتوراعاسى بينالي يىلدىرىم ءتوراعالىق ەتىپ جاتىر.
كونفەرەنسيادا تۇركى مەملەكەتتەرى ۇيىمىنىڭ باس حاتشىسى كۋبانيچبەك ومۋراليەۆ ءسوز سويلەگەن.
كوپتىڭ كوڭىلىنەن شىعا بىلگەن گۇلمەرەي - Janadauir.com
ايماق ورتالىعىندا كوپتەگەن سۇلۋلىق سالوندارى قىزمەت كورسەتەدى. كەيبىرەۋى 5-6 ادامدى جۇمىسپەن قامتىپ وتىر. ءار كۇن سايىن وسى ورتالىقتارىنىڭ جۇمىسى قاۋىرت ءجۇرىپ جاتادى. اسىرەسە مەرەكە كۇندەرى سۇلۋلىق سالوندارىندا ينە شانشار ورىن بولمايدى. رەداكتسيامىزدىڭ «كاسىبىم- نەسىبەم» ايدارىنىڭ كەلەسى قوناعى شاشتاراز گۇلمەرەي سانسىزباي قىزى، دەپ جازادى موڭعوليالىق Janadauir.com سايتى.
اتالعان باسىلىم مالىمەتىنشە، كوپتىڭ كوڭىلىنەن شىعا بىلگەندىكتەن كليەنتتەرى ونى «كۇما» دەپ اتايدى. ەندى نازارلارىڭىزعا كۇمادان العان سۇحباتتىڭ جازباشا نۇسقاسىن ۇسىنباقپىز، دەپ كاسىپكەردەن شاعىن سۇحبات العان.
گۇلمەرەي ەسىمدى كاسىپكەر قازىر ولگي سۇمىنىندا ەنەسى، جولداسى جانە ءۇش بالاسىمەن بىرگە تۇرادى. اتالعان كاسىپپەن اينالىسقانىنا 15 جىل بولىپتى. 7 جىل قازاقستاندا، 8 جىل قازىرگى تۇرعان ورنىندا جۇمىس ىستەپ كەلەدى ەكەن.
گۇلمەرەي سانسىزباي قىزى ءتىلشىنىڭ قويعان تاعى بىرنەشە سۇراقتارىنا جاۋاپ بەرگەن.
تۇركى مەملەكەتتەرى ۇيىمى ب ا ق وكىلدەرى باس قوستى - «TRT»
قىرعىزستاندا تۇركى مەملەكەتتەرى ۇيىمىنىڭ (ت م ۇ) ب ا ق جانە اقپارات سالاسىنداعى ىنتىماقتاستىق جۇمىس توبىنىڭ 10-شى وتىرىسى ءوتتى.
ەل استاناسى بىشكەكتە مادەنيەت، اقپارات، سپورت جانە جاستار ساياساتى ۆيتسە-ءمينيسترى چىڭعىز ەسەنگۇل ۇلىنىڭ توراعالىعىمەن وتكەن جيىنعا ازەربايجان، تۇركيا، قىرعىزستان، قازاقستان، وزبەكستان جانە تۇرىكمەنستاننان مەملەكەتتىك قىزمەتكەرلەر مەن ب ا ق باسشىلارى قاتىستى. بۇل تۋرالى تۇركيا راديو تەلەۆيزيا پورتالى حابارلادى.
اتالعان باسىلىمنىڭ كەلتىرگەن مالىمەتىنە سۇيەنسەك، كەزدەسۋگە تۇركيادان پرەزيدەنتتىك اپپارات جانىنداعى كوممۋنيكاتسيا باسقارماسىنىڭ قوعامدىق ديپلوماتيا دەپارتامەنتىنىڭ باسشىسى وگۋز گۇنەر، انادولى اگەنتتىگىنىڭ (AA) ستراتەگيالىق كوممۋنيكاتسيالار جانە سىرتقى بايلانىستار مەنەدجەرى حازال دۋران، TRT Avaz حالىقارالىق بايلانىستار جانە كورپوراتيۆتىك كوممۋنيكاتسيالار قىزمەتكەرى گوكچەن وعان قاتىسقان.
ب ا ق جانە اقپارات سالاسىنداعى ىنتىماقتاستىق جونىندەگى جۇمىس توبىنىڭ وتىرىسى اياسىندا «ChatGPT جاساندى ينتەللەكت قوسىمشاسى مىسالىندا جاساندى ينتەللەكتتىڭ ارتىقشىلىقتارى مەن كەمشىلىكتەرى» جانە «گيبريدتىك سوعىستار XXI عاسىرداعى قاۋىپسىزدىك قاتەرى» اتتى ەكى سەسسيا وتكەن.
قازاقستان مەن ب ا ءا 37 ميلليون دوللارلىق كەلىسىمشارتقا قول قويدى - «Parstoday»
قازاقستاننىڭ ساۋدا جانە ينتەگراتسيا ۆيتسە-ءمينيسترى باستاعان قازاقستاندىق وندىرۋشىلەر دەلەگاتسياسى دۋبايعا ساپار بارىسىندا جالپى قۇنى 37 ميلليون دوللار تۇراتىن ەكسپورتتىق كەلىسىمشارتتارعا قول قويدى. بۇل تۋرالى وسى اپتادا «Parstoday» اقپارات اگەنتتىگى دە حابارلادى.
يراندىق اقپارات اگەنتتىگى قازاقستاننىڭ ساۋدا جانە ينتەگراتسيا ۆيتسە-ءمينيسترى قايرات تورەبايەۆتىڭ پىكىرى بويىنشا حابارلاعان.
قايرات تورەبايەۆتىڭ ايتۋىنشا، قازاقستان كومپانيالارى 90 عا جۋىق تاۋار ءتۇرى، سونىڭ ىشىندە مەتاللۋرگيا، حيميا، تاماق ونەركاسىپتەرى ونىمدەرى، تاسىمال، قۇرىلىس ماتەريالدارى مەن فارماتسيەۆتيكالىق ونىمدەردى ۇسىنۋعا دايىن.
سونىمەن قاتار ۆيتسە-مينيستر ب ا ءا نارىعى قازاقستان تاۋارلارى ءۇشىن باستى ەكسپورتتىق باعىتتاردىڭ قاتارىندا ەكەنىن ايتتى. 2022 -جىلى ب ا ءا-گە ەكسپورتتالعان قازاقستاندىق ونىمدەر قۇنى 3,560 ميلليون دوللارعا جەتكەنىن تىلگەن تيەك ەتكەن.
قازاق بالاسى تۋرالى فيلم التايدا كۇن قۇرعاتپاي قويىلىپ جاتىر - «ۇكىلى التاي»
جاقىننان بەرى شينجاڭ ولكەلىك «تيان-شان» كينوستۋدياسى تۇسىرگەن «شاباندوز» اتتى فيلم التايدا كۇن سايىن قويىلىپ جاتىر، دەپ حابارلايدى قىتايدىڭ «Ukilialtay» اقپاراتتىق پورتالى.
«شاباندوز» التايلىق كورەرمەندەر اراسىندا سۇرانىسقا يە. سول كورەرمەندەردىڭ ءبىرى شۋي شياۋحۋن وسى فيلمدى كورىپ ەرەكشە اسەر العانىن ايتادى.
«كينوداعى ارتىستەردىڭ دەنى كاسىبي ءارتىس بولماعانىمەن، ولاردىڭ شىنايى دا قاراپايىم اكتەرلىك ونەرى ءفيلمنىڭ كوركەمدىگىن ارتتىرعان دەۋگە بولادى. بالا كەيىپكەر اڭساردىڭ بويىنداعى ءور رۋحتان ەرەكشە اسەر الدىم. اڭسار باسىنان وتكەن قيىنشىلىقتاردى ەڭسەرىپ، سوڭىندا ءوز ارمانىنا جەتتى. وسى ارقىلى بۇل فيلم بىزگە ءومىر جولىندا ارمانعا جەتۋ ءۇشىن ۇلكەن كۇش-جىگەر كەرەك ەكەنىن تۇسىندىرەدى»، - دەيدى ول.
قازاق بالاسى تۋرالى «تيان-شان» كينوستۋدياسى تۇسىرگەن بۇل بالالار تاقىرىبىنداعى فيلم رەسمي تۇردە بيىل 9-تامىزدا پروكاتقا شىققان بولاتىن.
ايتا كەتەيىك، «شاباندوز» فيلمىندە قازاقتىڭ جاس بالاسى اڭسار ءوز ارمانىن جۇزەگە اسىرۋ ءۇشىن اتقا ءمىنۋى باياندالادى. سونداي-اق فيلمدە التايدىڭ اسەم تابيعاتى دا كورسەتىلگەن.
سونىمەن قاتار بۇل فيلمدە قازاقتىڭ اتقا ءمىنۋ مادەنيەتى مەن ءتۇرلى ەتنوستاردىڭ ءبىر-بىرىنە كومەكتەسۋى وزەك ەتىلگەن.
قىتايلىق ب ا ق-تىڭ دەرەگىنشە، رەجيسسەر وسى كينودا كوركەم دالا تابيعاتىنىڭ كورىنىستەرىن الۋ ارقىلى ءبىر جىلدىڭ ءتورت ماۋسىمىندا تۇرلەنىپ تۇراتىن التاي ايماعىنىڭ تاڭعاجايىپ كوركەم كورىنىستەرىن كورسەتكەن. فيلمدە كىشكەنتاي اڭساردىڭ ومىرىندەگى قيىندىقتارى مەن ارمان- مۇراتى باياندالعان. سول ارقىلى اڭساردىڭ ات بايگەسىندە باس جۇلدەنى الىپ، ءوزىنىڭ اعا- باۋىرلارىمەن قالاي تاتۋ- ءتاتتى ءومىر ءسۇرىپ، اكە-شەشەسىنىڭ سۇيىسپەنشىلىگىن تۇسىنەدى. باس كەيىپكەردىڭ جاقسى دوستار اراسىنداعى ۋادەدەن اينىماۋى، كوپتىڭ كومەگىندە مەيىرگە بولەنىپ، ەسەيىپ، ەر جەتۋى باياندالادى.
«بۇل فيلمگە كوپتەگەن اۋەسقوي ارتىستەر قاتىسقان. اسىرەسە، كىشكەنتاي ارتىستەردىڭ بىرنەشەۋى التاي، ىلە ايماعىنداعى قاراپايىم وقۋشىلار. ولاردىڭ كىرشىكسىز كوڭىلىمەن سومداعان ويىنى كينوعا ەرەكشە بوياۋ بەردى»، - دەيدى كينونىڭ رەجيسسەرلەرى دۋن شينۋىن مەن شاپاعات مۇرات.
اتالعان فيلم قىتايدىڭ بىرنەشە مەملەكەتتىك كينوفەستيۆالىندە جۇلدەلى ورىنداردان كورىنىپ، ەل ىشىندە جاسالعان ۇزدىك كينولاردىڭ قاتارىنا ەنگەن.
«شاباندوز» فيلمى 36-شى قىتاي كينوفەستيۆالىندە «التىن اتەش» سىيلىعى بويىنشا ەڭ تاڭداۋلى بالالار فيلمى، «ەڭ تاڭداۋلى مۋزىكا سىيلىعى» سياقتى ەكى بىردەي ماراپاتقا كانديدات رەتىندە كورسەتىلگەن. جاقىندا، 30-قىركۇيەك كۇنى گەرمانيادا وتكەن حالىقارالىق جاستار كينوفەستيۆالىندە «شاباندوز» فيلمى ب ۇ ۇ-نىڭ وقۋ-اعارتۋ، عىلىم، مادەنيەت ۇيىمى حالىقارالىق بالالار كينوسى ورتالىعى تاراتقان ەڭ تاڭداۋلى فيلم سىيلىعىنا يە بولعان.
تۇركى ەلدەرىنىڭ ادام رەسۋرستارىن دامىتۋعا جاۋاپتى ۆەدومستۆو باسشىلارىنىڭ جيىنى وتەدى - «ءوز ا»
2023 -جىلدىڭ 23-24-قازانىندا سامارقاند قالاسىندا العاش رەت تۇركى مەملەكەتتەرى ۇيىمىنا مۇشە ەلدەردىڭ ادام رەسۋرستارىن دامىتۋعا جاۋاپتى ۆەدومستۆو باسشىلارىنىڭ ەكىنشى وتىرىسى وتەدى.
بۇل تۋرالى بۇگىن وزبەكستاننىڭ «ءوز ا» اقپاراتتىق پورتالى حابارلادى.
اتالعان باسىلىمنىڭ مالىمەتىنشە، بۇل ءىس-شارا دارىندى تۇلعالاردى مەملەكەتتىك قىزمەتكە تارتۋ جانە باسقارۋشى كادرلاردىڭ رەزەرۆىن قالىپتاستىرۋ بويىنشا تاجىريبە الماسۋ ءۇشىن كوممۋنيكاتسيالىق الاڭ بولادى.
وعان وزبەكستان، ازەربايجان، قازاقستان، قىرعىزستان جانە تۇركيادان 30 عا جۋىق قاتىسۋشى كەلەدى دەپ جوسپارلانعان.
اۆتور
بەيسەن سۇلتان ۇلى
