قازۇۋ-دا تاعى ستۋدەنتكە قاتىستى شۋ شىقتى: پوليتسيا تەرگەۋدى باستادى

الماتى. KAZINFORM - ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى وزىنە جاراقات سالعان.

әл-Фараби атындағы ҚазҰУ
Фото: Gov.kz

الەۋمەتتىك جەلىلەردە قازۇۋ-دىڭ مەحانيكا-ماتەماتيكا فاكۋلتەتىندە وقيتىن ستۋدەنت قىزعا قاتىستى وقىس جاعداي بولعانى تۋرالى اقپارات تارادى. جەلى قولدانۋشىلارىنىڭ مالىمەتىنشە، قىز №12 قالالىق كلينيكالىق اۋرۋحاناعا جەتكىزىلگەن.

الماتى قالالىق پوليتسيا دەپارتامەنتى اتالعان دەرەك بويىنشا سوتقا دەيىنگى تەرگەۋ باستالعانىن مالىمدەدى.

- الدىن الا مالىمەت بويىنشا، وقۋ ورىندارىنىڭ بىرىندە ستۋدەنت قىزدىڭ ءوزىن جەڭىل جاراقاتتاۋ دەرەگى تىركەلگەن. وعان مەديتسينالىق كومەك كورسەتىلدى،- دەپ حابارلادى پوليتسيا.

ال ۋنيۆەرسيتەت وكىلدەرى جەلىدە تاراعان اقپاراتتى جوققا شىعاردى. سوزدەرىنشە، مۇنداي جايت راستالمادى.

بۇل قازۇۋ توڭىرەگىندەگى العاشقى داۋ ەمەس.

ەسكە سالساق، بۇعان دەيىن دە قازۇۋ-دا ستۋدەنتتىڭ وزىنە قول سالۋىنا قاتىستى قىلمىستىق ءىس قوزعالعان ەدى.

عىلىم جانە جوعارى ءبىلىم ءمينيسترى ساياسات نۇربەك ءال-فارابي اتىنداعى قازۇۋ ستۋدەنتىنىڭ قايتىس بولۋىنا قاتىستى پىكىر ءبىلدىرىپ، ۋنيۆەرسيتەت باسشىلىعى مارقۇمنىڭ وتباسىنا قاجەتتى كومەك كورسەتكەنىن مالىمدەدى.

سودان كەيىن الماتىدا تاعى دا قازۇۋ ستۋدەنتى قازا تاپتى. ءبىرىنشى كۋرس ستۋدەنتىن ەكىنشى كۋرس ستۋدەنتى ۇرىپ ءولتىردى دەپ ايىپتالىپ وتىر.

كۇدىكتى ۇستالىپ، پرورەكتور مەن دەكان جۇمىسىنان كەتتى.

ەكى جايتتان كەيىن قازۇۋ-عا مينيسترلىكتىڭ ارنايى توبى باراتىنى بەلگىلى بولدى.