قازان ايىندا ماۋسىمدىق ماماندىقتارعا سۇرانىس ارتتى

استانا. KAZINFORM - قازان ايىندا ەلەكتروندىق ەڭبەك بيرجاسىندا 123,7 مىڭ بوس جۇمىس ورنى جانە 106 مىڭ تۇيىندەمە ورنالاستىرىلدى.

الدىڭعى ايمەن سالىستىرعاندا ىزدەۋ جانە جالداۋ بەلسەندىلىگى تومەندەدى: بوس جۇمىس ورىندارىنىڭ سانى %9 عا (13 مىڭ)، ال تۇيىندەمە %13 عا (16,5 مىڭ) ازايدى. بەلسەندىلىكتىڭ تومەندەۋى ءبىلىم بەرۋ سالاسىنداعى سۇرانىس پەن ۇسىنىستىڭ تومەندەۋىمەن تۇسىندىرىلەدى، وقۋ ورىندارىندا كادرلاردى دايارلاۋدىڭ اياقتالۋىنا بايلانىستى بولۋى مۇمكىن.

«الايدا، قىركۇيەك ايىنداعى سياقتى، جىلىتۋ ماۋسىمىنا كوشۋ كەزەڭى جىلۋ جانە قازاندىق جابدىقتارىنا قىزمەت كورسەتۋ مەن ولاردى پايدالانۋعا قاتىستى قىزمەتكەرلەرگە سۇرانىستىڭ ارتۋىنا سەبەپ بولدى.

ماسەلەن، وتكەن ايدا قازاندىق وپەراتورلارى (+5,9 مىڭ)، قازاندىق ماشينيستەرى (+1,1 مىڭ) جانە قازاندىقتار جۇمىسكەرى (+969) ءۇشىن بوس ورىندار سانى ارتتى. مۇنداي ماماندارعا جوعارى سۇرانىس باتىس قازاقستان (2,9 مىڭ بوس جۇمىس ورنى)، اقتوبە (1,3 مىڭ) جانە جامبىل (974) وبلىستارىندا بايقالدى»، - دەپ جازدى ەڭبەك جانە حالىقتى الەۋمەتتىك قورعاۋ مينيسترلىگىنەن.

سۇرانىستىڭ ايتارلىقتاي ءوسۋى مال وسىرۋشىلەر مەن جانۋارلاردى كۇتۋ جۇمىسكەرلەرى سياقتى ماماندىقتارعا دا تىركەلدى، بۇل اسىرەسە، مال شارۋاشىلىعىنداعى قىسقى كەزەڭگە دايىندىق كەزەڭىندە ماڭىزدى.

«وڭىرلەر بولىنىسىندە ەڭ بەلسەندى بىلىكتى كادرلاردى قاراعاندى وبلىسىنان (9,5 مىڭ بوس جۇمىس ورنى نەمەسە جالپى سانىنىڭ %8)، سونداي-اق الماتى قالاسىنان (9,3 مىڭ نەمەسە %7,5)، باتىس قازاقستان وبلىسىنان (9,2 مىڭ نەمەسە %7,5) جانە استانا قالاسىنان (8,1 مىڭ نەمەسە %7) جۇمىس بەرۋشىلەر ىزدەدى.

بۇل رەتتە قازان ايىندا بوس جۇمىس ورىندارىنىڭ جالپى سانى كەلەسى وڭىرلەردە ازايدى: الماتى (%44-، نەمەسە -3,9 مىڭ)،

جەتىسۋ (%37-، نەمەسە -1,6 مىڭ) جانە استانا قالاسىندا (%34-، نەمەسە -4,1 مىڭ)»، - دەلىنگەن اقپاراتتا.

سۇرانىس پەن ۇسىنىستىڭ تەڭگەرىمسىزدىگى كەيبىر اۋماقتاردا وزەكتى ماسەلە بولىپ قالا بەرەدى. ماسەلەن، شىعىس قازاقستان وبلىسىندا 5,5 مىڭ بوس ورىنعا 2,5 مىڭ تۇيىندەمە، سولتۇستىك قازاقستان وبلىسىندا 4,1 مىڭ بوس ورىنعا 2 مىڭ تۇيىندەمە، ال پاۆلودار وبلىسىندا 6,5 مىڭ بوس ورىنعا 3,4 مىڭ تۇيىندەمە تىركەلدى.

شىمكەنت قالاسىندا، قىزىلوردا جانە تۇركىستان وبلىستارىندا بوس ورىندار سانىنان تيىسىنشە %54، %48 جانە %47- عا تۇيىندەمەنىڭ ارتىق بولۋى بايقالۋدا.

قازان ايىندا جوعارى جالاقى باس قۇرىلىسشىلارعا (ورتا ەسەپپەن 679 مىڭ تەڭگە)، باس تەحنيكالىق ماماندارعا (شامامەن 565 مىڭ تەڭگە) جانە ۇشۋ قاۋىپسىزدىگى جونىندەگى ينجەنەرلەرگە (شامامەن 554 مىڭ تەڭگە) ۇسىنىلدى.

بۇل رەتتە ينۆەستيتسيالىق جوبالار جونىندەگى ديرەكتور (ورتا ەسەپپەن 2 ميلليون تەڭگەدەن باستاپ) ، ءوندىرىستى باسقارۋدىڭ اۆتوماتتاندىرىلعان جۇيەسى ءبولىمىنىڭ باستىعى (شامامەن 1,8 ميلليون تەڭگە) جانە كومباينەر (1,2 ميلليون تەڭگە) لاۋازىمىنا ۇمىتكەر ىزدەنۋشىلەر ەڭ جوعارى جالاقىنى سۇرادى.

جالپى، قازان ايىندا ەەب بەلسەندىلىك تومەندەدى، بۇل اسىرەسە، ءبىلىم بەرۋ سالاسىندا بايقالىپ وتىر. سونىمەن قاتار قىسقى ماۋسىمنىڭ باستالۋى جىلۋ ءوندىرىسى جۇيەسىنىڭ جۇمىسشىلارىنا سۇرانىستىڭ ارتۋىنا سەبەپ بولدى.

اۆتور
اسحات رايقۇل