قازاق بالۋاندارى 5- دۇنيەجۇزىلىك كوشپەندىلەر ويىندارىن قورىتىندىلادى

استانا. KAZINFORM - ەلورداداعى قازمەديا ورتالىعىندا V دۇنيەجۇزىلىك كوشپەندىلەر ويىندارىنداعى قازاق كۇرەسى بويىنشا قورىتىندى باسپا ءسوز كونفەرەنسياسى ءوتتى.

كونفەرەنسياعا يتاليا اسسوتسياتسيالانعان ستيلدەر فەدەراتسياسىنىڭ پرەزيدەنتى دجوردجيو ۆيتتوريو، Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ، قازاقستاننىڭ قازاق كۇرەسى ۇلتتىق قۇراماسىنىڭ باس باپكەرى عاني كەلدىقۇلوۆ جانە 60 كەلىگە دەيىنگى سالماق دارەجەسىنىڭ جەڭىمپازى مەيىرجان بەرەكەتوۆ قاتىستى. كەزدەسۋ بارىسىندا ءتۇرلى جارىستىڭ ناتيجەلەرى تالقىلانىپ، قازاقستاندىق سپورتشىلاردىڭ جەتىستىكتەرى اتالىپ ءوتتى.

«قازاقستاندىق بالۋاندار V دۇنيەجۇزىلىك كوشپەندىلەر ويىندارىندا 15 مەدال جەڭىپ الدى. ونىڭ 12 سى التىن، 1 ەۋى كۇمىس جانە 2 ەۋى قولا. بۇل جەتىستىك قازاقستاندىق بالۋانداردىڭ الەمدىك ارەناداعى ابىرويىن، مەرەيىن اسقاقتاتا تۇسەدى»، - دەدى قازاق كۇرەسىنەن ۇلتتىق قۇرامانىڭ باس باپكەرى عاني كەلدىقۇلوۆ.

ايتا كەتەيىك، قازاق كۇرەسى V دۇنيەجۇزىلىك كوشپەندىلەر ويىندارىنداعى قاتىسۋشى ەڭ كوپ تىركەلگەن سپورت ءتۇرى اتاندى. ەكى كۇنگە سوزىلعان جارىسقا 41 ەلدەن كەلگەن 274 سپورتشى قاتىسىپ، 16 سالماق دارەجەسىندە مەدالدار جيىنتىعىن ساراپقا سالدى. جارىس جاقسىلىق ۇشكەمپىروۆ اتىنداعى سپورت كەشەنىندە ءوتتى.

اۆتور
كۇنسۇلتان وتارباي