قازاق بالۋاندارى الەم چەمپيوناتىن ءساتتى باستادى

استانا. KAZINFORM - بۇگىن تيرانادا (البانيا) 23 جاسقا دەيىنگى بالۋاندار اراسىنداعى الەم چەمپيوناتى باستالدى. ءبىرىنشى جارىس كۇنى بوزكىلەمگە شىققان بالۋاندارىمىز العاشقى بەلدەسۋلەرىن ءساتتى باستادى.

الەم بىرىنشىلىگىن ءبىرىنشى بولىپ گرەك-ريم كۇرەسىنىڭ وكىلدەرى باستادى. قازاق بالۋاندارى اراسىندا ءبىرىنشى بولىپ كىلەمگە شىققان ءدىن-مۇحامەد قوشقار (67 كەلى) ليتۆا بالۋانى ادوماس گريگاليۋناستان 5:1 ەسەبىمەن باسىم ءتۇستى.

ەندى ول 1/8 كەزەڭدە دانيال اگايەۆپەن (بەيتاراپ اتلەت) كۇش سىناسادى.

ال 60 كەلى سالماقتا ەل نامىسىن قورعاپ جاتقان دوسجان وتەپقالييەۆ تە العاشقى قارسىلاسىن جارىس جولىنان تايدىردى. ول ءبىرىنشى بەلدەسۋىندە ساۋد ارابياسىنان كەلگەن حاسان مۇحاممەد ءال-حارتيدى ايقىن باسىمدىقپەن جەڭدى. وتانداسىمىز ءبىر جارىم مينۋتتىڭ ىشىندە 8-0 ەسەبىمەن جەڭىسكە جەتتى!

ەندى ول 1/8 كەزەڭدە قىتايلىق سپورتشىمەن كىم مىقتىنى انىقتايدى.

بۇگىن تاعى ءۇش بالۋانىمىز جارىس جولىنا شىعادى. ناقتىراق ايتساق، 72 كەلىگە دەيىنگى سالماقتا مەرەي ءماۋلىتحانوۆ، 82 كەلىگە دەيىنگى سالماقتا المير تولەبايەۆ جانە 97 كەلىگە دەيىنگى سالماقتا ەرزات ەرلانوۆ ەل نامىسىن قورعايدى.

ەستەرىڭىزگە سالا كەتەيىك، وسىعان دەيىن قازاقستاندىق بالۋانداردىڭ العاشقى قارسىلاسى انىقتالعانى تۋرالى جازعان بولاتىنبىز.

اۆتور كۇنسۇلتان وتارباي