قايرات بورانبايەۆتىڭ قاشان بوساتىلاتىنى ناقتىلاندى

 جازاسى جەڭىلدەتىلگەن كاسىپكەر قايرات بورانبايەۆ جاقىن ارادا بوستاندىققا شىعادى. بۇل تۋرالى باس پروكۋروردىڭ ورىنباسارى اسەت شىنداليەۆ ايتتى، دەپ حابارلايدى Kazinform. بۇگىن سەناتتىڭ جالپى وتىرىسىنان كەيىن تىلشىلەر قايرات بورانبايەۆتىڭ بوستاندىققا قاشان شىعاتىنىن سۇرادى. 

«وسىعان دەيىن سوت شەشىمى شىقتى. سوت شەشىمى زاڭدى كۇشىنە ەنگەن كەزدە بوساتىلادى. جالپى، 15 كۇندەي كۇتۋ كەرەك. قاتەلەسپەسەم، ءتيىستى شەشىم ءبىر اپتا بۇرىن قابىلداندى. سوندىقتان ەندى ءبىر اپتادان كەيىن ول شىعۋى مۇمكىن»، - دەدى اسەت شىنداليەۆ.

ەسكە سالايىق، جۋىردا بەلگىلى كاسىپكەر قايرات بورانبايەۆ ءىسى بويىنشا اپەللياتسيالىق سوت ۇكىمى شىقتى. سوت كاسىپكەردىڭ جازاسىن جەڭىلدەتتى. ول 6 جىلعا باس بوستاندىعىنان ايىرىلدى.

بۇدان بۇرىن حابارلانعانداي، 20-قازاندا بەلگىلى كاسىپكەر قايرات بورانبايەۆتىڭ جازاسى جەڭىلدەتىلدەتىلگەنى جاريالاندى.

«سوت سوتتالۋشى «ب.»-نىڭ ءوتىنىشىن قاناعاتتاندىرا وتىرىپ، جازانىڭ قالعان بولىگىن بوستاندىقتى شەكتەۋ تۇرىنە اۋىستىردى» دەلىنگەن اقمولا وبلىسى زەرەندى اۋداندىق سوتىنىڭ حابارلاماسىندا.

ەسكە سالساق، بيىل ناۋرىز ايىندا سوت شەشىمىمەن قايرات بورانبايەۆقا 8 جىلعا باس بوستاندىعىنان ايىرۋ جازاسى تاعايىندالدى.

كەيىن سوتتا بۇل ۇكىم قايتا قارالىپ، مۇلكىن تاركىلەۋ جانە جازانى ەكى جىلعا قىسقارتۋ بەلگىلەندى.