قازا تاپقان ازەربايجان ازاماتتارىنىڭ دەنەسى وتانىنا جونەلتىلدى

اقتاۋ. قازاقپارات- 28 -جەلتوقسان كۇنى، ساعات 23:30 شاماسىندا اقتاۋدان اۋە اپاتىندا قازا تاپقان 24 ازەربايجان ازاماتىنىڭ (ونىڭ ىشىندە ۇشەۋى ەكيپاج مۇشەسى) دەنەسى ەلىنە جونەلتىلدى.

سوڭعى كۇندەرى قازا تاپقانداردىڭ دەنەلەرىن انىقتاۋ بويىنشا تىنىمسىز جۇمىستار جۇرگىزىلدى. انىقتاۋ كەزىندە د ن ق تالداۋى جۇرگىزىلىپ، جاقىن تۋىستارى قاتىستى.

ەسكە سالا كەتسەك، 25- جەلتوقسان كۇنى بولعان اۋە اپاتىنان 29 ادام امان قالدى. ولارعا مەملەكەت باسشىسىنىڭ تاپسىرماسىمەن ەلوردادان كەلگەن بىلىكتى ماماندار ساپالى مەديتسينالىق كومەك كورسەتتى.

مەديتسينالىق كومەك العان ازەربايجاننىڭ 14 ازاماتى ەلىنە ورالدى.

ماڭعىستاۋ وبلىسىنىڭ اكىمدىگى جەرگىلىكتى اتقارۋشى ورگان وكىلدەرى اپاتتان زارداپ شەككەندەردىڭ جانە قازا تاپقانداردىڭ وتباسىلارىنا جان- جاقتى قولداۋ كورسەتۋدى جالعاستىراتىنىن ءمالىم ەتتى.

اقتاۋ ماڭىندا ۇشاق اپاتىنان قازا تاپقان 24 ادامنىڭ دەنەسى بۇگىن باكۋگە جەتكىزىلەتىنىن جازعان بولاتىنبىز.