«قايرات» - «رەال» ماتچىنا بيلەتتەردىڭ باعاسى جاريالاندى

الماتى. KAZINFORM - «قايرات» فۋتبول كلۋبى UEFA چەمپيوندار ليگاسىنداعى الماتىدا وتەتىن ماتچتارىنا بيلەت ساتىلىمى تۋرالى رەسمي حابارلاما جاسادى.

«قايرات» - «رەال مادريد» ماتچىنا بيلەتتەر ساتىلىمى 23 - قىركۇيەكتە ساعات 17:00 دە باستالادى.

ەرەجەگە سايكەس، ءبىر ادامعا ەكى بيلەتتەن ارتىق ساتىپ الۋعا بولمايدى، بيلەت العان كەزدە جەكە كۋالىك نەمەسە ءتولقۇجات دەرەكتەرى كورسەتىلۋى قاجەت. دەرەكتەر ساتىپ الۋ كەزىندە دە، ستاديونعا كىرگەندە دە مۇقيات تەكسەرىلەدى.

بيلەتتەردى Ticketon پلاتفورماسىندا، FCKAIRAT. COM سايتىندا جانە Qairat Superapp قوسىمشاسىندا ساتىپ الۋعا بولادى.

ءاربىر ماتچقا بيلەتتىڭ باعاسى - 30 مىڭنان 250 مىڭ تەڭگەگە دەيىن بولادى.

- بيلەتتەردىڭ باعاسى ۋەفا- مەن كەلىسىلگەن جانە بارلىق ويىنعا ءبىرىڭعاي بولىپ بەلگىلەنگەن بيلەتتىڭ باعاسى 30000 تەڭگەدەن 250000 تەڭگەگە دەيىن بولادى. باعا ساياساتى تۋرنير تالاپتارىنا جانە چەمپيوندار ليگاسى ماتچتارىن ۇيىمداستىرۋدىڭ حالىقارالىق تاجىريبەسىنە سايكەس كەلەدى، - دەپ حابارلادى «قايرات» ف ك.

سونىمەن قاتار، ابونەمەنت يەلەرىنە ءوز ورىندارىن الدىن الا جانە ءتيىمدى باعاعا ساتىپ الاتىن مۇمكىندىك بەرىلەدى. ولارعا ساتىلىم باستالعانعا دەيىن الدىن الا حابارلاسىپ، تولىق اقپارات بەرىلەدى.

بيلەتتەردىڭ ءبىر بولىگى ءداستۇرلى تۇردە بەكىتىلگەن الەۋمەتتىك جانە كلۋب كۆوتالارى اياسىندا بولىنەدى. ولار «قايرات» اكادەمياسىنىڭ جانە كلۋب فيليالدارىنىڭ باپكەرلەرى مەن تاربيەلەنۋشىلەرىنە، پاراليمپيادالىق سپورت تۇرلەرىنىڭ سپورتشىلارىنا، سونداي-اق كلۋبتىڭ قىزمەتكەرلەرى مەن ارداگەرلەرىنە بەرىلەدى.

ايتا كەتەيىك، الماتىنىڭ ورتالىق ستاديونىندا چەمپيوندار ليگاسى ماتچتارىنا دايىندىق جۇمىستارى قاتاڭ كەستە بويىنشا جۇرگىزىلىپ جاتىر. سپورت عيماراتتارى ديرەكسياسى ورتالىق ستاديون الداعى «قايرات» - «رەال مادريد» ويىنىنا تولىق دايىن بولاتىنىن مالىمدەدى.