قازا تاپقان كەنشىلەردىڭ بالالارىنا بارلىق قاجەتتى قولداۋ كورسەتىلەدى
كوستەنكو شاحتاسىنداعى ورتتەن قازا تاپقان كەنشىلەردىڭ بالالارىنا بارلىق قاجەتتى قولداۋ شارالارى كورسەتىلەدى.
بۇل تۋرالى وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتىنەن ءمالىم ەتتى، دەپ حابارلايدى Kazinform.
قاراعاندى وبلىسىندا كوستەنكو اتىنداعى شاحتادا بولعان قايعىلى وقيعاعا بايلانىستى وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى قازا تاپقانداردىڭ وتباسىلارىنا كوڭىل ايتادى. وقۋ-اعارتۋ ءمينيسترىنىڭ تاپسىرماسى بويىنشا قازا تاپقان كەنشىلەردىڭ بالالارىنا بارلىق قاجەتتى قولداۋ شارالارى كورسەتىلەتىن بولادى»، - دەلىنگەن كوميتەتتىڭ Instagram پاراقشاسىندا جاريالانعان اقپاراتتا.
ۆەدومستۆو مالىمەتىنشە، قاراعاندى وبلىستىق ءبىلىم باسقارماسىنىڭ جانىنان قازا تاپقان جانە زارداپ شەككەندەردىڭ بالالارىنا كومەك كورسەتۋ ءۇشىن وقۋ- اعارتۋ مينيسترلىگىنىڭ، ءبىلىم باسقارماسىنىڭ، قاراعاندى وبلىسىنىڭ بالا قۇقىعى جونىندەگى وڭىرلىك ۋاكىلىنىڭ، مەكتەپتەردىڭ، الەۋمەتتىك پەداگوگتاردىڭ، پەداگوگ-پسيحولوگتاردىڭ وكىلدەرىنەن تۇراتىن موبيلدىك توپ قۇرىلدى.
موبيلدى توپ جۇمىسىنىڭ اياسىندا بالالاردىڭ تىزىمدەرى قالىپتاستىرىلۋدا. قازا تاپقان جانە زارداپ شەككەندەردىڭ وتباسىلارىنان شىققان بالالارعا جان-جاقتى پسيحولوگيالىق كومەك كورسەتىلەدى.
