قايرات بورانبايەۆتان الىنعان استاناداعى قوناق ۇيگە كىم يەلىك ەتەدى

استانا قالاسىنىڭ اكىمى جەڭىس قاسىمبەك قايرات بورانبايەۆتىڭ مەملەكەتكە تاپسىرعان قۇنى 1,4 ميلليارد تەڭگەدەن اساتىن Comfort Hotel Astana قوناق ءۇيىنىڭ الداعى تاعدىرى تۋرالى ايتتى، دەپ حابارلايدى Kazinform.

«قايرات بورانبايەۆ تەرگەۋمەن ەرىكتى تۇردە كەلىسىمگە كەلۋ اياسىندا مەملەكەتكە ءبىرقاتار اكتيۆىن، سونىڭ ىشىندە Comfort Hotel Astana قوناق ءۇي كەشەنى مەن فيتنەس ورتالىعىن تاپسىردى. وندا وڭالتۋ جانە ءبىلىم بەرۋ ورتالىقتارى ۇيىمداستىرىلۋى كەرەك دەپ ايتىلدى. ولار ۇيىمداستىرىلا ما؟ بۇل نىسانداردى ورتالىق رەتىندە ءىشىنارا نەمەسە تولىعىمەن قايتا قۇراسىزدار ما؟»، - دەپ سۇرادى جۋرناليست ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

جەڭىس قاسىمبەك استاناعا تەك Comfort Hotel Astana بەرىلەتىنىن ايتتى. فيتنەس ورتالىعى بەرىلمەيدى، ويتكەنى باس كومپانيا باسقا قالادا ورنالاسقان جانە سول جەردەن باسقارىلۋى مۇمكىن.

«Comfort Hotel Astana بويىنشا - وتكىزۋ پروتسەسى ءالى ءجۇرىپ جاتىر. تاپسىرۋ پروتسەسى اياقتالعاننان كەيىن ءارى قارايعى قىزمەت ءتۇرىن انىقتايمىز. ءبىراق قازىردەن ايتارىم، قالامىزعا مۇنداي دەڭگەيدەگى قوناق ۇيلەر جەتىسپەيدى. قوناق ءۇي ءوزىنىڭ قىزمەت پروفيلىن ساقتاۋى دا مۇمكىن. الايدا نىسان ءالى بەرىلمەدى، بۇل پروتسەسس ءجۇرىپ جاتىر»، - دەپ ءتۇسىندىردى قالا اكىمى.

قالا باسشىسىنىڭ ايتۋىنشا، نىساندى بالانسقا قابىلداۋ الداعى توقساندا اياقتالۋى قاجەت.

«بىزدە مەكتەپكە دەيىنگى مەكەمەلەر، الەۋمەتتىك نىساندار، وڭالتۋ ورتالىقتارى جانە باسقا دا مەكەمەلەر بويىنشا ءوز جوسپارىمىز بار. بۇل نىساندى الەۋمەتتىك نىساندارعا بەرۋدىڭ قاجەتى جوق. ءتۋريزمدى دامىتۋ بولىگىندە قالاعا ءدال وسى دەڭگەيدەگى قوناق ۇيلەر قاجەت»، - دەپ تولىقتىردى جەڭىس قاسىمبەك.

بۇعان دەيىن Kazinform كاسىپكەر قايرات بورانبايەۆتىڭ مەملەكەت مەنشىگىنە قايتارعان اكتيۆتەرىنە شولۋ ۇسىنعان ەدى.

بيىلعى 6- قاراشادا قايرات بورانبايەۆ بوستاندىققا شىقتى.