قايرات نۇرتاسپەن جانجالداسقان جولاۋشى 10 تاۋلىككە قامالدى

استانا. KAZINFORM - الماتى قالاسىنىڭ اكىمشىلىك قۇقىق بۇزۋشىلىق ىستەر جونىندەگى مامانداندىرىلعان اۋدانارالىق سوتى قايرات نۇرتاسپەن ۇشاقتا جانجالداسقان جولاۋشىعا قاتىستى ءىستى قاراپ، قاۋلى شىعاردى.

سوت انىقتاعانداي، 2024-جىلدىڭ 4-ماۋسىمىندا اسىلبەك بەكقايىروۆ الماتى-استانا باعىتىندا ۇشاق بورتىندا قايرات ايداربەكوۆپەن (نۇرتاس - رەد.) جانجال شىعارىپ، ارتى توبەلەسكە ۇلاسقان.

«ۇشاق بورتىنداعى توبەلەس كەزىندە ول ادەپسىز سوزدەر ايتقان. ا. بەكقايىروۆ ءوز ارەكەتىمەن قوعامدى سىيلاماۋشىلىق تانىتىپ، قوعامدىق ءتارتىپتى بۇزعان»، - دەپ جازىلعان سوت حابارىندا.

سوت وتىرىسىندا ا. بەكقايىروۆ ءوز كىناسىن مويىنداماعان.

ق ر اكىمشىلىك قۇقىقبۇزۋشىلىقتار تۋرالى 434-باپتىڭ 1-بولىگىنىڭ سانكسياسى 20 ا ە ك مولشەرىندە ايىپپۇل سالۋعا نەمەسە 5 تەن 15 تاۋلىككە دەيىنگى مەرزىمگە اكىمشىلىك قاماققا الۋ شاراسى قاراستىرىلعان.

«سوت قاۋلىسىمەن ا. بەكقايىروۆ ا ق ب ت ك- ءنىڭ 434-بابىنىڭ 1-بولىگىندە كوزدەلگەن اكىمشىلىك قۇقىقبۇزۋشىلىقتى جاساعانى ءۇشىن كىنالى دەپ تانىلىپ، 10 تاۋلىككە قاماۋعا الۋ تۇرىندەگى اكىمشىلىك جازا تاعايىندالدى. سوت قاۋلىسى زاڭدى كۇشىنە ەنگەن جوق»، - دەپ حابارلادى سوت.

ايتا كەتەيىك، اسىلبەك بەكقايىروۆ پەن قايرات نۇرتاس - بۇرىننان دوس. جانجالدىڭ باستى سەبەبى - ءانشىنىڭ شاقىرعان تويعا بارماۋى.

بۇعان دەيىن استانا قالاسىنىڭ اكىمشىلىك ىستەر بويىنشا مامانداندىرىلعان سوتى قايرات نۇرتاستىڭ بۇزاقىلىق ءىسى بويىنشا قاۋلى شىعاردى.