قايرات ساتىبالدى ۇلى مەملەكەتكە تاعى 50 ميلليارد تەڭگە قايتارادى
استانا. KAZINFORM - قايرات ساتىبالدى ۇلى مەملەكەتكە تاعى 50 ميلليارد تەڭگە قايتارادى، - دەپ حابارلايدى Massaget.kz ءتىلشىسى.
11-ساۋىردە قايرات ساتىبالدى ۇلىنا قاتىستى قىلمىستىق ءىستى قاراۋ شەڭبەرىندە سوت پروكۋروردىڭ ءوتىنىشى بويىنشا زاڭسىز ساتىپ الىنعان اكتيۆتەردى قايتارۋ جونىندەگى راسىمدەردى ورىنداۋ قاجەت ەكەنىنە بايلانىستى پروتسەستىك كەلىسىم جاساسۋ ءۇشىن قوسىمشا مەرزىم بەرۋ تۋرالى شەشىم قابىلدادى.
سوتتالۋشىنىڭ جالپى سوماسى 50 ميلليارد تەڭگەدەن اساتىن قوسىمشا اكتيۆتەرىن مەملەكەت پايداسىنا قايتارۋ تۋرالى ماسەلە قارالىپ جاتىر.
بۇعان دەيىن تەرگەۋ بارىسىندا قايرات ساتىبالدى ۇلى ءوز كىناسىن تولىق مويىنداپ، قىلمىستىق جولمەن الىنعان مۇلىكتى اشۋعا ىقپال ەتكەن. سوتالدى تەرگەپ-تەكسەرۋ كەزەڭىندە سىبايلاس جەمقورلىققا قارسى قىزمەت سوتتالۋشىنىڭ جانە وعان بايلانىستى تۇلعالاردىڭ جالپى سوماسى 732 ميلليارد تەڭگەدەن اسا مۇلىكتىك اكتيۆتەرى مەن اقشالاي قاراجاتىن مەملەكەت پايداسىنا (اكىمشىلىك عيماراتتار، ەكسكليۋزيۆتى زەرگەرلىك بۇيىمدار، ليۋكس ۇيلەر، پاتەرلەر مەن اۆتوكولىكتەر، كومپانيالارداعى اكسيالار مەن قاتىسۋ ۇلەستەرى، تەمىرجول جولدارى مەن اقشالاي قاراجات، شەتەلدىك مۇلىكتەرىمەن قوسا) قايتاردى.
ايتا كەتەيىك، وعان قاتىستى سالىق تولەۋدەن جانە بيۋجەتكە تولەنەتىن باسقا دا مىندەتتى تولەمدەردەن جالتارۋ دەرەگى بويىنشا تەرگەۋ جالعاسىپ جاتىر.
ەسكە سالايىق، بۇعان دەيىن سوتقا قايرات ساتىبالدى ۇلىنا قاتىستى ءىس تۇسكەنى حابارلاندى.
ال 2023-جىلى جەلتوقساندا قايرات ساتىبالدى ۇلى 55 ميلليارد تەڭگەدەن اسا اقشانى مەملەكەتكە قايتارعان بولاتىن. انتيكور قايرات ساتىبالدى ۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەۋ شەڭبەرىندە ەلدەن زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان اقشانى جانە وزگە دە مۇلىكتى قايتارىپ جاتقانىن حابارلاعان بولاتىن.
كەيىن ساتىبالدى ۇلى مەملەكەتكە 44,6 ميلليارد تەڭگە قايتاردى. قاراجات مەملەكەتكە كەلتىرىلگەن زالالدى وتەۋ بويىنشا رەسپۋبليكالىق بيۋجەتكە جىبەرىلدى.
