قازاق دالاسىندا تۋعان العاشقى كەرقۇلان قۇلىندارىنا ات قويىلدى
استانا. KAZINFORM - قازاقستان دالاسىندا دۇنيەگە كەلگەن العاشقى كەرقۇلان (پرجيەۆالسكي جىلقىسى) قۇلىندارى ەندى بوتاي جانە تۇمار دەپ اتالادى، دەپ حابارلايدى ورمان شارۋاشىلىعى جانە جانۋارلار دۇنيەسى كوميتەتىنىڭ باسپا ءسوز قىزمەتى.
ولار بيىل جازدا «التىن دالا» مەملەكەتتىك تابيعي رەزەرۆاتى اۋماعىنداعى «ءالىبي» جابايى تۇياقتىلاردى رەينترودۋكتسيالاۋ ورتالىعىندا دۇنيەگە كەلدى. بۇگىندە قۇلىندار ءبىر ايدان استى. كۇن وتكەن سايىن بەلسەندى بولىپ، اينالانى زەرتتەپ، ءوز ۇيىرىمەن بىرگە جۇرۋگە بىرتىندەپ بەيىمدەلىپ كەلەدى.
بوتاي - تەسسا بيەنىڭ قۇلىنى، ال تۇمار - ۋمبرانىڭ ءتولى. ەكى بيە دە قازاقستانعا 2024 -جىلى بەرلين تيرپاركىنەن اكەلىنگەن جانە العاش رەت انا اتاندى.
قۇلىنداردىڭ ەسىمىندە دە ەرەكشە ءمان بار. بوتاي اتاۋى ادام مەن جىلقى اراسىنداعى قارىم-قاتىناس تاريحىندا ماڭىزدى ءىز قالدىرعان بوتاي ارحەولوگيالىق مادەنيەتىمەن بايلانىستى. ال تۇمار - قازاق تانىمىنداعى قورعانىش پەن اماندىقتىڭ نىشانى.
- بوتاي مەن تۇماردىڭ دۇنيەگە كەلۋى - «جابايى جىلقىلاردى قايتارۋ» جوباسىنداعى جاڭا كەزەڭ. العاشقى كەرقۇلانداردىڭ قازاقستانعا كەلۋى ولاردىڭ تاريحي مەكەنىنە ورالۋىنىڭ باستاماسى بولسا، ەندى قازاق دالاسىندا تۋعان تولدەر جاڭا ۇرپاقتىڭ قالىپتاسا باستاعانىن بىلدىرەدى. قازىر بوتاي مەن تۇمار مامانداردىڭ تۇراقتى باقىلاۋىندا ءوسىپ كەلەدى. الدا ولاردى كەڭ دالا، ۇيىردەگى ءومىر جانە وزدىگىنەن تىرشىلىك ەتۋگە ۇيرەنەتىن ۇزاق جول كۇتىپ تۇر، - دەلىنگەن كوميتەت تاراتقان اقپاراتتا.
