قايرات ساتىبالدى مەرزىمىنەن بۇرىن بوساتىلۋى مۇمكىن بە

قايرات ساتىبالدىنىڭ سوتقا بەرگەن ءوتىنىشى ونىڭ بىردەن بوساتىلانىن بىلدىرمەيدى. بۇل تۋرالى باس پروكۋروردىڭ ورىنباسارى اسەت شىنداليەۆ ايتتى، دەپ حابارلايدى Kazinform.

بۇگىن پارلامەنت ماجىلىسىندە وتكەن ۇكىمەت ساعاتىنان كەيىن تىلشىلەر باس پروكۋروردىڭ ورىنباسارىنان 6 جىلعا سوتتالعان قايرات ساتىبالدىنىڭ سوت بەلگىلەگەن جازانى وزگەرتۋ تۋرالى ءوتىنىش جولداۋىنا قاتىستى سۇراق قويدى.

«ونداي ءوتىنىم بولدى جانە ول سوتقا جولداندى. ءبىراق بۇل ءوتىنىشتىڭ سوتتا قاشان قارالاتىنىن ناقتى ايتا المايمىن. مۇنداي ءوتىنىش بەرۋگە سوتتالعانداردىڭ قۇقىعى بار. ناقتى شەشىمدى سوت شىعارادى»، - دەدى ءا. شىنداليەۆ.

بۇل تۇرعىدا ول سوتتالعانداردىڭ مەرزىمىنەن بۇرىن بوساتۋ نەمەسە جازا ءتۇرىن اۋىستىرۋ تۋرالى ءوتىنىش تۇسىرۋگە قۇقىعى بار ەكەنىن، ءبىراق ءبىراز قىلمىستار بويىنشا ونداي قۇقىقتى قولدانۋعا تىيىم سالىنعانىن ەسكە سالدى. اتاپ ايتساق، تەرروريستىك، ەكسترەميستىك باپتارى بويىنشا سوتتالعاندار جازادان بوساتىلمايدى.

«بۇدان باسقا كەز كەلگەن ادامنىڭ ءوتىنىش بەرۋگە قۇقىعى بار. بۇل ارىز (ق. ساتىبالدىنىڭ) سوتتىڭ قاراۋىندا. ونىڭ بۇل ءوتىنىشتى بەرگەنى بىردەن بوستاندىققا شىعادى دەگەندى بىلدىرمەيدى. سوت بوساتۋ نەمەسە باس تارتۋ تۋرالى شەشىم قابىلداي الادى»، - دەدى اسەت شىنداليەۆ.

ەسكە سالساق، بىلتىر قايرات ساتىبالدىعا سوت ۇكىمى شىعىپ، ول 6 جىلعا سوتتالدى.