قازاق اندەرىنىڭ انتولوگياسى - 8: ساۋلەم-اي - ياپىرماۋ
استانا. KAZINFORM - ءداستۇرلى ۇردىسپەن قازاق اندەرىنىڭ انتولوگياسىنىڭ جالعاسىن نازارلارىڭىزعا ۇسىنامىز.
ساۋلەم-اي
(1- ءتۇرى)
اياعىما كيگەنىم بىلعارى ەتىك، ساۋلەم-اي،
تابانىمنان بارادى ىزعار ءوتىپ، ساۋلەم-اي.
جاقسى بولساڭ كەلەرسىڭ سۋدان ءوتىپ، ساۋلەم-اي،
جامان بولساڭ قالارسىڭ سۋعا كەتىپ، ساۋلەم-اي.
قايىرماسى:
احاۋ،
ساۋلەم، ساۋلەم ساۋلەمسىڭ،
باسىمداعى داۋرەنسىڭ.
جاقسى بولسان ساۋلەمسىن،
جامان بولساڭ اۋرەمسىڭ.
اعىنان دا المانىڭ كوگى جاقسى، ساۋلەم-اي،
بارىنان دا جاماننىڭ جوعى جاقسى، ساۋلەم-اي.
قۇلىن-تايداي تەبىسىپ بىرگە وسكەن ساۋلەم-اي،
بارىنەن دە دوسىڭنىڭ كوبى جاقسى، ساۋلەم-اي.
قايىرماسى.
ساۋلەم-اي
(2- ءتۇرى)
سارعايدىم جولىڭا مەن قاراي-قاراي،
حابارسىز كەتتىڭ، ساۋلەم نەگە بۇلاي؟
جاستىقتىڭ اۋىتپالى تولقىنىندا،
ءجۇرمىسىڭ ويعا قالىپ الدەقالاي.
ەرىتىپ جۇرەگىمە ءتۇسىردىڭ شوق،
جان ساۋلەم، سەنەن باسقا سۇيەرىم جوق.
ۇمىتساڭ الىسقان قول، ايتقان سەرتتى،
امال نە، ماحابباتقا اتقانىڭ وق.
ساۋلەم-اي
(3- ءتۇرى)
ايداپ سالدىم جىلقىمدى اق قاۋدانعا،
جاباعى ارىق، تاي سەمىز كوپ ساۋعانعا، ساۋلەم-اي.
قۋانعاننان جۇرەگىم وت بوپ جانار،
اق بىلەگىڭ سىبانىپ قوي ساۋعانعا، ساۋلەم-اي.
قايىرماسى:
ەكى عانا جيرەن-اي،
وڭشەڭ مانات كيگەنى-اي.
ويماق اۋىز، كۇلىم كوز،
عاشىق جاردىڭ سۇيگەنى-اي.
سارى بەلدەن سارعايىپ تاڭ اتقاندا،
اققۇباشا، ءبيداي ءوڭ ءتۇن قاتقاندا، ساۋلەم-اي.
ۇزاق تاڭعا ەر جىگىت قايتىپ شىدار،
سارى مايداي تولىقسىپ قىز جاتقاندا، ساۋلەم-اي.
قايىرماسى.
ساۋلەم-اي
(4- ءتۇرى)
اۋىلىمنىڭ قونعانى احاۋ الا تاتىر،
وقتاي زۋلاپ دۇنيە بارا جاتىر، ساۋلەتاي،
بارا جاتىر، ساۋلەتاي.
اۋىلىڭنىڭ تۇسىنان ءان سالعاندا،
اقبوز ۇيگە سۇيەنىپ قارا دا تۇر، ساۋلەتاي،
قارادا تۇر، ساۋلەتاي.
ساۋلەم-اي
(5-ءتۇرى)
دايىم مەنىڭ مىنگەنىم ۇزىن، قۇلا ات-ەي،
ەكى جاعى ەرتىستىڭ مالعا سۋات، ساۋلەم-اي،
اۋلىڭ الىس كەتكەندە اتتەڭ، قالقاش-ەي،
وسى انىمە سالا ءجۇر داتكە قۋات، ساۋلەم-اي.
قايىرماسى:
مانارلانعان اق جايلاۋ،
قاشان قۇربىم ءسوز بايلاۋ.
عاشىق بولىپ وزىڭە،
جاتسام ۇيقىم كەلمەيدى-اۋ.
الىستا ءجۇر اۋىلىڭ، جۋىقتا جۇر-ەي،
جاۋايىن دەپ اقشا قار بۇلتتاپ ءجۇر، ساۋلەم-اي.
كىشكەنتايدان بىرگە وسكەن ەي، قالقاتاي-ەي،
ءبىر وزىمنەن كوڭلىڭدى سۋىتپاي ءجۇر، ساۋلەم-اي.
قايىرماسى.
ساۋلەم-اي
(6- ءتۇرى)
سەن دە ارماندا قالقاتاي، مەن دە ارماندا،
ەكى ارماندا جىلايدى ايرىلعاندا، ساۋلەم-اي.
قاراي-قاراي ارتىڭنان كوزىم تالدى،
نەڭ كەتەدى ارتىڭا قايرىلعاندا، ساۋلەم-اي.
قايىرماسى:
مىنگەن اتىم سۇر ما ەكەن،
ات اعاشتا تۇر ما ەكەن.
جايلاۋداعى جان ساۋلەم
امان-ەسەن جۇر مە ەكەن؟
الىپ كەلگەن بازاردان كۇمىس قۇمان،
داريادان وتەدى كوزىن جۇمعان، ساۋلەم-اي.
قىل وتپەستەي ارادان تاتۋ ەدىك.
قاستىق قىلعان بىزدەرگە قاي انتۇرعان، ساۋلەم-اي.
قايىرماسى.
ساۋلەم-اي
(7- ءتۇرى)
ولاي دا ءوتتىڭ اۋلىمنان، بۇلاي دا ءوتتىڭ احاۋ،
ولاي-بۇلاي وتكەندە كەلمەي كەتتىڭ، ساۋلەم-اي.
ايرىلمايمىن دەيتۇعىن سەرتىڭ قايدا احاۋ،
نە سەبەپتەن سەرتىڭە جەتپەي كەتتىڭ، ساۋلەم-اي.
احاۋ ايداي، قالام قاس،
قارا ماقپال قولاڭ شاش.
اق ءجۇزىڭدى كورگەندە
ديدارىڭا بولدىم ماس.
ساۋلەم-اي
(8- ءتۇرى)
اي بولماسا اسپاندا اداسادى،
كوتەرمەسە كوڭىلدى كىر باسادى، ساۋلەم-اي.
جاقسىلاردىڭ كەۋدەسى التىن ساندىق،
كىلت بولماسا ساندىقتى كىم اشادى، ساۋلەم-اي.
قايىرماسى:
ساياداعى بال قۋراي،
سايرا ساۋلەم، قۇربىم-اي.
جاتسام ۇيقىم كەلمەيدى،
ەلەستەگەن قۇرعىر-اي.
اۋلىم مەنىڭ سۇراساڭ بەل تۇرعاندا،
ورامالىڭ جەلپىلدەر جەل تۇرعاندا، ساۋلەم-اي.
كوزىمە ەشكىم، قالقاتاي، كورىنبەيدى،
قارسى الدىمدا كۇلىم كوز سەن تۇرعاندا، ساۋلەم-اي.
قايىرماسى.
ساۋلەم-اي
(9- ءتۇرى)
نالايىن كوزىڭنەن جايناپ تۇرعان-ەي،
بۇلبۇل قۇستاي ولەڭگە سايراپ تۇرعان، ساۋلەم-اي،
ەر جىگىتتە جالعاندا ارمان بولماس-ەي.
ءبىر وزىڭمەن بۇرالتىپ ويناپ تۇرعان، ساۋلەم-اي.
سۇلۋ ەدىڭ ەلدەگى،
اققۋ ەدىڭ كولدەگى،
ءلاجىم بار ما قايتەيىن،
ماعان كوڭىل بەرمەدى.
ساۋلەم-اي
(10- ءتۇرى)
قارا تاۋدىڭ باسىنان كوش كەلەدى، ءاي-ۋگاي،
كوشكەن سايىن ءبىر تايلاق بوس كەلەدى.
ساۋلەم ايداي، ساۋلەم-اي
شىن تۋىستان ايرىلعان قيىن ەكەن، ءاي-ۋگاي،
ەكى كوزدەن مولدىرەپ جاس كەلەدى.
ساۋلەم ايداي، ساۋلەم-اي.
ۇشىپ جۇرگەن اسپاندا اق ساۋىسقان، ءاي-ۋگاي،
جىل ون ەكى-اي بولعاندا اي اۋىسقان.
ساۋلەم-ايداي، ساۋلەم-اي.
ورالىڭنىڭ بارىندا كۇل دە وينا، ءاي-ۋگاي،
بۇل جالعاننىڭ قىزىعىن كىم تاۋىسقان.
ساۋلەم-ايداي، ساۋلەم-اي.
ساۋلەم-اي
(11- ءتۇرى)
ارعىماقتان ات جاقسى شابىس بولسا،
اعايىننان جات جاقسى تانىس بولسا، ساۋلەم-اي.
دوسىڭ كۇلىپ، دۇشپانىڭ تابالايدى،
ءبىر نارسەدەن اياعىڭ شالىس بولسا، ساۋلەم-اي.
اياعىما كيگەنىم كەبىس ەدى،
جىلقى ىشىندە قوس كۇرەڭ تەبىسەدى، ساۋلەم-اي.
اۋىلىڭ الىس كەتكەندە ەي، قاراعىم،
نە دەپ قوسسام ولەڭگە كەلىسەدى، ساۋلەم-اي.
ساۋلەم-اي
(12- ءتۇرى)
اۋلىم كوشىپ بارادى بەل تۇرعانعا،
بيىك اعاش سولقىلدار، ساۋلەم-اي،
جەل تۇرعاندا-اي.
كۇن مەن ايىن وزگەنىڭ نە قىلايىن،
تال شىبىقتاي بۇرالىپ، ساۋلەم-اي،
سەن تۇرعاندا-اي.
ساۋلەم سەنىڭ سىرتىڭنان
الىپ كەلگەن بازاردان تەمىر شەلەك-ەي.
ويناعانىڭ، كۇلگەنىڭ جاننان بولەك، ساۋلەم-اي.
اۋلىڭ الىس كەتكەندە، قالقاتايىم-اي،
اينالايىن كوزىڭنەن دوپ-دوڭگەلەك، ساۋلەم-اي.
قايىرماسى:
ساۋلەم، سەنىڭ سىرتىڭنان،
عاشىق ەدىم بىلتىردان.
تاماشاڭا تالپىنىپ،
تالاي ادام ۇمتىلعان.
كوز الدىمدا-اق ءجۇزىڭ كۇلىمدەيدى-ەي.
ءبىر وزىمنەن باسقاعا بىلىنبەيدى، ساۋلەم-اي.
سەن ەسىمە تۇسكەندە، قالقاتايىم-ەي،
ۇزاق تاڭعا كوزىم ءبىر ىلىنبەيدى، ساۋلەم-اي.
قايىرماسى.
سەكىرتپەلى سەم-سەم
(1- ءتۇرى)
اۋەدە ۇشىپ جۇرگەن اق سارى ما ەكەن،
بالاسىن اتىپ السام قاقسار ما ەكەن.
انىمە ءتۇرلى-ءتۇرلى مەن سالايىن،
انىنە انشىلەردىڭ ۇقسار ما ەكەن!
قايىرماسى:
احاۋ، جالعان-اي، جالعان-اي،
قول جەتپەگەن ارمان-اي!
اعاجاي-اعاجاي، جاڭادا-جاڭادا،
اشەكەي پورىم، سەكىرتپەلى سەم-سەم،
اسىلزادا ەركەم،
جامالىندى كورسەم،
قىزىعىندا جۇرسەم!
جاقسى بولار جىلقى مال كۇزەتكەنگە،
قايىڭ قۇرىق سىنبايدى تۇزەتكەندە.
ءداتىڭ قايتىپ شىدايدى وياۋ جاتىپ،
ءۇي سىرتىنان ءان سالىپ ءبىز وتكەندە.
قايىرماسى.
سەكىرتپەلى سەم-سەم
(2- ءتۇرى)
اۋىلىم كوشىپ بارادى قيا بەلگە،
وتىرىك ماكتان ەجەلدەن سىيا ما ەرگە، اگيگاي، اگيگا-اي.
قايىرماسى:
اشەكەي-اشەكەي فورم،
مىنە، مەنىڭ جولىم.
بولماي قالسا جولىم،
وندا سەنىڭ سورىڭ،
سەكىرتپەلى سەم-سەم.
جامالىندى كورسەم،
اي-اي-اي-اي، اي...
جىگىت بولساڭ ءبىر سىرلى تۇراقتى بول،
ەسەرلىكپەن اركىمنىڭ تىلىنە ەرمە، اگيگاي، اگيگا-اي.
الدانىپپىن باسىنان جوققا سەنىپ،
اسىعايىن نەسىنە وسەككە ەرىپ.
اقىل داريا دەۋشى ەدى مىسال سوزدە،
قولىما ۇستاپ بەرمەي مە اقىل جەڭىپ.
قايىرماسى.
سەن اق قويان قورىمداعى
قالقاتاي، سەن اق قويان-ەي قورىمداعى-ەي،
قايتەيىن كەزىكپەسەم-ەي سورىم داعى-اي.
بەرگەندە ءوزىڭ كوڭىل-ەي، قالقاتاي-ەي،
بولايىن مەن دە قۇربان ەي جولىڭداعى-اي.
قايىرماسى:
سەن اق قويان، سەكەكتەگەن،
ويىمدا بار ما مەنىڭ-اۋ،
كەتەت دەگەن-اي.
اق قويان ەسىك الدى سەكەڭدەگەن،
ارتىنان مەن قارشىعا جەتەم دەگەن،
ويىمدا ءۇش ۇيىقتاسام بار ما مەنىڭ،
ايرىلىپ قالقاتايدان كەتەم دەگەن.
قايىرماسى.
سيىرشى
ارداقتايمىن ماقتايمىن-ەي سيىرىمدى،
ىشسە سۋسىن ايرانى ءۇيىرىمدى.
اۋكەم اي،
بال قايماعىڭ شەكەر-اي.
قايماق، مايى سارى التىن، ارتسا كولىك،
سەمدىرمەيمىن جانۋار ءبۇيىرىندى.
اۋكەم-اي،
بال قايماعىڭ شەكەر-اي.
سۋسامىر - ەلدىڭ جايلاۋى
اينالايىن، قاراعىم، حال جاقسى ما،
سالا بەرمە كوزىندى ءار جاقسىعا.
قايىرماسى:
سۋسامىر، ەلدىڭ جايلاۋى،
ءومىردىڭ بار ما بايلاۋى.
سالا بەرسەڭ كوزىندى ءار جاقسىعا،
ءبارى جاقسى كورىنەر العاشقىدا.
قايىرماسى.
ەلدىك دەيمىن، ەندەشە ەلدىك دەيمىن،
سۇلۋ قىزعا جاراسقان بەلدىك دەيمىن.
قايىرماسى.
سىرتتاي عانا ءوزىڭدى ءبىلۋشى ەدىم،
ادەيى ارناپ اۋلىڭا كەلدىك دەيمىن.
قايىرماسى.
قارا كۇرەڭ اساۋ-اي، كەرمەگىم-اي،
ەرىككەندە باعاتىن ەرمەگىم-اي.
قايىرماسى.
قانشا اۋىل، قانشا جەر كەزسەم-داعى،
سۇلۋ جاندى وزىڭدەي كورمەدىم-اي.
قايىرماسى.
سۋ ىشىندە مەترە
باي دا وتكەن، قارا دا وتكەن، جارلى دا وتكەن،
جاس بالا كەمپىر مەن شال ءبارى دە وتكەن-اي.
بالالار، تىرشىلىكتە كۇلىپ، وينا،
ولمەسە اتا-باباڭ قايدا كەتكەن-اي.
قايىرماسى:
سۋ ىشىندە مەترە،
شىعا المايدى شەتىنە.
وسىندايدا ءۇي-ءۇي، ويناپ كۇل،
وتكەن ىسكە-اي وكىنبە.
اق ءۇيدىڭ ات بايلادىم كەرمەسىنە،
پاندەنىڭ كىم تالاسار بەرمەسىنە-اي.
بالالار، تىرشىلىكتە كۇل دە وينا،
مەن كەپىل وتكەن جالعان كەلمەسىنە-اي.
قايىرماسى.
سۇڭقارىم-اي
ارمان با ەكەن، دۇنيە-اي، ارمان با ەكەن،
سۇڭقارى بۇل كوڭىلدىڭ سامعار ما ەكەن.
اۋىلىڭ الىس قونىپتى-اۋ، قيماس قالقا،
جولىمىزدى قۋ جالعان جالعار ما ەكەن.
قايىرماسى:
جالعاندا، جالعاندا ىڭكار،
ارماندا، ارماندا سۇڭقار-اي.
سۇڭقار بىتكەن بيىكتى شولا ما ەكەن،
بۇل تىرلىكتىڭ ادامدار قوناعى ەكەن.
قالقاتايدىڭ اۋىلى قوڭسى قونسا،
شاراسىنا كوڭىل دە تولادى ەكەن.
قايىرماسى:
ارمان-اي، ارمان-اي، جانىم،
جالعان-اي،
سامعادى-اي،
ءانىم...
سۇلۋ قىزدىڭ سىنى
باعا جەتپەس جاقسىڭا ءبىر گاۋهار تاس-ەي،
ون التى، ون جەتىگە كەلگەندە جاس، كۇنىم-اۋ.
كۇندە بازار ەلىم-اي.
شاتتىق كوڭىل جەرىم-اي.
پىسىپ تۇرعان جانناتتىڭ الماسىنداي-ەي،
الما مويىن، اي ءجۇزدى، قيىلعان قاس، كۇنىم-اۋ.
كۇندە بازار ەلىم-اي،
شاتتىق كوڭىل جەرىم-اي.
ءبىر سۇلۋ بار جاپاندا شىنارلانعان-ەي،
جاننىڭ ءبارى سول قىزعا قۇمارلانعان، كۇنىم-اۋ.
كۇندە قىزىق ەلىم-اي،
شاتتىق كوڭىل جەرىم-اي.
سول سۇلۋدىڭ سيپاتى تىلدەن كەلمەس-ەي،
اسەم تاعىپ موينىڭا تۇمارلانعان، كۇنىم-اۋ.
كۇندە قىزىق ەلىم-اي،
شاتتىق كوڭىل جەرىم-اي.
سۇر جەلگەن
ايت دەگەنىڭ ايتايىن ءاري ايداي-اۋ،
قايدان سەنى بىلەيىن-اي بولدى-اۋ تالاي،
سۇر جەلگەن.
قايىرماسى:
قانشا پالەن،
قانشا پالەن دەسە دە،
قيمايدى ەكەن كوز كورگەن.
كىشكەنتايدان بىرگە وسكەن ساۋلەم ەدىڭ-اۋ،
كوز قىرىڭدى سالا ءجۇر جۇرسەم جاناي،
سۇر جەلگەن.
قايىرماسى.
سۇر جورعا
ۇشىپ جۇرگەن اۋەدەن سارى الا قاز-ەي،
ايدىن كولدىڭ ورتاسى كوك وراي ساز،
قۇربىم-اي،
سەن ىزدەسەڭ قالقاجان، مەن سۇراعان-ەي،
كۇلىپ-ويناپ قالايىق ءبىر ەكى اي جاز،
قۇربىم-اي.
قايىرماسى:
مىنگەن اتىم سۇر جورعا،
امال بار ما قۋ سورعا.
مويىنىڭ بۇرىپ قاراساڭ،
نەڭ كەتەدى ءبىر جولعا.
ۇشىپ جۇرگەن اۋەدە سەن اق سۇڭقار-ەي،
ۇستاي الماي تالايلار بوپ ءجۇر ىڭكار،
قۇربىم-اي.
قارشادايدان بىرگە وسكەن زامانداسىم-ەي،
قۇرعان تورعا بولارسىڭ قاي كۇن دۋشار،
قۇربىم-اي.
قايىرماسى.
سۇرمەرگەن
ءىزى جاتىر بۇلعىننىڭ، ءوزى قايدا،
شىن عاشىقتى ءبىر كورسەڭ و دا پايدا.
شىن سۇيگەنىم جالعاندا ءوزىڭ ەدىڭ،
مەنى تاستاپ كەتەرسىڭ الدەقايدا.
قايىرماسى:
احاۋ، ايداي سۇرمەرگەن،
نەگە كەرەك تىلگە ەرگەن.
قانشا پالەن دەگەنمەن،
قيمايدى ەكەن كوز كورگەن.
اۋلىم كوشىپ بارادى تاۋدان اسىپ،
تاۋدان اسقان بۇلتپەن ارالاسىپ.
اۋلىڭ الىس كەتكەندە، قيماس قالقام،
الدەكىمگە كەتەرسىڭ باۋىر باسىپ.
قايىرماسى.
سۇيگەن ساۋلەم
ءبىر سەن ەدى سۇيگەنى كوڭىلىمنىڭ،
كەلەشەگى، ساۋلەسى ءومىرىمنىڭ.
سەنسىز جەردە قۇلازىپ تۇرا المايمىن،
سوندىقتان دا ءمانى سول كەلۋىمنىڭ.
قايىرماسى:
جۇقا ءجۇزدى، قولاڭ شاش،
كەل، شىرقايىق انگە باس.
قاسىما كەل سۇيگەن ساۋلەم،
جابىرقاعان كوڭىلىمدى اش.
وسىنشاما كۇيدىرگەن جۇرەگىمدى،
باسقا جانعا قيمايمىن ءبىر ءوزىڭدى.
سەنى كۇتتىم سۇيگەن جار، كۇندىز-ءتۇنى،
سۋ سەپكەندەي بولدىرما تىلەگىمدى.
قايىرماسى.
سىرعالى جەڭگەي
ەندەشە، قاراعايلى، قاراعايلى،
توپ جىلقى قاراعايدى ارالايدى،
جانىم، جەڭەشە-اي.
ءان سالىپ، ازىلدەسىپ وتىرايىق،
ۇندەمەي قويعانىڭىز جارامايدى،
جانىم، جەڭەشە-اي.
قايىرماسى:
سىرعالى جەڭگەي، سىرتىڭنان
تانىس ەدىم بىلتىردان.
تاماشاڭا تاڭ قالىپ،
تالاي ادام ۇمتىلعان.
ەندەشە، تەرىسكەيلى، تەرىسكەيلى،
توپ جىلقى تەرىسكەيدى تەگىس جەيدى،
جانىم، جەڭەشە-اي.
باس قوسىپ باعىلاندار وتىرعاندا،
ءان سالماي وتىرعانىڭ كەلىسپەيدى،
جانىم، جەڭەشە-اي.
قايىرماسى.
سىر-دۋان
قارا نار جۇك كوتەرمەس بەل كەتكەن سوڭ،
ەل قايدا سىر-دۋاننان ءبىر كەتكەن سوڭ.
بىرگە وسكەن كىشكەنتايدان، قاراعىم-اي،
كۇلەرمىن كىممەن ويناپ سەن كەتكەن سوڭ.
ەي، ديللات، بەۋ، ديللاتاي،
احاۋ، احاۋ، ديللاتاي.
باسىنان قاراتاۋدىڭ كوش كەلەدى
ءبىر تايلاق كوشكەن سايىن بوس كەلەدى.
حابارىن سىر-دۋاننىڭ ەستىگەندە،
كوزىمنەن ءمولدىر-ءمولدىر جاس كەلەدى.
ەي، ديللات، بەۋ، ديللاتاي،
احاۋ، احاۋ، ديللاتاي.
سىرلى-اۋ، ءلايلىم
سىرتىڭ سۇلۋ، سىمباتىڭ، وۋ، سالعان ۇستا،
اق ءجۇزىڭدى كورگەندە، اۋ، مەيىرىم ءتۇستى، الۋاي.
كەيبىر حاننىن جۇگىڭدەي، وۋ، تۇرلەنەسىن،
قاپ تاۋىنىڭ باسىندا، اۋ، جانار قۇستاي، الۋاي.
قايىرماسى:
باسىنان بايقاپ،
تۇرامىن تايساپ،
ۇيىقتاساڭ، قالقا،
وياتامىن شايقاپ.
وۋ، سىرلى-اۋ، ءلايلىم،
باتتى)-اۋ قايعىڭ، بۇراڭ بەل،
وۋ، قىمىران داۋرەن، الۋاي.
قارعا قىران بولمايدى، وۋ، شىمشىق الماي،
قىشىعان جەر باسىلماس، اۋ، شىمشىپ الماي، الۋاي
كوڭىل شىركىن ءاسىلى، وۋ كونشىمەيدى،
ءبىر وتىرىپ وڭاشا، اۋ، سىر شىعارماي، الۋاي.
تايبۋرىل ات
اسىنعان مويىنىما الما قاۋىز-ەي،
جەر اۋىزدى بوگەيدى، جەمەس اۋىز-اي.
تايبۋرىلمەن تالاسىپ كۇرەڭ اتقا-ەي،
نە قىلمادى ءبىر كۇندە بىزگە جاۋىز-اي.
قايىرماسى:
تايبۋرىل ات،
قيقۋ جانات.
سۇڭقار قانات،
ول جاسانعان سان تويدا
قوس جۇيرىك ات-اي
جىلقىم سايعا توقتاماس جەل كەلگەندە-ەي،
جەر شاڭدى اياق تارتادى ەل كەلگەندە-ەي.
انگە سالىپ بەرەيىن ءبىر-ەكى اۋىز-ەي.
وزدەرىڭدەي جولداستار كەز كەلگەندە-اي.
قايىرماسى.
ءتالىپجاننىڭ ءانى
ايت دەگەندە ولەڭدى، كىدىرمەيمىن،
باي-ءماناپتىڭ الدىندا بۇگىلمەيمىن.
قونبايتۇعىن اۋىلعا قىدىرمايمىن،
بولمايتۇعىن نارسەگە جۇگىرمەيمىن.
احاۋ، اپپاق ايىم،
قالقاتايىم،
شەرىمدى كوپ جينالعان
تارقاتايىن.
قىزدى اۋىلدىڭ قىمىزى بالداي بولار،
ارۋلاردىڭ اجارى تاڭداي بولار.
جولىعۋدى ەرتەڭگە قالدىرمايمىن،
ەرتەڭىمىز، كىم ءبىلسىن، قانداي بولار؟
احاۋ، اپپاق ايىم،
قالقاتايىم،
شەرىمدى كوپ جينالعان
تارقاتايىن.
تاڭ كۇزەتكەن
كورىنەر ەي كوگەرىڭكى بەلدىڭ تاسى-اي،
جوعالتتىم كوك الا ايعىر مالدىڭ باسى-اي.
تۇسكەندە ساۋلەم ەسكە-ەي، قاراعىم-اي.
كول بولدى ومىراۋعا كوزدىڭ جاسى-اي.
اراسى ەكى اۋىلدىڭ بەل بولادى-اي،
تۇيەگە ەكى ساندىق تەڭ بولادى-اي.
كەتكەندە اۋلىڭ الىس ەي، قاراعىم،
قوينىما كوزىم جاسى سەل بولادى-اي.
توي بازار
توي-توي بازار، توي بازار تويلاي كەلدىم-اي،
التىن ساقا قولعا الىپ ويناي كەلدىم، قۇربىم-اي.
تانىسىم كوپ بۇل تويدا، باۋىرىم كوپ-اي،
ايتىسسام دەپ وزىڭمەن ويلاي كەلدىم، قۇربىم-اي.
قايىرماسى:
سۋ اعادى ارىقتان،
قىز قارايدى جابىقتان.
سۇيەر ەدىم بەتىڭنەن،
ۇيالامىن حالىقتان.
ويعا بارسام - وي تەگىس،
قىرعا بارسام - قوي سەمىز.
ءوتىپ كەتتى-اۋ بىزدەردەن
قايران جاستىق ون سەگىز.
ءجۇرۋشى ەدىڭ قولىڭا دومبىرا الىپ، اي،
دومبىرانىڭ تيەگىن جوندىرالىق قۇربىم-اي.
شىنىمەنەن كوڭىلىڭ بولسا مەندە-اي،
ەكى اۋىلدى ءبىر جەرگە قوندىرالىق، قۇربىم-اي.
قايىرماسى:
سۋ اعادى ارىقتان،
قىز قارايدى جابىقتان.
سۇيەر ەدىم بەتىڭنەن،
ۇيالامىن حالىقتان.
ويعا بارسام - وي تەگىس،
قىرعا بارسام - قوي سەمىز.
ءوتىپ كەتتى-اۋ بىزدەردەن
قايران جاستىق ون سەگىز.
تاۋدا وسكەن بۇلدىرگەن،
قىز بەن جىگىت ءبىر جۇرگەن.
ەبىن تاۋىپ ويناساڭ،
قىز بەتىنەن سۇيدىرگەن.
تومپيدىم
الىپ كەلگەن بازاردان كۇمىس قۇمان،
اداستىرار جىگىتتى قالىڭ تۇمان.
قايىرماسى:
مومپيدىم،
مەن سىزگە وكپەلەپ تومپيدىم ءاي-اۋ.
قىل وتپەستەي ارادان تاتۋ ەدىك،
ەكەۋىمىزدى ايىرعان قاي انتۇرعان.
قايىرماسى.
توپ شەڭگەل
ەسىك الدى قارا سۋ بالعىن كەلدى،
بالعىن كولدىڭ بالىعىن العىم كەلدى،
احاحاي.
كىشكەنتايدان بىرگە وسكەن ساۋلەم ەدىڭ،
اتتاندىرعان جەرىڭە بارعىم كەلدى،
احاحاي.
قايىرماسى:
ەسىك الدى توپ شەڭگەل،
توپ شەڭگەلگە كەلسەڭ كەل،
توپ شەڭگەلگە كەلگەندە.
وزىڭە ءوزىڭ سەنسەڭ كەل.
قارايعانعا قارايمىن قابان با دەپ،
قامشىلايمىن اتىمدى شابام با دەپ،
احاحاي.
وتكەننەن دە سۇرايمىن، كەتكەننەن دە،
قالقاتايدىڭ اۋىلى امان با دەپ،
احاحاي.
قايىرماسى.
تورتكۇلدە ەلىم، عاشىق جارىم
اق ءۇيدىڭ اي كورىنەر ماڭدايىنان،
كەتپەيدى بەرگەن قانت تاندايىمنان،
اشىق جار.
قايىرماسى:
تورتكۇلدە جەرىم،
ساعىندىم، ەلىم.
سۇمبىل شاش، بوتا كوزىڭ،
بەۋ، داريعا-اي.
قاسىڭا كەلگەن ادام كەتە المايدى،
پەيىشتىڭ جاراتىلدىڭ قاندايىنان،
اشىق جار.
قايىرماسى.
دەگەن سوڭ اۋەل انار، اۋەل انار،
ءبيدايدىڭ باسىن السا، ءتۇبى سابان،
اشىق جار.
قايىرماسى.
تىلەيمىن ءار ۋاقىتتا جاقسىلىقتى،
ازاماتى اۋىلىمنىڭ بولسىن امان،
اشىق جار.
قايىرماسى.
تۋعان وتان
جەر قايدا تۋعان جەردەي جانعا جايلى،
جات جەردە كوڭىل قۇسى سامعامايدى-اي.
اۋلىمنان التى ايشىلىق الىس كەتسەم،
بۇلبۇلىم كەۋدەمدەگى سايرامايدى-اي.
تۇرلاۋ قايىڭ
قىزى سۇلۋ كورىنەر ايت-بوزىمنىڭ،
بەرەكەتى ىشىندە قوي-قوزىمنىڭ.
تۇرلاۋ قايىڭ،
وسى ءانىمدى سالىپ ال،
قالقاتايىم-اي.
تاماشالاپ، توي تويلاپ مەن وتىرمىن،
داۋسى قايدان شىعادى جامپوزىمنىڭ؟
تۇرلاۋ قايىڭ،
وسى ءانىمدى سالىپ ال،
قالقاتايىم-اي.
كوك الا ۇيرەك ۇشادى كولگە قارسى،
جانۋاردىڭ ۇياسى جەلگە قارسى.
تۇرلاۋ قايىڭ،
وسى ءانىمدى سالىپ ال،
قالقاتايىم-اي.
سەن الىسقا كەتكەندە، اياۋ قالقام،
ورامالعا اعادى كوزدىڭ جاسى.
تۇرلاۋ قايىڭ،
وسى ءانىمدى سالىپ ال،
قالقاتايىم-اي.
تۋىسىم-اي
مىنگەنىم-اي دايىم مەنىڭ دونەن بولسا،
جاز ءمىنىپ، كۇز جىبەرگەن كەبەن بولسا-اي.
الدىندا-اي كوپشىلىكتىڭ ءان شىرقايمىن،
شىنىمەن-اي ىزدەگەنىڭ ولەڭ بولسا-اي.
قايىرماسى:
وي، احاۋ-اي،
التىنىم-اي، كۇمىسىم-اي.
امان بول-اي قايدا جۇرسەڭ تۋىسىم-اي.
ءجۇرۋشى ەك-اي ورلەپ، قۇلداپ
بۇلعىن بويىن،
جايقالعان ەي جاعاسىندا سالىپ ويىن-اي.
قۇبىلتىپ-اي سۇلۋ انگە سالعانىمدا،
بالقىتقان-اي عاشىق جاردىڭ تۇلا بويىن-اي.
قايىرماسى.
ۋگاي
التىن ەردى كوتەرىپ اتقا سالدىم-ەي،
كازينە دەپ اتىندى حاتقا سالدىم، ءاي-ۋگاي.
جاتسام ۇيقىم كەلمەيدى، تۇرسام كۇلكىم-ەي،
ءبىر سەن ءۇشىن جانىمدى وتقا سالدىم، ءاي-ۋگاي.
قايىرماسى:
ۋگاي-ۋگاي-اي ۋگاي،
اق كازينە داريعا-اي.
سەن دەگەندە قالقاتاي ويىم بولەك-ەي،
جاس كۇنىڭنەن اقىلعا بولدىڭ زەرەك، ءاي-ۋگاي.
قاراعاندا جالت ەتىپ ويدى بولگەن-ەي،
اينالايىن كوزىڭنەن ءدوپ-دوڭگەلەك، ءاي-ۋگاي.
قايىرماسى.
ۋگاي-اي
(1- ءتۇرى)
ءشوبى شۇيگىن-اي، تومەنگى كوك قاباقتىڭ-ەي،
قىزى سۇلۋ بولادى-اي كون ساداقتىڭ اي، ۋگاي-اي.
ولەڭ داۋسىن-اي ساعىنىپ جۇرگەنىمدە-ەي،
داۋسى قايدان شىعادى اق تاماقتىڭ، ۋگاي-اي.
قايىرماسى:
تاۋ باسىندا-اي ارشاسى-اي.
باسىنا بۇلبۇل-اي قونساشى-اي.
ويماق اۋىز-اي، كۇلىم كوز،
جارىم سىزدەي-اي بولساشى-اي.
باسى قىمبات-اي بازاردا الاشانىڭ-ەي،
قىزى سۇلۋ-اي بولادى قاراشانىڭ-اي، ۋگاي-اي.
ولەڭ داۋسىن-اي ساعىنىپ جۇرگەنىمدە-ەي،
داۋسى قايدان-اي شىعادى قۇداشانىڭ-اي، ۋگاي-اي.
قايىرماسى.
ۋگاي-اي
(2- ءتۇرى)
قاراعىم، اينالايىن سىقىلىڭنان،
سەكىلدى قىسىر كيىك مىقىنىڭنان-اي،
ۋگاي-اي.
باعاڭا باعالاسام جان جەتپەيدى،
جارالدىڭ قانداي ادام تۇقىمىنان-ەي،
ۋگاي-اي.
بويىڭا ۇيالاپتى ءبىلىم دەگەن،
وعاشتىق مىنەزىڭنەن بىلىنبەگەن-اي،
ۋگاي-اي.
كەتكەندە اۋلىڭ شالعاي قيماس قالقام،
كوزىڭنەن اينالايىن كۇلىمدەگەن-اي،
ۋگاي-اي.
ۋگاي-اي
(3- ءتۇرى)
جامان اتقا ەر سالما جالدى ەكەن دەپ-ەي،
جولداس بولما جامانمەن مالدى ەكەن دەپ،
ۋگاي-اي.
سىرلى اياقتان سىر كەتسە دە سىن كەتپەيدى-ەي،
جولداسىڭنان بەزىنبە جارلى ەكەن دەپ،
ۋگاي-اي.
قايىرماسى:
قۇلپىرىپ ءومىر جايناسىن،
قىزۋ ەڭبەك قايناسىن.
زاماننىڭ گۇل باعىندا،
جاس تۇلەكتەر سايراسىن.
ۋگاي ساۋلەم
قولىمدا ءبىر قامشىم بار التىنداعان،
كەي جامان ۇستاي الماي قالتىلداعان، اي-ۋاي.
كەتكەندە اۋلىڭ الىس ەكى-اي قالقام،
كوزىڭنەن اينالايىن جالتىلداعان، اي-ۋاي.
ۋگاي-ۋگاي، ارمان-اي
و، جانىم، قارى ما، جاس پا، قارى ما، جاس پا-اي،
تانيمىن داۋىسىندى جازا باسپاي.
وي، دۇنيە، شىركىن، جالعان-اي،
ۋگاي-ۋگاي، ارمان-اي.
اۋسەلىم ەشتەمەدەن باسىلمايدى-اۋ،
جىلقىدا الا تۇياق ارالاسپاي.
وي، دۇنيە، شىركىن، جالعان-اي،
ۋگاي-ۋگاي، ارمان-اي.
دۇنيەء بىر قيسىق جول بۇرانداعان،
باق تايسا، ەرگە داۋلەت قۇرالماعان.
وي، دۇنيە، شىركىن، جالعان-اي،
ۋگاي-ۋگاي، ارمان-اي.
ۋگاي-اي
ولەڭ دە جوق، ءان دە جوق سالماعانعا، احوۋ،
ارماندامىن اۋلىڭا بارماعانعا، ۋگاي-اي.
جاتسام ۇيقىم كەلمەيدى، تۇرسام كۇلكىم، احوۋ،
ويناپ-كۇلىپ مەيىرىم قانباعانعا، ۋگاي-اي.
قايىرماسى:
قاسىڭ قارا كوزبەنەن،
الدايسىڭ جىلى سوزبەنەن.
تابيعاتتىڭ كۇشتىسى-اي،
تابىستىرعان سىزبەنەن.
كوك بالدىرعان دەگەندە، كوك بالدىرعان، احوۋ،
جولدا ءجۇرىپ جولاۋشى ات شالدىرعان، ۋگاي-اي.
«ءاي! ءاي!» دەسەم، ارتىڭا قارامايسىڭ، احوۋ،
قاراماستان كوڭىلىڭدى كىم قالدىرعان، ۋگاي-اي.
قايىرماسى.
الاتاۋدىڭ باسىندا قايراق جاتىر، احوۋ،
اۋىل مالىن جايلاۋعا ايداپ جاتىر، ۋگاي-اي.
كۇندىز-ءتۇنى قاسىڭنان شىقپاس ەدىم، احوۋ،
قۋ تىرشىلىك قولىمدى بايلاپ جاتىر، ۋگاي-اي.
قايىرماسى:
ۋگايىمدى ايتارمىن،
جاعدايىمدى بايقارمىن.
جاعداي جاقسى بولسا ەگەر،
ولەڭ ايتىپ قايتارمىن.
ۋوي-ۋوي-اي
باسىندا قارا تاۋدىڭ مۇنارامىن،
تۇبىندە مۇنارانىڭ، ۋوي-ۋوي-اي، تۇرا الامىن-اي.
جاسىمنان ولەڭ ايتۋ داعدىم ەدى،
ايتۋعا ەندى ولەڭدى، ۋوي-ۋوي-اي، ۇيالامىن-اي.
ءۇي-باي، سامەن شال
ايت دەگەنىڭ ايتايىن-ەي ايداي ون بەس
اساۋىنان ۇيرەتكەن تايداي ون بەس.
قايىرماسى:
ءۇي-باي سامەن شال
پاي-پاي كۇنىم-اۋ،
دۇنيە-اۋ
حالالاكىم-ايداي
رياي-اۋ.
قۇلىن تايداي الىسىپ وينايتۇعىن-اي،
قايتا اينالىپ كەلمەيدى-اۋ قايران ون بەس.
قايىرماسى.
ءۇي-ءۇي جەڭەشە-اۋ، اعا-ەكەم ۇرسار
ولەڭ ايتقىم كەلمەيدى ەرىنگەندە، ءۇي-ءۇي جەڭەشە،
بويىم بايسال تارتادى كەرىلگەندە-اي، اعا-ەكەم ۇرسار
جەردەن التىن تاپقانداي قۋانامىن، ءۇي-ءۇي جەڭەشە
تاقياڭنىڭ توبەسى كورىنگەندە، اعا-ەكەم ۇرسار-اۋ.
ءۇي قارعا-اۋ
ءبىر قامشىم بار قولىمدا-ەي بۇلدىرگەلى،
ءبىر ءسوز ايتتىم قالقاعا، ءۇي، قارعا-اۋ، كۇلدىرگەلى-اۋ
قايىرماسى:
احا-حا-حاۋ لىلىلى-لاۋ،
احا-حا-حاۋ لىلىلى-لاۋ.
لەل-لاۋ، لەل-لاۋ-اۋ.
ءارى وتىرماي، جاقىنداپ-ەي، بەرمەن وتىر،
قارماعىم جوق قولىمدا، ءۇي، قارعا-اۋ، ىلدىرمەلى.
قايىرماسى.
ۇكىلى-اي
ەسىك الدى قارا سۋ اعىنداعان-اي،
جاستىق وتى بويىندا جالىنداعان-وي.
ۇكىلى-اي، ۇكىلى-اي،
ۇكىلىم ايداي-اۋ.
ايدىنداعى اققۋداي ارايلىم-اي،
ءبىر ادام جوق وزىڭە تابىنباعان-وي.
ۇكىلى-اي، ۇكىلى-اي،
ۇكىلىم ايداي-اۋ.
ۇكىلى باستى التىن ءدان
وي مەن قىرىم ەگىن بوپ جايقالادى-اۋ،
تولقىپ جاتقان تەڭىزدەي شايقالادى-اۋ.
كۇزدە جيناپ ۋىزداي اق ءبيدايدى-اۋ،
العاننان سوڭ جانىمىز جاي تابادى-اۋ.
ۇكىلى باستى التىن ءدان-اي،
وتانىمنىڭ مول كەنى-اي.
ۇكىلى جەڭگەي
ءان فورىمعا كەلمەيدى شىرقاپ سالماي،
جىگىت ءسانى كەلمەيدى قارشىعا الماي،
ۇكىلى جەڭگەي نازدارى-اي.
وسى وتىرعان كوپشىلىك سوگە مە دەپ،
بۇگەجەكتەپ مەن ءجۇرمىن ءان شىعارماي،
ۇكىلى جەڭگەي نازدارى-اي.
جىلقى سايعا تۇرا الماس جەل كەلگەندە،
جەر شاندى اياق تارتادى ەل كەلگەندە
ۇكىلى جەڭگەي نازدارى-اي.
اۋىزداعى جەل ءسوزدى ايايمىز با،
ۇلى جيىن، مەرەكە كەز كەلگەندە
ۇكىلى جەڭگەي نازدارى-اي.
ۇكىلى قۇربىم
اتى شىعار ءار جەردە جۇلدە العاننىڭ،
پايداسى جوق جىگىتكە كوپ ارماننىڭ.
قايىرماسى:
ۇكىلى اي قۇربىم، ۇكىلى-اي-ياي.
از عانا كۇن قالايىق كۇلىپ-ويناپ،
ارمانى جوق جالعاندا سەنى العاننىڭ.
قايىرماسى:
ۇكىلى-اي قۇربىم، ۇكىلى-اي-ياي.
ۇكىلى ۇيرەك
اق ءتىسىڭ اۋزىڭداعى ءتىزىلىپ تۇر،
كوڭىلىم ءسىزدى كورىپ بۇزىلىپ تۇر،
ۇكىلى-ۇيرەك.
كەتكەندە اۋىلىڭ شالعاي-ەي قاراعىم،
ومىرتقام وت وزەگى ءۇزىلىپ تۇر،
ۇكىلى-ۇيرەك.
قايىرماسى:
ۇكىلى ۇيرەك، قوڭىر قاز،
جابىرقاماي كوڭىلىڭ جاز.
عاشىق ەدىم سىرتىڭنان،
ءبىر وزىڭە بولىپ ءماز.
اق ءتىسىم اۋزىمداعى مارجان ءتىسىم،
بولار ما مۇندا دۋشار سۇيگەن كىسىم.
سۇيكەنىپ سۇيگەن جانىم وتە شىقسا،
قازانداي قاتتى وت جاققان قاينايدى ءىشىم.
قايىرماسى.
ۇكىلىم ايداي، بۇرلەن-اي
اينالايىن قارايكوز، كۇلىمدەگەن-ەي،
جامان اتىڭ ەشقاشان بىلىنبەگەن.
ەي، ۇكىلى-اي، ۇكىلىم-ايداي،
بۇرلەن-اي.
جاقسىلىقتىڭ نىشانى تال بويىندا-ەي،
جامان اتقا ءار قاشان ىلىنبەگەن.
ەي، ۇكىلى-اي، ۇكىلىم ايداي،
بۇرلەن-اي.
ۇكىلىم ايداي، قوڭىر جاي
ەسىك الدى قارا سۋ بويلامادىم،
بۇل جالعاننىڭ وتەرىن ويلامادىم.
ۇكىلىم ايداي، قوڭىر جاي.
بۇل جالعاننىڭ وتەرىن بىلگەن بولسام،
قۇلىن-تايداي تەبىسىپ وينامادىم.
ۇكىلىم ايداي، قوڭىر جاي.
ءۇري-اي، احاۋ
بىرەۋ جاقسى بىرەۋدەن، مىسقال ارتىق،
ات كورپەنى باسارعا پىستان ارتىق-اۋ.
جايدى بىلگەن تەڭ تۇسىڭ تۋرا كەلسە،
اڭگىمەندى ايتاسىڭ نۇسقالانتىپ-اۋ.
توقسان ءسوزدىڭ توبىقتاي بار ءتۇيىنى،
ۇزارتپاساڭ ايتايىن قىسقالانتىپ-اۋ.
قايىرماسى:
ءۇري-اي، احاۋ،
جىلدان جىلعا زامانىڭ
كەپ تۇر تاقاۋ-اي.
اۋ، ءبىسمىللا، ولەڭنىڭ الدى نەشە-اي،
قولقا، جۇرەك - ادامنىڭ جان دەنەسى-اي.
ايتار كىسى وزىنە ساي كەلگەندە،
قاراپ تۇرما ولەڭنىڭ قايىن ەنەسى-اي.
قايىرماسى:
احاۋ، ءانىم،
زامان ەكى كەلمەيدى،
زاۋلا، جانىم-اي!
جاراتادى جاقسىنى التىن قىلىپ،
ءىشىڭدى التىن، سىرتىندى جالتىر قىلىپ-اۋ.
ءبىر جاقسى مەن ءبىر جامان ءار قايدا بار،
كۇيدىرەسىڭ ءىشىمدى تالپىندىرىپ-اۋ.
قايىرماسى:
احاۋ، يعاي،
مەن سىرتىڭنان ءجۇرۋشى ەم،
ەلگە قيماي-اۋ!
ءۇريا-اي
ولەڭ باسى ءبىسمىللا جاراتقاننان-اي،
ەر جىگىتكە نۇر جاۋار تالاپتانعان، ءۇريا-اي.
تالابىڭنىن بارىندا تالپىنا بەر-اي،
تالاپسىز جان ءار جەردە قالعان، ءۇريا-اي.
قايىرماسى:
قارقارانى جايلاعان،
جاعالاي بيە بايلاعان،
قىز-بوزبالا جيىلىپ،
قۇلىن، تايداي ويناعان.
وكىنەمىن دۇنيە-اي جالعانىنا-اي،
قاي پەندەنى جەتكىزگەن ارمانىنا، ءۇريا-اي.
ورىنباي مەن كەنشىمباي ايتىسىپتى-اي،
جەتىسۋعا جاندارال بارعانىندا، ءۇريا-اي.
قايىرماسى.
ايت دەگەندە ولەڭدى ايارىم جوق، ءۇريا-اي،
جەلىسىم بار ازىراق، اياڭىم جوق، ءۇريا-اي.
تىرشىلىكتە ويناپ-كۇل، قىز-بوزبالا-اي،
وتە شىعار بۇل جالعان ايالى جوق، ءۇريا-اي.
قايىرماسى.
ءۇريا-اي كوكەك
اۋەدە ۇشىپ جۇرگەن كوكەك دەگەن، اي،
اي، كوكەك،
باۋىرىندا بالاپانى سەكەكتەگەن،
ءۇريا-اي، كوكەك، اگۋگاي.
ويىمدا ءۇش ۇيىقتاسام بار ما مەنىڭ، اي،
اي كوكەك-اي،
ايىرىلىپ قالقاتايىم كەتەد دەگەن
ءۇريا-اي، كوكەك، اگۋگاي.
قايىرماسى:
ءاي، ءاي، كوكەك،
ءاي، ءاي كوكەك،
تۇسپەيدى ەركىن قولعا كوڭىلگە العان،
ءۇريا-اي، كوكەك، ءاي، كوكەك-اي.
سالعانىم ون قولىما قولا جۇزىك، ءاي، ءاي، كوكەك
وتكەندى نەگە كەرەك جىپكە ءتىزىپ، ءۇريا-اي، كوكەك، اگۋگاي
كەتسە دە اۋىلىڭ شالعاي، قيماس قالقا، ءاي، ءاي، كوكەك
وزىڭنەن جۇرگەنىم جوك، كۇدەر ءۇزىپ، ءۇريا-اي، كوكەك، اگۋگاي
قايىرماسى:
ءاي، ءاي، كوكەك،
ءاي، ءاي، كوكەك،
جاقسىنىن قادىرىنە كىم جەتەدى،
ءۇريا-اي، كوكەك، ءاي، كوكەك-اي
فاتيمە
جىبەك شاشىڭ جەلكىلدەر-ەي تاراعاندا،
جورعا سۇلۋ كورىنەر جاراعاندا.
قايىرماسى:
فاتيمە، التىن ساباق جەز تۇيمە.
جەردەن التىن تاپقانداي-ەي قۋانامىن،
ەزۋ تارتىپ كۇلىمدەپ قاراعاندا.
قايىرماسى.
كۇمىس قاسىڭ بولعاندا، ەي التىن - ءشاشىڭ،
قالاممەنەن سىزعانداي قيعاش قاسىڭ.
قايىرماسى.
مۇنداي سىمبات تۇرعاندا ءبىر وزىڭدە،
جابىتتاماي اۋلىڭدى كىم شىداسىن.
قايىرماسى.
حالاۋلىم-اي
ولەڭ باسى ءبىسمىللا، وۋ، دەپ ايتامىز-اۋ،
جاراتىمسىز جامان ءسوز نەگە ايتامىز،
ايحوي، حالاۋلىم-اي.
ءبارىمىزدى جاراتقان، وۋ، جاپپار قۇداي-اۋ،
قۇدايدى ايتپاي اۋەلى نەنى ايتامىز،
ايحوي، حالاۋلىم-اي.
ايتار كىسى الدىما، وۋ، كەز كەلگەندە، وۋ،
توپتان شىققان تورىداي جايتاڭدايمىن،
ايحوي، حالاۋلىم-اي.
حورلان
جىلىندىق جۇرەكتەردىڭ سىرىمەنەن،
حورلان-اي،
وتكىزدىك شىرىندى شاق ءتۇنىن ەرەن.
ساناما سيار ەمەس مەنىڭ ءتىپتى،
حورلان-اي،
قايرىلماي كەتكەنىڭ بە شىنىمەنەن.
مازالاپ سەنىڭ جايىڭ مەنى دايىم،
حورلان-اي،
كۇندەرىم ەتىپ جاتىر، نە قىلايىن.
تارىلتتى ءورىسىمدى تۇساۋ-تىرلىك،
حورلان-اي،
تارپاڭ ەم تاۋدا جۇرگەن تاعىدايىن.
وتكەن كۇنگە وكپەلى جانداي ءالى،
حورلان-اي،
تارتسا دا ءتاتتى تۇرمىس، ءان باياعى.
سال كۇندەر ساعىم قۋعان ساعىندىردى،
حورلان-اي،
سارى بالا دالادا سارعايادى.
شاهيباز
اۋىلىڭا شىعىپ ەم قارقارادان،
قارقارانىڭ باسىنان ءان تاراعان، شاهيباز.
ات ارىتىپ الىستان كەلگەنىمدە،
قارسى ءجۇرشى كەرىلىپ، قالقا، ماعان، شاهيباز.
قايىرماسى:
سارى ساماۋرىن سان قايناپ،
ساعىندىم، ساۋلەم سەنى ويلاپ.
قيىر قىستاپ، شەت جايلاپ،
كەلەر مە ەكەن ءدام ايداپ.
قارا سۋدىڭ جاعاسى قارا بارقىن،
«قاراق»، «شىراق» دەۋشى ەدىم ءسوزدىڭ سالتىن، شاهيباز.
باسى - كۇمىس ءسوزىمنىڭ، اياعى - التىن،
ايتقىزباي-اق تۇسىنگىن كوڭىل پارقىن، شاهيباز.
قايىرماسى.
شاكيدانىڭ ءانى
باسىندا تۇلكى بورىك تۇبىتتەگەن،
سەرتىنە تۇرار بولار جىگىت دەگەن.
ءبىز جاققا ءبىر سوقپادىڭ الا جازداي،
كىم ەكەن سەنى ۇيگە كىلتتەگەن.
بارادى كوشىپ اۋىل قىردان ءارى،
جۇرەكتە جىر قالادى، نۇر قالادى.
قىز بولىپ تۋىلعان سوڭ قايرانىم جوق،
كوڭىلىم ءبىر سەنى ويلاپ مۇڭدانادى.
سارى التىن ون ساۋساعىم، كۇمىس بىلەك،
قۇدايدان ساعان قوس دەپ قىلدىم تىلەك.
ءبىر حابار ءسىزدىڭ جاقتان كەلمەگەندە
تاعات قىپ تۇرا المايدى ءبىزدىڭ جۇرەك.
شىراعىم، ويلانشى ءوزىڭ
پايدا جوق ويلاعاندا جالقاۋلىقتان،
تالايدى بۇل جالقاۋلىق ۇرىپ جىققان.
شىراعىم، ويلانشى ءوزىڭ-اي.
ەڭبەكتەن، مال باعۋدان، وقۋ، ىستەن،
قۇر قالار جالقاۋلىققا باسىن تىققان.
شىراعىم، ويلانشى ءوزىڭ-اي.
شىركىن-اي
(1- ءتۇرى)
كەيىن اق تىماعىم اي-ەي شوقتاي-شوقتاي-اي،
باسايىن اۋسا تۇيەم، شىركىن-اي،
توقتاي-توقتاي-اي.
كەتكەندە جەرىڭ شالعاي-اي، ەي قاراعىم-ەي،
جۇرەيىن ولەڭمەنەن، شىركىن-اي،
جوقتاي-جوقتاي-اي.
شىركىن-اي
(2- ءتۇرى)
جىلقى ايدايمىن كوشكەندە-ەي دونەنمەنەن،
الما مويىن ارعىماق، شىركىن-اي، داۋرەن-اي،
كوبەڭمەنەن، ايداي-اي.
جاس وسپىرىم جەتكىنشەك بالالارعا،
ايتار ءسوزىم مىنەكي، شىركىن-اي،
داۋرەن-اي، ولەڭمەنەن، ايداي-اي.
دايىم مەنىڭ مىنگەنىم-ەي، قۇلا سەرەك،
ءوزىم ءانشى توپ جارعان، شىركىن-اي،
داۋرەن-اي، بۇلا سەرگەك، ايداي-اي.
سارى مايداي ساقتاعان-ەي ولەڭىڭدى،
وسىندايدا ايتپاساڭ، شىركىن-اي،
داۋرەن-اي، نەگە كەرەك، ايداي-اي.
شىركىن-اي
( 3- ءتۇرى)
مىنگەنىم دايىم مەنىڭ-ەي سۋسىل سارى،
جەل سوقسا سۋسىلدايدى شىركىن-اي،
اتتىڭ جالى-ەي-اۋ.
كەتكەندە الىس اۋلىڭ-ەي، قاراعىم-اي،
جۇرمەيدى تاماعىمنان، شىركىن-اي،
جالعىز تارى-ەي-اۋ.
ىبىگاي-اۋ
اۋلىم كوشىپ بارادى-ەي بەلدەن اسىپ،
بەلدەن اسقان بۇلتپەنەن-ەي،
ىبىگاي-اۋ، ارالاسىپ-اي.
اۋلىڭ الىس كەتكەندە-ەي قيماس قالقام،
اق قاعازبەن جۇرەيىك-ەي،
ىبىگاي-اۋ، امانداسىپ.
ىدىگاي
ولەڭىم اعايىندى، ابىسىندى،
قامشىمنىڭ سازعا تاستاپ، سابى سىندى.
ءجۇرۋشى ەم جاس كۇنىمدە اساۋ تايداي،
قارتايىپ ەندى مەنىڭ ساعىم سىندى.
قايىرماسى:
وي ىدىگاي،
اتتەڭ قالقا قايتەيىن،
كۇنىم اي-اۋ.
ولەڭدى ايت دەگەندە ىركىلمەيمىن،
كىسىنى جاقسى كورگەن شىركىن دەيمىن.
الدىندا كوپشىلىكتىڭ ءان سالعاندا.
جورعاداي جولعا تۇسكەن بۇلكىلدەيمىن.
قايىرماسى.
ىدىگاي گوي
ەي، احاۋ قولىمدا ءبىر قامشىم بار التىنداعان،
كەي جامان ۇستاي الماي قالتىلداعان.
قايىرماسى:
ىدىگاي-گاي، گوي
ىدىگاي گاي-اۋ
كەتكەندە اۋىلىڭ الىس قيماس قالقا،
كوزىڭنەن اينالايىن جالتىلداعان.
قايىرماسى.
ىدىگاي شىركىن، كۇنىم-اي
اۋىلىڭ كوشىپ بارادى بەلتۇرعانعا-ەي،
بيىك اعاش مايىسار جەل تۇرعاندا.
ىدىگاي، شىركىن كۇنىم-اي-اۋ.
كۇن مەن ايىن وزگەنىڭ نە قىلايىن ەي،
كوز الدىمدا بۇرالىپ سەن تۇرعاندا.
ىدىگاي شىركىن، كۇنىم-اي-اۋ.
ىلىگ-اي
قارا كوك جىلقى ىشىندە سەتەر ەكەن،
كۇلمەگەن، ويناماعان بەكەر ەكەن-اي.
قايىرماسى:
ىلىگ-اي، قىزىق-اي،
قالالاكىم-اي، ءالي-لاي،
قالار ءبىر كۇن-اي دۇنيە-اي.
جاستىق شاق كوك سەمسەردىڭ جۇزىندەي بوپ،
از كۇندە جالت-جۇلت ەتىپ-اي وتەدى ەكەن-اي.
قايىرماسى.
قاراكوك جىلقى ىشىندە سىلاڭ قاققان،
ومىلدىرىك، كەجىمىن ساندەپ جاپقان.
قايىرماسى.
ورالىڭنىڭ بارىندا كۇل دە وينا،
قىزىل تۇلكى دۇنيە بۇلاڭ قاققان.
قايىرماسى.
ىلىك-اي، ساۋلەم، ىلىك-ايداي
ولەڭ باسى ءبىسمىللا شەتەن دەيدى-اي، وۋ،
ءبىسمىللاسىز ايتقان ءسوز بوتەن دەيدى-اي، وي.
قايىرماسى:
ىلىك-اي، ساۋلەم،
ىلىك ايداي،
كەلسە شاماڭ،
كۇلىپ-وينا-اي!
ءبىسمىللانى اۋزىڭا ءۇش كەلتىرسەڭ-اۋ،
شايتان قاشىپ جولىڭنان كەتەر دەيمىن-اۋ.
قايىرماسى.
اقىن ەمەس، مەن ءوزىم اق ماڭدايمىن-اۋ،
اقىنمىن دەپ ەشكىمگە ماقتانبايمىن-اۋ.
قايىرماسى.
ايتار كىسى الدىما كەز كەلگەندە-اۋ،
قىبىلادان قىزىل جەل سوققاندايمىن-اۋ.
قايىرماسى.
ىركۋجان
جىلقى ايدايمىن كوشكەندە كەر كەكىلمەن، اي-ۋگاي
اۋىق-اۋىق ايمالاپ جەل بەتىمنەن.
قايىرماسى:
ىركۋجان جان-جان-اي،
ۇكىلى باعىلان-اي.
كوش جونەكەي شىرقاتىپ ءان سالعاندا، اي-ۋگاي،
قىز-كەلىنشەك شاتتانىپ تەربەتىلگەن.
قايىرماسى.
قىزدىڭ اتى قىز ەمەس، قىزىل ءبيداي، اي-ۋگاي
تۇندە جۇرەم قىز ءۇشىن كوڭىلىن قيماي.
قايىرماسى.
بەلدە بەلبەۋ قالمادى، باستا بورىك، اي-ۋگاي،
قىزدى اۋىلدىڭ جەڭگەسىن، سىيلاي-سىيلاي.
قايىرماسى.
ياكۋلاي
باسىنان قۇلامانىڭ قۇلاي جاتتىم،
ءوزىڭدى كورىنگەننەن سۇراي جاتتىم،
ياكۋلاي-ياكۋلاي-ياكۋلاي،
قالقاتاي.
كوز كورگەن قۇربىم ەدى ءبىر كەلەر دەپ،
ءتورت بولىپ ەكى كوزىم، سىناي جاتتىم.
ياكۋلاي، ياكۋلاي، ياكۋلاي،
قالقاتاي.
ياپىر-اي
جاز بولسا جارقىراعان كولدىڭ بەتى،
كوگەرىپ تولقىندايدى، ياپىر-اي، الىس شەتى.
دىرىلدەپ تولقىن باسقان ءمولدىر سۋىن،
شايقايدى جاس بالاداي، ياپىر-اي، جەلدىڭ لەبى.
التىن بۋ اق كوبىكتىڭ بەتىن جابار،
سۋدان بۋ كوككە تونىپ، ياپىر-اي، مارجان تاعار.
ەسىمە اق ەركەمدى العان كەزدە،
اق مارجان جىلت-جىلت ەتىپ، ياپىر-اي، جەرگە تامىر.
ياپىراي، جەڭگەم-اي
ال قىزىل بوپ كورىنەر-ەي قاشقان تۇلكى،
قايدا قالماس جىگىتتىڭ، ياپىر-اي، جەڭگەي-اي،
جيعان مۇلكى، ايداي-اي.
قاباعىڭدى تۇيمەشى اسىل جەڭگەم،
ارىلماسىن اۋىلدان، ياپىر-اي، جەڭگەي-اي،
ويىن-كۇلكى، ايداي-اي.
ياپىرماي، اعاجان
دايىم مەنىڭ مىنگەنىم الا قۇنان-ەي،
الا قۇنان ۇركەدى، ياپىرم-اي اعاجان،
اياعىنان ءا-گوي-گا-ياي.
شىنتى بەيىلىڭ، شىن كوڭىلىڭ مەندە بولسا-ەي،
تابىسايىق اق قورىم، ياپىرم-اي، اعاجان،
اياعىنان ءا-گەي-گاياي.
ياپىرماۋ، ءا
مىنگەنىم دايىم مەنىڭ سۋسىل سارى-اي،
سۋسىلدار شاپقان سايىن اتتىڭ جالى-اي.
ياپىرماۋ-ا.
كەتكەندە اۋىلىڭ الىس، ەي قالقاتاي-اي،
وتپەيدى تاماعىمنان جالعىز تارى-اي.
ياپىرماۋ-ا.
مىنگەنىم دايىم مەنىڭ ۇزىن قۇلا ات-اي،
بۇلعىننىڭ ەكى جاعى مالعا سۋات-اي.
ياپىرماۋ-ا.
كەتكەندە اۋىلىڭ الىس، ەي، قالقاتاي-اي،
ايتايىن انگە سالىپ داتكە قۋات-اي.
ياپىرماۋ-ا.
