قايتا ساتۋعا قويىلعان Qazaq Air كومپانياسىنىڭ 38 ميلليارد تەڭگە قارىزى بار

  استانا. KAZINFORM - «Qazaq Air» اۋە كومپانياسىن ساتۋ تۋرالى جاڭا كونكۋرس ءوتىپ جاتىر. بۇل تۋرالى «سامۇرىق- قازىنا» ا ق دامۋ جانە جەكەشەلەندىرۋ جونىندەگى باسقارۋشى ديرەكتورى سالتانات ءساتجان ءمالىم ەتتى.

«بىزگە «Qazaq Air اۋە كومپانياسى ساتۋ تۋرالى كونكۋرس نەگە وتپەي قالدى؟ نەگە قايتادان كونكۋرس جاريالاندى؟» دەگەن سۇراقتار ءجيى تۇسەدى. جاڭادان جاريالانعان كونكۋرستىڭ قانداي ايىرماشىلىعى بار؟ ءبىز بىلتىر تامىزدا «Qazaq Air» اۋە كومپانياسىن ساتۋ تۋرالى 2 كەزەڭنەن تۇراتىن اشىق كونكۋرس جاريالادىق. دەگەنمەن كونكۋرس تالاپتارىنا ساي كەلەتىن ءوتىنىش تۇسكەن جوق»، - دەدى سالتانات ءساتجان «سامۇرىق- قازىنا» اق قوعامدىق كەڭەس وتىرىسىندا.

ونىڭ ايتۋىنشا، حالىقارالىق ينۆەستورلار اتالعان اۋە كومپانياسىنا قىزىعۋشىلىق تانىتقان.

«سودان كەيىن كونكۋرستىڭ جاڭا تالاپتارىن ازىرلەدىك. كونكۋرس ءقازىر ءجۇرىپ جاتىر. جاڭا بايقاۋدىڭ ارتىقشىلىعى - Qazaq Air اۋە كومپانياسىنىڭ قارىزىن وتەۋ مەرزىمى وزگەردى. بۇگىندە كومپانيانىڭ 38 ميلليارد تەڭگە قارىزى بار. قارجىنى اۋە كومپانياسى 5 ۇشاق الۋ ءۇشىن ۇلتتىق قوردان العان»، - دەيدى ول.

سونداي- اق «سامۇرىق- قازىنا» اق وكىلى قارىزدى 2044 -جىلعا دەيىن وتەۋ كەرەكتىگىن ايتتى.

كونكۋرس 29-قاڭتارعا دەيىن جالعاسادى، وعان كەز كەلگەن ينۆەستور قاتىسا الادى.