قازاننان باستاپ نە قىمباتتايدى؟
كۇزدىڭ قارا سۋىعى جاقىنداعان سايىن قىمباتشىلىقتىڭ دا جەلى ەسە باستادى. قازان ايىنان باستاپ ەلىمىزدە ءتۇرلى سالادا باعالار كوتەرىلۋى مۇمكىن. ەلەكتر ەنەرگياسى، جانارماي، جىلۋ تاريفى، شەتەلگە ساپارلار مەن بانكتىك قىزمەتتەر - بارلىعى دا قىمباتشىلىقتىڭ ءدامىن سەزدىرەدى. ءبىرى رەسمي تۇردە جاريالاندى، ەندى ءبىرى تالقىلاۋ ساتىسىندا تۇر، دەپ جازادى Ozgeris.info.
جارىقتىڭ باعاسى كوتەرىلۋى مۇمكىن
الماتىدا ەلەكتر ەنەرگياسىنىڭ ءتاريفى كوتەرىلەتىنى تۋرالى ماسەلە كوتەرىلدى. ءقازىر ءار كيلوۆاتت ساعات 31 تەڭگە 85 تيىن بولسا، قازان ايىندا 38 تەڭگەگە دەيىن جەتۋى مۇمكىن. تابيعي مونوپوليالاردى رەتتەۋ كوميتەتى تۇرمىستىق تۇتىنۋشىلار ءۇشىن ازىرگە باعا وزگەرمەيتىنىن ايتقانىمەن، بۇل جاي حالىقتى سابىرعا شاقىرۋ عانا سياقتى. قورىتىندى شەشىم قىركۇيەكتىڭ جيىرما بەسىنەن كەيىن بەلگىلى بولادى.
ەنەرگيامەن جابدىقتاۋشى كومپانيا ۇسىنعان جوباعا سايكەس، تۇتىنۋ دەڭگەيىنە قاراي ءۇش ءتۇرلى باعا بەلگىلەنبەك. نورماعا ساي تۇتىنعاندار ءۇشىن باعا تومەنىرەك، ال ارتىق پايدالانعاندار ءۇشىن ءبىر كيلوۆاتت ساعاتتىڭ قۇنى ەلۋ تەڭگەدەن اسۋى ىقتيمال. بۇل قاراپايىم تۇرمىستىق دەڭگەيدە ءاربىر وتباسىعا ۇنەمدىلىككە كوبىرەك كوڭىل بولۋگە تۋرا كەلەتىنىن كورسەتەدى.
ەگيپەتكە ساپار - قالتاعا سالماق
قازاقستاندىق تۋريستەردىڭ سۇيىكتى باعىتى سانالاتىن ەگيپەتكە بارۋ قازاننان باستاپ قيىنداي تۇسپەك. ەندى جيىرما ءبىر جاسقا تولماعان جاستار تەك اتا-انالارىمەن بىرگە نەمەسە نوتاريالدى كەلىسىمحاتپەن عانا كىرە الادى. قۇجاتتا ساپار مەرزىمى مەن ەلدىڭ اتاۋى ناقتى كورسەتىلۋى شارت.
سونىمەن قاتار سيناي تۇبەگىنەن تىس ايماقتارعا بارۋ ءۇشىن جيىرما بەس دوللارلىق ۆيزا، كەپىلدىك حات جانە قابىلداۋشى تاراپتىڭ كەلىسىمى تالاپ ەتىلەدى. بۇرىن ارزان ءارى قولجەتىمدى بولىپ كەلگەن بۇل باعىت ەندى وتباسىلارعا قوسىمشا شىعىن اكەلمەك. تۋريزم سالاسىنىڭ ماماندارى مۇنداي وزگەرىستەردىڭ قازاقستاندىقتاردىڭ ەگيپەتكە بارۋ جوسپارىن تەجەيتىنىنە سەنىمدى.
جانارماي نارىعىندا تاعى دا دۇربەلەڭ
اتىراۋ مۇناي وڭدەۋ زاۋىتى قازان ايىنىڭ باسىنان جيىرما بەسىنە دەيىن جوندەۋ جۇمىستارىنا توقتايدى. باياۋ كوكستەۋ قوندىرعىسىنىڭ ىستەن شىعۋى جانارماي وندىرىسىنە تىكەلەي اسەر ەتەدى. ۇلتتىق كومپانيا قويمالارداعى قور جەتكىلىكتى دەپ سەندىرىپ وتىرعانىمەن، تاجىريبە كورسەتكەندەي مۇنداي ۇزىلىستەر ءارقاشان باعا وسىمىنە الىپ كەلەدى.
ءقازىردىڭ وزىندە اي 92 جانە اي 95 ماركالارىنىڭ باعاسى كوتەرىلە باستاعانى بايقالادى. ساراپشىلار قازان ايىندا بەنزين قۇنى تاعى دا وسەدى دەپ بولجايدى. بۇل تەك كولىك يەلەرىنە عانا ەمەس، ازىق- تۇلىك پەن كۇندەلىكتى تاۋار باعاسىنا دا اسەر ەتەدى.
دەپوزيت وسسە، كرەديت قىمباتتايدى
ۇلتتىق بانكى ينفلياتسيانى تەجەۋ ماقساتىندا بازالىق مولشەرلەمەنى ون جەتى جارىم پايىزعا دەيىن كوتەرۋى مۇمكىن. مۇنداي شەشىم قازاننىڭ ونى كۇنى قابىلدانباق. بۇل دەپوزيتتەردىڭ تابىستىلىعىن ارتتىرعانىمەن، حالىق ءۇشىن كرەديتتىڭ قىمباتتاۋىنا اكەلەدى.
كاسىپكەرلەر ءۇشىن قارىز الۋ شىعىنى ارتادى، ال حالىق ءۇشىن تۇتىنۋشىلىق كرەديتتەر قولجەتىمسىز بولا باستايدى. ساراپشىلار بۇل قادام ەكونوميكانىڭ قىسقا مەرزىمدى ءوسىمىن باياۋلاتۋى مۇمكىن ەكەنىن ەسكەرتەدى.
جىلۋ باعاسى قالتاعا سالماق سالادى
الماتىدا جىلىتۋ ماۋسىمى اۋا رايىنا بايلانىستى قازان ايىندا باستالۋى ىقتيمال. ەگەر بەس كۇن قاتارىنان ورتاشا تەمپەراتۋرا سەگىز گرادۋستان تومەن بولسا، جىلۋ بەرىلەدى. بۇل كەزدە قاراشاداعى تۇبىرتەكتەردە جاڭا تاريفپەن ەسەپتەلگەن تولەمدەر كورسەتىلەدى.
جاڭا تاريف بويىنشا ءار شارشى مەترگە تولەنەتىن سوما 198 تەڭگە 48 تيىننان 235 تەڭگە 06 تيىنعا دەيىن ءوستى. بۇل ون سەگىز پايىزدىق ءوسىم دەگەن ءسوز. ارينە، بۇل وزگەرىس قاراپايىم وتباسى بيۋدجەتىنە ەلەۋلى سالماق تۇسىرەدى.
حالىق ءۇشىن بۇل كەزەڭدە ەڭ باستىسى - ۇنەمشىلدىك پەن قارجىنى دۇرىس جوسپارلاۋ. ال بيلىك ءۇشىن - الەۋمەتتىك قولداۋدى كۇشەيتۋ، حالىقتىڭ تۇرمىسىنا اۋىر سالماق تۇسىرمەيتىن شەشىمدەر قابىلداۋ.
