قاۋىپتى ويىن: بالالارىمىز كىمنىڭ تاپسىرماسىن ورىنداپ ءجۇر

الەۋمەتتىك جەلىدە بالالاردى قاۋىپتى ءىس-ارەكەتتەرگە يتەرمەلەيتىن ويىن تاراپ جاتىر. ول «اتا-اناڭا قارسى شىق!»، «ۇيدەن قاشىپ كەتۋدىڭ امالىن تاپ!» دەگەن قيتۇرقى تاپسىرمالارعا تولى. ءتىپتى، سۋعا باتىپ ولۋگە، شاتىردان سەكىرۋگە ۇگىتتەيتىن كورىنەدى. بۇل تۋرالى JIBEK JOLY ارناسى مالىمدەدى.

وسىدان نەبارى ەكى اي بۇرىن شىققان قاۋىپتى ويىندى الەم بويىنشا 10 ميلليون بالا جۇكتەگەن. سولاردىڭ قاتارىندا استانالىق ايدانا الجانوۆانىڭ قىزدارى دا بار. بۇلدىرشىندەر ويىننىڭ جارناماسىن تيكتوك جەلىسىنەن كورگەن.

«ءىنىم، ءسىڭىلىم ۇشەۋمىز بىرگە وينادىق. وندا شاتىرعا ءمىنىپ الۋىڭ كەرەك. سوسىن قاشا بەرەسىڭ، قاشا بەرەسىڭ، ماماڭ ۇستاپ الماۋى كەرەك باستىسى»، - دەپ ءتۇسىندىردى بالالاردىڭ ءبىرى ەركەنۇر رۇستەم.

ابىروي بولعاندا، قىزدار ۆيرتۋالدى الەمدەگى جانتۇرشىگەرلىك ءىس-ارەكەتتەردى قايتالاپ ۇلگەرمەگەن. اناسى ويىندى دەر كەزىندە بايقاپ، ءوشىرىپتى.

«چاتتاردا اتا-انالار شۋلاي باستى. سوسىن ءمان بەرىپ قاراسام، شىنىمەن اتا-اناعا قارسى قوياتىن قورقىنىشتى ويىن ەكەن. ءار تاپسىرماعا، ۇيدەن قاشىپ شىققاننىڭ وزىنە ءبىر بالل بەرەدى»، - دەيدى اتا-انا اسەل ەرنازاروۆا.

قاۋىپتى ويىنداردى سمارتفونعا جۇكتەۋ وپ-وڭاي. جاسىن سۇرامايدى، اتا-انا رۇقساتىن تالاپ ەتپەيدى. الايدا، مۇندا اتىشۋلى «سيني كيت»، «تيحي دوم» ويىندارىنداعىداي سۋيتسيدكە يتەرمەلەيتىن كۋراتور جوق. مۇنىڭ ءتاسىلى مۇلدەم جاڭاشا. ول مۋزىكا، ادەمى گرافيكا ارقىلى باۋرايدى. بۇعان ەلىككەن بالا ۆيرتۋالدى الەمدەگى تەنتەك وقۋشىنىڭ ءرولىن سومداپ، ءتۇرلى قورقىنىشتى ارەكەتتەرگە بارادى.

«ول ويىندى ءوزىم دە كوردىم. بالا ءبارىن زەرتتەي الادى، سىرتقا شىعا الادى. ونىڭ ءار ارەكەتىنە ودوبرەنيە بەرىلىپ وتىرادى. ياعني، بالا سىرتتان الا الماعان ەموتسيالارىن ءدال سول ويىن ارقىلى تولتىرادى»، - دەيدى بالالار پسيحولوگى ايدانا دۇشمانوۆا.

ق ح ا جانىنداعى انالار كەڭەسى ءتوراعاسىنىڭ ورىنباسارى بايان احاتاي قاتەرلى ويىنداردى ۇزاق جىل زەرتتەگەن. ءتىپتى، «سيني كيتتىڭ» كەسىرىنەن اجال قۇشقان بالالاردىڭ جاقىندارىمەن تىلدەسىپتى. ايتۋىنشا، مۇنداي قوسىمشالاردىڭ قۇرىعىنا اتا-اناسىمەن ءتىل تابىسا الماعان، كۇيزەلىستە جۇرگەن بالالار تۇسەدى.

«وسدان ءۇش-ءتورت جىل بۇرىن سونداي وقيعا بولدى. بالا شاتىرعا ءمىنىپ، 17-قاباتتان قۇلاپ تۇسكەن. ويىن سەكىرسەڭ، جۇماققا تۇسەسىڭ دەپتى. سوندا ول جۇماقتى كوكتەن ىزدەپ جۇرسە، ۇيىندە جۇماق بولماعانى عوي»، - دەيدى ول.

راسىمەن، قازىر اتا-انالار بالاعا كەلگەندە اسا قىراعى بولۋى كەرەك. تەك بيىل جەلىدە ءوزىن-ءوزى ولتىرۋگە ۇگىتتەيتىن 22 ماتەريال تابىلعان. ماماندار ونىڭ 19-ىن تۇبەگەيلى بۇعاتتاي العان. قالعان ۇشەۋى تەكسەرىلىپ جاتىر. بۇدان بولەك، زورلىققا شاقىراتىن 157 ينتەرنەت-رەسۋرس شەكتەلگەن. سونداي-اق، قورقىنىشتى كادرلارعا تولى 101 ماتەريالعا شاعىم جازىلعان.

بۇل سايتتاردى بىردەن شەكتەۋ مۇمكىن ەمەس. دەگەنمەن قورعانۋدىڭ وڭاي جولى بار.

«بالالاردى تەحنيكالىق جاعىناۋ قورعاۋدىڭ جولى كوپ. سونىڭ ءبىرى - ارنايى قوسىمشا ارقىلى قورعانۋ. ونىمەن ءسىز بالاڭىزعا كورسەتىلەتىن كونتەنتتى شەكتەي الاسىز»، - دەيدى IT ساراپشى جاندوس بورانباي.

ساقتىقتا قورلىق جوق. دەگەنمەن اتا-انا شەكتەۋ قويسا دا، جەتكىنشەكتەردىڭ ءتۇرلى ايلا تاۋىپ، جەلىدەن كوڭىلى قالاعانىن تاباتىنى جاسىرىن ەمەس. ماماندار دا تىيىمنىڭ جاعدايدى ودان ءارى ۋشىقتىراتىنىن ايتادى، سوندىقتان، بالانى قورعاۋدىڭ جالعىز جولى - اشىق سويلەسىپ، ءتىلىن تابۋ.

اۆتور

اسحات رايقۇل