قايرات ساتىبالدى ۇلىنان 83 ميليارد تەڭگەگە جۋىق اقشا قايتارىلعان
استانا. KAZINFORM - مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعاليدى قابىلدادى. انتيكور باسشىسى كەزدەسۋ بارىسىندا قايرات ساتىبالدى ۇلىنىڭ ىسىنە قاتىستى دا ەسەپ بەردى.
بىلتىر جەمقورلىققا قاتىستى 1692 قىلمىس تىركەلىپ، 1324 ادام اشكەرەلەنگەن. ونىڭ 161 ءى ءتۇرلى دەڭگەيدەگى باسشىلار. 1221 ءىس سوتقا جىبەرىلگەن. ال 2022-جىلدان بەرى مەملەكەتكە جانە كۆازيمەملەكەتتىك سەكتور سۋبەكتىلەرىنە 1,02 تريلليون تەڭگە (2,2 ميلليارد ا ق ش دوللارىنان استام) كولەمىندە مۇلىكتىك اكتيۆتەر مەن قاراجات قايتارىلعان.
سونىڭ ىشىندە «و ك م» وپەراتورى» ج ش س- نە قاتىستى اياقتالعان قىلمىستىق ىستەر بويىنشا قوستاناي جانە قاراعاندى وبلىستارىنداعى جالپى قۇنى شامامەن 20 ميلليارد تەڭگە بولاتىن 2 زاۋىت مەملەكەت مەنشىگىنە وتكەن.
«قايرات ساتىبالدى ۇلىنا قاتىستى سوتقا دەيىنگى تەرگەۋ امالدارى اياسىندا بيىل اقپاندا بيۋجەتكە تاعى دا شامامەن 82,6 ميلليارد تەڭگە (185 ميلليون ا ق ش دوللارى) ءتۇستى. بۇدان بولەك، اقمولا وبلىسىنىڭ قوسشى قالاسىنداعى 942 گەكتار جەر ۋچاسكەسى مەملەكەتكە قايتارىلدى. ونىڭ نارىقتاعى قۇنى 13 ميلليارد تەڭگەدەن اسادى»، - دەدى انتيكور باسشىسى.
ەسكە سالايىق، 2023-جىلى جەلتوقساندا قايرات ساتىبالدى ۇلى 55 ميلليارد تەڭگەدەن اسا اقشانى مەملەكەتكە قايتارعان بولاتىن. انتيكور قايرات ساتىبالدى ۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەرۋ شەڭبەرىندە ەلدەن زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان اقشانى جانە وزگە دە مۇلىكتى قايتارىپ جاتقانىن حابارلاعان بولاتىن.
