قازاق باپكەرى الەمدەگى ەڭ ۇزدىك دەپ تانىلدى

استانا. قازاقپارات - گونكونگتەن جاقسى حابار جەتتى. تۋنيسكە تاەكۆوندودان وليمپيادا ويىندارىنىڭ تاريحي التىنىن سىيلاعان ەسبول سۇلتانوۆ الەمدە ۇزدىك دەپ تانىلدى.

پاريج وليمپياداسىنان سوڭ تانىمالدىلىعى كۇرت ارتقان ەسبول سۇلتانوۆ بۇكىلالەمدىك تاەكۆوندو فەدەراتسياسىنىڭ نۇسقاسى بويىنشا الەمنىڭ ۇزدىك باپكەرى اتاندى. قازىر ول ماراپاتتاۋ راسىمىنە قاتىسۋ ءۇشىن گونكونگكە بارعان. ماراپاتتى تابىستاۋ ءراسىمى ساعات 17:00 دە وتەدى.

ەسبول سۇلتانوۆ قازاقستان قۇراماسىنىڭ تىزگىنىن ۇستاۋى دا مۇمكىن. بۇل نۇسقانى فەدەراتسيا مەن ۇ و ك باسشىسى قولداپ وتىرعان كورىنەدى. قۇجاتتى ەندى تۋريزم جانە سپورت مينيسترلىگى قاراستىرىپ جاتىر.

ايتا كەتەيىك، تاەكۆوندودان 80 كەلىدە باق سىناعان تۋنيس سپورتشىسى فيراس كاتوۋسي پاريج وليمپياداسىنىڭ فينالىندا يران وكىلىن جەڭىپ، چەمپيون اتاندى. ول فينالعا دەيىن بارلىق قارسىلاسىن 2:0 ەسەبىمەن جەڭسە، شەشۋشى كەزەڭدە يراندىق قارسىلاسىنان دا باسىم ءتۇستى. بۇل تۋنيس ەلىنىڭ تاريحىنداعى وسى سپورت تۇرىنەن العاشقى التىن جۇلدە بولدى. سونداي-اق تۋنيس ساپىنان 58 كەلىدە ونەر كورسەتكەن موحامەد حاليل جەندۋبي دا پاريج وليمپياداسىنىڭ قولا جۇلدەسىن يەلەندى. وسىلايشا، ءبىر جىلعا جەتەر-جەتپەس ۋاقىتتا قازاق باپكەرى باپتاعان تۋنيس سپورتشىلارى جەڭىس تۇعىرىنان كورىندى.