«قاۋىپسىز شوتقا» اقشا اۋدارۋ: ۇلتتىق بانك قازاقستاندىقتارعا ەسكەرتۋ جاسادى
استانا. KAZINFORM - تەرىس پيعىلدى ادامدار قازاقستاندىقتارعا ازاماتتارعا ارنالعان سيفرلىق ۇكىمەت سەرۆيسىنىڭ نەمەسە ەكىنشى دەڭگەيدەگى بانكتەردىڭ اتىنان «سيفرلىق سەنىمحات» نەمەسە «كرەديت» رەسىمدەلگەنى تۋرالى حابارلاما جىبەرەدى.
- حابارلامادا الۋشىنىڭ اتىنا «سيفرلىق سەنىمحات» رەسىمدەلگەنى، ونى ءۇشىنشى تۇلعالار پايدالانىپ جاتقانى نەمەسە كرەديت الۋعا ءوتىنىم ماقۇلدانعانى ايتىلادى. ءمان-جايدى انىقتاۋ ءۇشىن كورسەتىلگەن نومىرگە قوڭىراۋ شالۋ ۇسىنىلادى.
مۇنداي حابارلامانىڭ باستى ماقساتى - ادامدى ۇرەيلەندىرىپ، كورسەتىلگەن نومىرگە قوڭىراۋ شالۋعا ماجبۇرلەۋ. تەلەفون ارقىلى سويلەسۋ كەزىندە الاياقتار «سەنىمحاتتى جويۋدى»، «كرەديتتىك ءوتىنىمدى بۇعاتتاۋدى» نەمەسە «اقشالاي قاراجاتتى قورعاۋدى» ۇسىنادى، - دەلىنگەن حابارلامادا.
كەيىن وزدەرىن ۇلتتىق بانكتىڭ، ارنايى مەملەكەتتىك نەمەسە قۇقىق قورعاۋ ورگاندارىنىڭ قىزمەتكەرى رەتىندە تانىستىرادى. ولار ازاماتتىڭ اتىنا كرەديت رەسىمدەلگەنىن، كومپانيالار تىركەلگەنىن، كۇدىكتى قارجى وپەراتسيالارى جۇرگىزىلگەنىن نەمەسە اقشا قاراجاتىن جىمقىرۋ ارەكەتى جاسالعانىن حابارلايدى.
- وسىنداي ارەكەتتەردىڭ الدىن الۋدى سىلتاۋراتىپ، ولار س م س ارقىلى كەلگەن كودتى ايتۋدى، بانك كارتاسىنىڭ دەرەكتەمەلەرىن بەرۋدى، كۇماندى موبيلدى قوسىمشانى ورناتۋدى، اقشانى «قاۋىپسىز»، «ساقتىق» نەمەسە «جيناق» شوتىنا اۋدارۋدى نە موبيلدى قۇرىلعىنى قاشىقتان باسقارۋعا رۇقسات بەرۋدى تالاپ ەتەدى.
ۇلتتىق بانك بانكتەردىڭ، ارنايى مەملەكەتتىك جانە قۇقىق قورعاۋ ورگاندارىنىڭ قىزمەتكەرلەرى بانك كارتاسىنىڭ دەرەكتەمەلەرىن، سمس ارقىلى كەلگەن كودتاردى، كارتالار مەن قوسىمشالاردىڭ PIN- كودتارىن سۇرامايتىنىن ەسكەرتەدى. سونداي-اق، اقشانى «قاۋىپسىز شوتتارعا» اۋدارۋدى نەمەسە موبيلدى قۇرىلعىنى قاشىقتان باسقارۋعا مۇمكىندىك بەرەتىن قوسىمشالاردى ورناتۋدى دا ۇسىنبايدى، - دەلىنگەن بانك حابارلاماسىندا.
مۇنداي حابارلامانى العان كەزدە كورسەتىلگەن نومىرلەرگە قوڭىراۋ شالۋعا، كۇماندى سىلتەمەلەرگە وتۋگە جانە بەلگىسىز ادامداردىڭ نۇسقاۋلارىن ورىنداۋعا بولمايدى. اقپاراتتى تەكسەرۋ ءۇشىن ءتيىستى بانكتىڭ نەمەسە ازاماتتارعا ارنالعان سيفرلىق ۇكىمەت سەرۆيسىنىڭ رەسمي بايلانىس ورتالىعىنا حابارلاسۋ كەرەك.
- ۇلتتىق بانك قىزمەتكەرلەرى اۋديو جانە ۆيدەوقوڭىراۋلار شالمايتىنىن، جەكە تۇلعالاردىڭ شوتتارىنا قىزمەت كورسەتپەيتىنىن، اقشا قاراجاتىن ينۆەستيتسيالىق پاي قورلارى مەن وزگە دە قارجى ونىمدەرىنە ينۆەستيتسيالاۋدى ۇسىنبايتىنىن، اقشالاي قاراجاتتى ساقتاندىرۋمەن اينالىسپايتىنىن، سونداي-اق حالىقپەن اقشالاي ەسەپ ايىرىسپايتىنىن ەسكە سالامىز.
ەگەر ءسىز الاياقتىق ارەكەتكە تاپ بولساڭىز، قازاقستان رەسپۋبليكاسىنىڭ قۇقىق قورعاۋ ورگاندارىنا ارىزبەن جۇگىنۋگە كەڭەس بەرەمىز. كەڭەس الۋ ءۇشىن 1477 قىسقا ءنومىرى بويىنشا ۇلتتىق بانكتىڭ بايلانىس ورتالىعىنا حابارلاسۋعا بولادى، - دەلىنگەن حابارلامادا.
ايتا كەتەلىك الاياقتار كومپانيا جۇيەسىنە قاراپايىم قىزمەتكەر ارقىلى كىرۋى مۇمكىن.
